VOV4.Bahnar - Che\p vei đon bơnôh yuk trong hơlâu đơ\ng khul hơdruh tơdăm, lơ\m dôm xơnăm kơ âu, khul mơlôh Ko\ng ang dêh char Lâm Đồng hơnơ\ng jing khul jang dơnơm yuk trong hơlâu lơ\m rim tơdrong jang, kơchăng yak hloh tơnap tap vă keh đang tơnăp xơnong jang đei pơjao. Lơ\m tơdrong jang, atu\m jơhngơ\m yuơ tơpôl, khul mơlôh Ko\ng ang Lâm Đồng hơnơ\ng hơyak truh tơdrong jang hơvơn păng tơdrong jang tơpôl ‘mêm bơnat, răk ‘măn lơ jơhngơ\m đon ‘lơ\ng hơ iă ăn bơngai linh Ko\ng ang lơ\m đon bơnôh kon pơlei.

Lơ\m dôm tơdrong jang vih tơ\ tơring, noh tơdrong jang atu\m hăm kon pơlei vang pơjing tơring pơxe\l ‘nao, chă kôchhơmet hơbong đak, bơ\ trong nơnăm, hơmet hnam oei ăn rim unh hnam mă teh đak tơchơ\t tơgu\m, tơgu\m hơbe\n ao, hla bar ho\k ăn ho\k tro hin dơnuh... hơnơ\ng đei khul mơlôh Ko\ng ang Lâm Đồng pơgơ\r jang hơnơ\ng. Đại úy Phan Văn Phú, Bí thư Đoàn hơdruh tơdăm Ko\ng ang dêh char Lâm Đồng ăn tơbăt, âu jing dôm tơdrong jang kăp g^t, hơnơ\ng hơvơn đei lơ đoàn viên hơdruh tơdăm vang jang: “Tơdrong jang atu\m jơhngơ\m yuơ tơdrong erih tơpôl đei rim đoàn viên lơ\m khul Ko\ng ang Lâm Đồng dru\t kơtang. ‘Nguaih kơ tơgu\m dôm unh hnam mă teh đak tơchơ\t tơgu\m, ho\k tro đei tơdrong erih tơnap tap noh kiơ\ kơ xơkơ\t khei năr, hơnăn jang, Đoàn công an dêh char pơgơ\r lơ tơdrong jang tơgu\m kon pơlei kon kông tơ\ tơring ataih yaih, dôm tơdrong jang nhen axong ao tơno\ ăh pơyan puih, tơdrong jang pơyan puih mak ‘mêm kơ eng,  tơdrong jang ăn pơyan pơdơh kơ ho\k, đang kơ noh lơ tơdrong jang nai nhen tơ\k ang hơdăh trong pơlei pơla, axong ăn hla bar ho\k ăn ho\k tro, axong tơmam ăn unh hnam mă teh đak tơchơ\t tơgu\m hăm kơxo# jên truh kơ hre\ng triu hlak jên”

