Mŏ Nguyễn Thị Khánh Phương, oei tơ̆ phường Tuy Hòa tơbăt, ƀơ̆t Tết sơnăm 2023, bơngai lơ̆m ŭnh hnam sư đei ƀôh tơdrong jĭ krê hơmơt yua đơ̆ng ưh kơ ‘lơ̆ng đơ̆ng rơneh nge, athei ƀet tơmơ̆t pham lơ ‘mơ̆i mă klăih. Bơngơ̆t hloh ‘noh, bơngai jĭ đei grŭp pham khăi AB kơna tơdrong tơchă pham kơplăh doh tôch kơ mơmat tat. Ƀơ̆t tơdrong kăl ‘noh, dôm tơpu pham yua đơ̆ng Hnam pơgang Đa khoa Phú Yên sơng iŏk đơ̆ng 1 ‘nu bơngai chă tơgŭm đei pham hơdai hăm sư hlôi tơtom dŏng hơrih bơngai lơ̆m ŭnh hnam sư. Đơ̆ng noh, mưh jơhngơ̆m pran ‘lơ̆ng, băt tơ̆ yơ kăl kơ pham mŏ Phương vang plang song.

Plang song pham ƀơ̆t hơdrol kơ Tết Bính Ngọ âu ‘noh jĭ ‘măng mă 4 lơ̆m 3 sơnăm âu ki sư hlôi vang plang song tơ̆ phường Tuy An. Mŏ Nguyễn Thị Khánh Phương tơroi.

“Jô̆ đơ̆ng khei ‘năr mŏ ĭnh đei jĭ bơih đei plang song pham kơ̆p kư̆u na klăih, 3 sơnăm âu ki mưh jơhngơ̆m pran hiôk ‘lơ̆ng ĭnh vang plang song pham ngăl. Ĭnh hơmĕng akhan, dôm kơtoh pham đơ̆ng ĭnh gô dŏng hơrih đei dôm bơngai jĭ ăl nhen bơngai lơ̆m ŭnh hnam nhôn hlôi tơƀơ̆p ƀơm”.

Kŭm vang plang song pham tơ̆ phường Tuy An lơ̆m ‘măng âu, đơ̆ng rŏng kơ jang kiơ̆ nơ̆r tơlĕch jang đơ̆ng Hnam pơgang Đa khoa Phú Yên, mŏ Đinh Thị Ngọc Ngàn, phường Tuy Hòa, tơroi:

“‘Nâu jĭ ‘măng mă 4 ĭnh vang plang song pham, hăm ‘meh vă đei vang tơgŭm dôm bơngai jĭ tŏk bŏk tơƀơ̆p mơmat tat găh pham. Kiơ̆ đơ̆ng tơdrong jang âu, ĭnh hơmĕng gô đei dơ̆ng lơ buăl mơlôh, đe ‘nhŏng, đe mŏ ‘lŏ ƀiơ̆ vang plang song pham dŏng bơngai lơ hloh, tơgop păr ang jơhngơ̆m đon vang tơgŭm băl lơ̆m tơpôl”.

Đơ̆ng blŭng khei 1 truh dang ei, Hnam pơgang Đa khoa Phú Yên hlôi sơng iŏk dang 330 tơpu pham đơ̆ng dôm hơnih plang song pham ‘mêm mơnat tơ̆ phường Tuy An, hơtŏk akŏm kơsô̆ pham mong răk tŏk vă jê̆ 760 tơpu pham. Kiơ̆ kơ ƀak si Nguyễn Định Huy, Kơdră vei lăng khoa găh Pham - Ƀet tơmơ̆t pham, Hnam pơgang Đa khoa Phú Yên, rim khei dôm anih jang pơgang tơring păih Hơlĕch dêh char Đắk Lắk kăl dang 600 tơpu pham. Lơ̆m năr Têt, mưh kơsô̆ bơngai kơ̆p kư̆u, gre tơ̆m preh băl đei ƀôh tŏk, tơdrong kơchăng iŏk pham đơ̆ng hrôih ‘noh jĭ trong jang gĭt kăl vă vei sơđơ̆ng măh pham pơyua ăn hơmet jĭ ăn bơngai jĭ lơ̆m năr Tết Bính Ngọ.

