Năr brei (13/8), lơ̆m dêh char Lâm Đồng hlôi đei vă jê̆ 4.000 ‘nu bơngai jĭ grŏnh, tŏk hloh 3.800 ‘nu bơngai pơtêng hăm sơnăm sơ̆. Rim tơdrong jĭ jơ̆ng ti ƀơr, pơlŏ lĕch đe jei tơpoh kơtang lang să lơ̆m rim giĕng tơjê̆ ou, hăm akŏp măt bơngai jĭ đei vă jê̆ 1.600 ‘nu bơngai jĭ jơ̆ng ti ƀơ̆r păng hloh 2.700 ‘nu bơngai pơlŏ lĕch đe, lơ̆m ou đei 1 ‘nu bơngai lôch kơ yuơ pơlŏ lĕch đe pơm ăn. Hơnih vei lăng kon pơlei dêh char Lâm Đồng athei Hơnih bơ̆ jang vei lăng jang pơgang păng rim hơnih bơ̆ jang lơ̆m dêh char, tơring iung jang kơtang pơrô̆ jang, tơlĕch jang kiơ̆ jơnei tang găn hơlou; sơđơ̆ng khul jang, kmăi kmŏk jang pơgang păng dôm tơmam drăm ou to ăn bơ̆ jang ou. Hơnih vei lăng kon pơlei dêh char Lâm Đồng pơjao ăn Hơnih vei lăng jang pơgang dêh char pơm tơm, iung jang hơdoi hăm rim hơnih jang ƀơm truh, rim tơring, phương, tơring kăl pơgơ̆r ăn rim khul bơ̆ jang năm dăr lăng, tơgŭm djru bơ̆ jang tang găn pơrang jĭ tơ̆ rim hơnih jang, tơring; tơtom tơroi tơbăt, pơchoh trong ăn Hơnih vei lăng kon pơlei dêh char lăng hơlen, pơrô̆ iung jang hăm dôm tơdrong jang kăl.