Atu\m hăm noh, tơdrong jang y tế, vei lăng jơhngơ\m jăn ăn kon pơlei duh đei khul đoàn viên hơdruh tơdăm Ko\ng ang dêh char Lâm Đồng pơm kiơ\ kơjăp. Hăm nơ\r pơma “Minh kơtoh pham axong ăn, minh tơdrong erih oei đei”, vang tơgu\m ăn kon pơlei lơ\m tơdrong jang plang pham do\ng bơngai, rim xơnăm, Đoàn hơdruh tơdăm Ko\ng ang dêh char Lâm Đồng pơgơ\r 3 ‘măng plang pham ‘mêm kơ eng, axong pơhlom 500 tơpu pham ăn anih mong pham vă axong ăn tơdrong jang y tế tơ\ tơring. ‘Nguaih kơ noh, Đoàn hơdruh tơdăm Ko\ng ang dêh char Lâm Đồng oei hơnơ\ng jang atu\m hăm hnam pơgang tơm Lâm Đồng pơgơ\r lơ ‘măng pơdơh hơnăn “Kỳ nghỉ hồng” vă năm truh dôm apu\ng ataih yaih nhen Cát Tiên, Đạ Tẻh, Đam Rông… vă khăm j^ păng axong ăn hoh pơgang kơ kon pơlei kon kông hin dơnuh, tơroi pơtho găh vei lăng jơhngơ\m jăn păng tang găn dôm tơdrong j^ lơ\m tơpôl ăn kon pơlei. Thượng úy Trần Anh Dũng, Bí thư Chi đoàn Anih jang Kanh sát hơlen kơ Ko\ng ang an dêh char Lâm Đồng ăn tơbăt: “Tơguăt hăm tơdrong juăt jang po, noh nhôn hơnơ\ng jang atu\m hăm chi đoàn ma túy păng chi đoàn thây kô pơtho tơ\ hnam trưng cao đẳng y vă dru\t kơtang tơdrong tơroi pơtho băt găh ma túy, HIV. Tôm tơdrong pơtho adoi đei ako\m lơ\m tơbang tơroi hơdăh vă pơtruh tôm tơdrong kăl băt hơdăh ăn tôm kon pơlei”.

            Đơ\ng tơdrong pơgơ\r lơ tơdrong jang kăp g^t, tơdrong pơlong “Khul mơlôh Ko\ng ang Lâm Đồng yuk trong hơlâu, gơh rơgei, kơdih iung jang yuơ tơdrong xơđơ\ng ăn teh đak” roi năr roi lang xă, hơvơn lơ đoàn viên hơdruh tơdăm vang jang. Kiơ\ đoàn viên Now Hồng Thuyên, tơ\ xăh Tân Châu, apu\ng Di Linh, dêh char Lâm Đồng, kiơ\ đơ\ng dôm tơdrong vih tơ\ tơring đơ\ng Đoàn hơdruh tơdăm Ko\ng ang dêh char, che\p vei đon bơnôh yuk trong hơlâu đơ\ng lơ đoàn viên hơdruh tơdăm lơ\m tơring roi năr roi đei hơto\k. Ưh kơ adro# vang ako\m tôm măt mă oei jang tơnăp dôm tơdrong jang tơpôl mă tơring tơle\ch jang. Đoàn viên Now Hồng Thuyên ăn tơbăt: “Đoàn công an dêh char vih tơ\ tơring pơgơ\r lơ tơdrong jang nhen axong tơmam ăn ho\k tro tơnap tap, unh hnam mă teh đak tơchơ\t tơgu\m păng kon pơlei đei tơdrong erih tơnap tap, năm apong unh hnam linh j^ rơka păng unh hnam linh lôch do\ng teh đak... jing minh ‘nu đoàn viên hơdruh tơdăm tơ\ apu\ng Di Linh, nhôn chơt hơ iă pơ ư pơ ang hăm dôm tơdrong jang đoàn đơ\ng đoàn viên Ko\ng ang dêh char”

Hăm dôm tơdrong jang đei jơnei đơ\ng tơdrong pơlong jang “Khul mơlôh Ko\ng ang Lâm Đồng yuk trong hơlâu, gơh rơgei, kơdih iung jang yuơ tơdrong xơđơ\ng ăn teh đak”, khei năr âu ki hlôi đei hloh 430 anih jang, tơ ‘ngla đoàn viên Ko\ng ang Lâm Đồng đei Anih tơm Ko\ng ang, Trung ương Đoàn hơdruh tơdăm Cộng sản Hồ Chí Minh păng dôm anih jang kơ dêh char Lâm Đồng pôk ăn bằng hmach bơnê, hla bar bơnê. Păng Đoàn hơdruh tơdăm Ko\ng ang dêh char duh jing minh lơ\m dôm anih jang đei xơkơ\t 5 xơnăm pơtoi hloi đei jơnei hơnăn jang rơgei.

Lan chih păng rapor