“Dang ei rim giĕng nhôn sơng iŏk hloh 150 tơpu pham đơ̆ng dôm tơdrong jang plang song pham yua đơ̆ng Khŭl krao hơvơn plang song pham tơgŭm krao hơvơn. Đơ̆ng rŏng kơ sơng iŏk, kơsô̆ pham âu đei rơih hơmet tôch kơ hơlen păng klăih song kiơ̆ 5 grŭp jĭ đơ̆ng Anih tơm vei lăng găh jang pơgang HIV, jĭ klơm B, C, jĭ krơ, chĕp pơlŏ ling lang pơyua ăn tơdrong jang kơ̆p kư̆u, hơmet ăn bơngai jĭ lơ̆m năr Têt.”

Kŭm hăm tơring păih Hơlĕch, tơdrong jang plang song pham ƀơ̆t hơdrol kơ Tết Bính Ngọ kŭm pơgơ̆r tơ̆ păih Pơmơ̆t dêh char Đắk Lắk. Ƀak si chuyên khoa II Trịnh Hồng Nhựt, Kơdră vei lăng Hnam pơgang Đa khoa tơring Tây Nguyên roi tơbăt, hăm 1.200 tŏ giơng bơngai jĭ ƀĭch hơmet, mưh rim ‘măng Têt hnam pơgang tă kơ sơng iŏk lơ bơngai jĭ. Vă vei sơđơ̆ng tơdrong jang khăm, hơmet jĭ tơtom, đei yua, hnam pơgang hlôi kơchăng hơmet ăn tôm bơ̆n pơgang, tơmam hơmet jĭ, hơmet ăn đĭ đăng y ƀak si păng bơngai jang trư̆k Têt.

Kiơ̆ kơ ƀak si Trịnh Hồng Nhựt, mă đơ̆ng pham lơ̆m ‘măng pơdơh Têt đunh năr ling lang jing long nol, mă lei gơnang đơ̆ng kơchăng đơ̆ng hrôih, truh dang ei hnam pơgang oei hơnơ̆ng sơng iŏk păng mong răk kơhrĕng tơpu pham, ling lang pơyua ăn tơdrong jang kơ̆p kư̆u, hơmet jĭ:

“Găh pơgang, hnam pơgang hlôi athei Khoa pơgang pơjing trong tơlĕch jang, hơmet ăn tôm bơ̆n pơgang, tơmam hơmet jĭ pơyua ăn tơdrong jang khăm, hơmet jĭ lơ̆m năr Têt. Hăm kơsô̆ pham, hnam pơgang jang hơdai hăm dôm khŭl jang ‘mêm mơnat hơvơn dang 1.000 tơpu pham mong răk  pơyua ăn kơ̆p kư̆u bơngai jĭ. Kơsô̆ âu lơ hloh kơ rim sơnăm lăp tơ̆ kơsô̆ 700 – 800 tơpu pham, ling lang pơyua ăn kơ̆p kư̆u, hơmet jĭ. Hơdrô̆ hăm dôm grŭp pham khăi, hnam pơgang hlôi pơma dơnuh hơdrol hăm dôm bơngai jang tơgŭm ling lang plang song pham mưh bơngai jĭ kăl”.

Hăm tơdrong hơmet ăn kơchăng đơ̆ng anih jang Pơgang kŭm hăm jơhngơ̆m đon vang tơgŭm đơ̆ng dôm bơngai jang tơgŭm plang song pham, dôm hnam pơgang tơ̆ Đắk Lắk tŏk bŏk ling lang pơm lăp hăm ‘meh vă kơ̆p kư̆u, hơmet jĭ năr Tết Bính Ngọ. Dôm tơpu pham đei mong răk tơtom ‘noh jĭ hơnih gơnang gĭt kăl vă tơgăr iŏk dơ̆ng tơdrong hơrih ăn bơngai jĭ, vă rim bơngai sơng Têt sơđơ̆ng, hiôk.