Jang pơgang kŭm hăm joh ayŏ, pơtho pơhrăm ‘noh jĭ dôm tơdrong tơm tôch kơ gĭt kăl, ưh khan lăp jing tơdrong hơgăt mă oei jing tơdrong ‘lơ̆ng vă hơtŏk tơiung bơngai jang. ‘Noh jĭ nơ̆r pơma đơ̆ng Tổng Bí thư Tô Lâm ƀơ̆t Quốc hội pơma dơnuh tơ̆ grŭp găh 2 tơdrong jang tơm kơ teh đak găh vei lăng jơhngơ̆m pran, kơsô̆ kon pơlei păng hơtŏk tơiung păng tơdrong jang bơ̆jang kiơ̆, hơtŏk ‘lơ̆ng pơtho pơhrăm jăl jang 2026-2035. Kiơ̆ kơ Tổng Bí thư, tơdrong hơgăt kơ teh đak ưh khan lăp kơ hơdrô̆ anih pơtho pơhrăm dăh mă jang pơgang, mă jing kơ đĭ đăng tơpôl, đĭ đăng kon pơlei athei mơ̆t jang. Hăm jang pơgang, Tổng Bí thư athei tơplih tơm jing vei lăng jơhngơ̆m pran blŭng a păng tang găn hơdrol, hơmet ‘lơ̆ng đơ̆ng tơm dôm tơdrong cham char, đak rơgoh, tơmam sa rơgoh - dôm tơdrong tơm pơm ăn jĭ jăn. Tơdăh ưh kơ đei hơmet pơ ‘lơ̆ng đơ̆ng tơm, mă đơ̆ng tơmơ̆t jên jang thim dôm yơ hnam pơgang kŭm ưh kơ pơm lăp đei hăm ‘meh vă.

 “Hăm jang pơgang, gĭt kăl ‘noh jĭ vei lăng jơhngơ̆m pran blŭng a, athei ăn tang găn hơdrol. Oei hrei ‘nâu tŏk bŏk năm lơ lơ̆m khăm hơmet jĭ, nhen lê̆ tŏk bŏk hơmet koă kơ lê̆ đĕch - yua kơ tang găn ưh kơ ‘lơ̆ng kơna jĭ roi lơ. Athei băt hơdăh rim tơdrong jang mĭnh, tơdrong kiơ ‘noh tơdrong tŏk bŏk oei đei? 5 sơnăm dơ̆ng bơ̆n hăm kĕ hơmet klăih đĭ dăh ưh? Athei mă rơđăh thoi noh. Jĭ hiĕn hiang lơ̆m apŭng plĕnh teh hŭt lê̆ đunh bơih, lê̆ tơpoh ƀơ̆t yơ kŭm tang găn tôch kơ hoach jên. Jĭ klơm thoi yơ, tơpoh thoi yơ? Ĭnh akhan tơdrong jang teh đak ‘noh athei yak mơ̆t lơ̆m dôm tơdrong hơdăh, dôm tơdrong hơgăt ‘noh”.

Tơdrong tơm kơ teh đak găh vei lăng jơhngơ̆m pran, kơsô̆ kon pơlei păng hơtŏk tơiung jăl jang 2026 - 2035 đei Quốc hội pơdrơ̆ng kiơ̆, hăm tơdrong hơgăt akŏm ‘noh jĭ vei sơđơ̆ng rim kon pơlei tă kơ đei vei lăng, pơvei jơhngơ̆m pran blŭng a, tang găn jĭ đơ̆ng hrôih, đơ̆ng hơtăih, kơtă hloi tơ̆ tơring, tang găn jĭ jăn; hơtŏk kơsô̆ rơneh, hơdrin pơm hơtŏ kơsô̆ drŏ nglo drŏ kăn mưh rơ neh iŏk đei kơsô̆ dang ăi drŏ nglo drŏ kăn mưh rơneh, pơm lăp hăm kơsô̆ kon pơlei kră lơ, hơtŏk ‘lơ̆ng jơhngơ̆m pran, jơhngơ̆m đon, hơrih sot păng tơdrong hơrih sa ‘lơ̆ng kơ kon pơlei, pơjing teh đak Việt Nam pran jăng.

