Đơ̆ng rŏng sŏng sa drơ̆m kơsơ̆, yă PhạmThị Dự (oei tơ̆ Hưng Yên) ƀôh jĭ kơ̆l, ƀơ ƀlut hăk, jĭ măt. Hloh 1 măng, dôm tơdrong ƀôh jĭ đơ̆ng yă roi ‘năr roi ăl, jĭ măt roi ‘năr roi tôch kơ dêh, kơna sư đei ŭnh hnam ba truh tơ̆ Hnam pơgang Mắt Trung ương vă khăm hơlen. Đơ̆ng rŏng kơ đei đe ƀak si hơlen lăng, yă Dự ưh kơ ê ƀơ̆t băt kơdih đei jĭ Glôcôm (mă bơ̆n khan jĭ măt pluk):

“Ĭnh lăp tơchĕng đei jĭ hơnơ̆k đĕch, sư mơ̆t lơ̆m, ưh kơ tơchĕng ‘noh đei jĭ măt pluk. Sư nhen ‘meh pơchăh măt, jĭ kơ̆l dêh, hơving măt, đang kơ ‘noh jĭ mơ̆t lơ̆m măt, jĭ ưh kơ kĕ hloi, huch pơgang kŭm ưh kơ dă ƀiơ̆. Đe ƀak si athei hơmet lazer păng ăn brŏk huch pơgang, răp hơlen lăng 2 giĕng. Mă lei đơ̆ng rŏng 2 giĕng hơmet, năm khăm dơ̆ng, măt ĭnh oei ưh kơ dă ƀiơ̆ kơna ƀak si hlôi răih hơmet.”

Kŭm đei jĭ kơ̆l, jĭ măt nhen yă Dự, bơngai jĭ sơnăm mơlôh Đỗ Thị Lan Hương (tơ̆ Hải Phòng) ƀôh ưh kơ hiôk ƀơ̆t chă ƀôh đei jĭ Glôcôm. Hơdrol ‘noh, Hương kŭm tam mă đei jĭ kiơ găh măt, ‘ngoăih kơ măt lăng ưh kơ gan hơdăh, ƀơ̆t lăp măt đei jĭ mă lei lăp đei ƀôh hmă păng chă klăih kơdih:

“Tơpă yan âu khei ‘năr blŭng ĭnh tơchĕng ưh kơ hiôk, đa tơchĕng kơnê̆, mă lei đơ̆ng rŏng khăm hơlen hăm đe ƀak si tơ̆ âu đon tơchĕng ĭnh hiôk ƀiơ̆. Mă hơdrol ‘nao jĭ păh lăp ĭnh đei hơmet hăm pơgang huch hơdai, răp hơlen lăng rim giĕng, khei ăn bơngai jĭ, mă lei ‘noh jĭ hơmet ưh kơ kĕ klăih tŏk kiơ̆ khei ‘năr kơna ưh kơ kĕ klăih, đơ̆ng rŏng ‘noh klong măt ĭnh ưh kơ gan sơđơ̆ng ‘noh đei athei răih”.

Kiơ̆ đe ƀak si, Glôcôm ‘noh mĭnh tơdrong jĭ yua đơ̆ng klong măt pơm ăn ưh kơ ‘lơ̆ng trong hoan măt hơnhăk truh lăng ưh kơ bang păng măt tol. Jĭ Glôcôm kŭm jing tơdrong jĭ đa đei pơm ăn măt tol. Tơdăh ưh kơ đei chă ƀôh păng hơmet hrôih, măt lăng đơ̆ng bơngai jĭ gô sa roi tơ jur hơnhăk truh lăng ưh kơ bang păng ưh kơ kĕ klăih.

Ƀak si Nguyễn Thị Thanh Hương, khoa Glôcôm, Hnam pơgang Mắt Trung ương tơbăt, vă chă ƀôh hrôih păng vei lăng đei jĭ Glôcôm, lăp hăm trong năm khăm hơlen đĕch:

“Mă mônh ‘noh dôm bơngai đei bơngai lơ̆m ŭnh hnam đei tơdrong jĭ ‘nâu; dôm bơngai đei jĭ lơ̆m hơkâu nhen huyết áp, hơyô đak sĭk, jĭ kơting.... Dôm bơngai jĭ huyết áp, hơyô đak sĭk kăl kơ năm khăm hơnơ̆ng vă vei lăng klong măt, tang găn đei ƀôh jĭ jing Glôcôm. Mă loi ‘noh, lơ bơngai jĭ kră hơnơ̆ng yua pơgang hla ‘long.. gô đei jĭ Glôcôm đơ̆ng rŏng kơ yua dôm pơgang âu. Hơdai hăm ‘noh, bơngai mơlôh đei măt ưh kơ bang dêh mă lei kơsô̆ tŏk hrĕnh kŭm kăl kơ vei lăng jĭ Glôcôm yua kơ lơ bơngai tŏk đô̆ ưh kơ bang hrĕnh hlôi đei jĭ Glôcôm. Dôm bơngai âu kŭm kăl athei năm khăm păng hơlen lăng hrôih”.

Hăm dôm bơngai hlôi đei hơlen lăng đei jĭ Glôcôm, bơngai jĭ athei hơrih hơdai hăm jĭ đĭ chăl hơrih, păng tơdrong măt ưh kơ bang ‘noh ưh kơ đei klăih; yua thoi noh, tơdrong vei lăng hơmet jĭ tôch kơ gĭt kăl. Bơngai jĭ đei hơmet hăm pơgang athei yua pơgang ƀlep jơ, khăm ƀlep năr pơkă, ưh kơ gơh pơdơh kơ dih pơgang vă vei kơsô̆ măt bang uơ ei dơ̆ng, veh ver hơmơt kơ măt tol.