Găh trong jang tơmơ̆t jên jang Tơdrong jang tơm kơ teh đak găh vei lăng jơhngơ̆m pran, kơsô̆ kon pơlei păng hơtŏk tơiung jăl jang 2026 – 2035, tơdrong jang yak truh vei lăng jơhngơ̆m pran đĭ đăng kon pơlei, hơtŏk ‘lơ̆ng tơdrong jang pơgang tơ̆ tơring, tang găn jĭ đơ̆ng hrôih, tơplih ‘lơ̆ng kơsô̆ kon pơlei, tơ jră hăm kră lơ păng hơtŏk tơgŭm ăn grŭp ƀônh đei ưh kơ ‘lơ̆ng. Kơdră Anih tơm vei lăng găh jang pơgang Đào Hồng Lan tơbăt:

 “Găh dôm tơdrong jang, tơdrong tơm bơ̆jang, hlôi akŏm bơngai jang vă tơlĕch jang kiơ̆. Tơdrong tơm vă hơtŏk ‘lơ̆ng đơ̆ng jang pơgang tơring, jang pơgang tang găn hơdrol, tŭn pran tơdrong jang vei lăng kơsô̆ kon pơlei, hơtŏk tơiung vei sơđơ̆ng ‘lơ̆ng kơsô̆ kon pơlei, pơm lăp hăm bơngai kră lơ, vei lăng tơpôl ăn kơ dôm bơngai ƀônh đei ƀơm ưh kơ ‘lơ̆ng. ‘Nâu jĭ dôm tơdrong tơm kơ tơdrong jang pơgang păng kơsô̆ kon pơlei, tŏk bŏk kăl đei akŏm bơngai jang vă hơmet pơ ‘lơ̆ng mơmat tat, tơhlăk tơhlĭn lơ̆m kơplăh tơlĕch bơ̆jang kiơ̆. Dôm hơnih tơgoăt vă hơtŏk tơiung tơlĕch bơ̆jang kiơ̆ đei dôm tơdrong hơgăt gĭt kăl hlôi tơroi ăn tơdrong tơchơ̆t trung ương.

Tơdrong hơgăt hơdăh đơ̆ng Tơdrong jang tơm kơ teh đak găh vei lăng jơhngơ̆m pran, kơsô̆ kon pơlei păng hơtŏk tơiung jăl jang 2026 - 2035  jĭ tơgop bơ̆jang kiơ̆ tơdrong kơgăt kơsô̆ xăh, phường, tơring gĭt kăl jang đei Tơdrong hơgăt teh đak găh jang pơgang tơ̆ xăh ‘noh 90% lơ̆m sơnăm 2030 păng 95% truh sơnăm 2035. Hơdrin kơsô̆ kon pơlei đei pơm hla ar jơhngơ̆m pran điện tử păng vei lăng jơhngơ̆m pran kiơ̆ chăl hơrih đei 100% đơ̆ng sơ năm 2030. Kơsô̆ hơnih vei lăng tơdrong jĭ jăn rim dêh char, pơlei tơm kĕ gơh hơlen lăng tơdrong tơm pơm ăn, tơdrong tơjră dôm tơdrong jĭ tơpoh krê hơmơt, đak rơgoh, hnam trưng ‘yâu kiơ̆ tơdrong hơgăt đơ̆ng Anih tơm vei lăng găh jang pơgang truh sơnăm 2030 iŏk đei 100%. Kơsô̆ Hnam pơgang xăh, phường, tơring gĭt kăl tơlĕch bơ̆jang kiơ̆ tang găn hơdrol, vei lăng, hơmet 1,2 tơdrong jĭ ưh kơ tơpoh kiơ pơtho đơ̆ng Anih tơm vei lăng găh jang pơgang truh sơnăm 2030 đei 100% păng pơvei truh sơnăm 2035. Kơsô̆ hơkĕ hơkong, krĕ tơ̆ hơioh hơla kơ 5 sơnăm truh sơnăm 2030 jur hơla kơ 15% păng truh sơnăm 2035 jur hơla kơ 13%.