1. Tơdrong jang kach mang tŏ sĕt bơngai jang, proh hơmet ming hơnih bơ̆jang păng iŏk jang khŭl kơdră chĕp kơ̆l tơring 2 tăl.

‘Năr 1/7/2025, lơ̆m teh đak pơtơm tơmơ̆t ăn bơ̆jang khŭl kơdră chĕp kơ̆l tơring 2 tăl. 63 dêh char, pơlei tơm đơ̆ng rŏng tơmơ̆t hơdai oei pă 34 dêh char, pơlei tơm hăm 3.321 xăh, phường, tơring gĭt kăl. Tổng Bí thư Tô Lâm pơma hơdăh “proh hơmet ming khŭl bơ̆jang” ‘noh jĭ hơyak năm gĭt kăl đei tơdrong ‘lơ̆ng, tơƀôh ăn 1 jăl jang hơtŏk tơiung ‘nao lơ̆m tơdrong jang hơmet tôm khŭl bơ̆jang teh đak, hơmet tôm tơdrong tơchơ̆t păng pơgơ̆r jang đơ̆ng khŭl jang chĭnh trĭ hrơ̆ch, tŏ sĕt bơngai, đei yua, ‘lơ̆ng, yak truh jang đang 1 tơdrong bơ̆jang vei lăng hơgei, tơ jê̆ kon pơlei, hơdai kon pơlei, yua kơ kon pơlei pơvih pơvăn, vă rim tơdrong đei yua đei găh kon pơlei.

Hơdrol ‘noh, bơ̆jang kiơ̆ Tơdrong tơchơ̆t kơsô̆ 18-NQ/TW đơ̆ng Anih chĕp kơ̆l pơgơ̆r Trung ương Đảng jăl XII, đơ̆ng rŏng proh hơmet, pơm tŏ sĕt bơngai jang đĭ tơjur 4 anih jang Đảng găh Trung ương; 25 khŭl chĕp kơ̆l pơgơ̆r đảng; 16 đảng khŭl; 5 anih jang kơ Quốc hội; 5 anih tơm păng 3 anih jang găh Khŭl kơdră teh đak; 30 anih jang găh anih tơm; 1.025 anih jang kơpal, 4.413 lăm bơ̆jang păng 240 anih pơvih pơvăn. Tơ̆ tơring, jur 466 anih jang; 644 khŭl, đảng khŭl păng khŭl vei lăng đảng; 3.984 anih jang; 27 đảng bộ kơpal kơtă păng dôm anih jang đảng tơring.

2. Tơlĕch 7 tơdrong tơchơ̆t gĭt kăl vă chơng hơnhăk teh đak yak mât lơ̆m chăl jang tŏk ‘nao

7 tơdrong tơchơ̆t gĭt kăl đơ̆ng Anih tơm Chinh trĭ tơlĕch ƀât hơtuch sơnăm 2024 păng 2025, lơ̆m noh 4 tơdrong tơchơ̆t đei: Tơdrong tơchơ̆t kơsô̆ 57-NQ/TW hơtŏk tơdrong jang khoa hŏk, kơmăy kơmŏk, tơplih ‘nao rơgei păng tơplih hăm kơmăy sô̆ lơ̆m teh đak; Tơdrong tơchơ̆t 59-NQ/TW găh mât jang hơdoi hăm apŭng plenh teh lơ̆m chăl ‘nao; Tơdrong tơchơ̆t kơsô̆ 66-NQ/TW găh tơplih ‘nao tơdrong chih pơjing păng jang kiơ̆ khôi luơ̆t pơm lăp hăm tơdrong ‘mĕh vă jang tŏk đơ̆ng teh đak lơ̆m chăl ‘nao; Tơdrong tơchơ̆t kơsô̆ 68-NQ/TW găh atŏk tơiung anih jang mŭk drăm kơdih đei năng jĭ “4 tơdrong tơchơ̆t tôch gĭt kăl” hăm lơ tơdrong tih vă atŏk tơiung teh đak hrei ‘nâu, 3 tơdrong tơchơ̆t kiơ̆ tơdrong jang, đei tơdrong tơchơ̆t kơsô̆ 70-NQ/TW, 71-NQ/TW, 72-NQ/TW, tơklep hăm 3 tơdrong jang “hơmet pơ ‘lơ̆ng tơdrong jang xa, arih xa ăn kon pơlei lơ̆m teh đak” ƀơm truh rim bơngai ‘noh jĭ unh hơyuh, pơtho pơhrăm, vei lăng jơhngâm pran ăn kon pơlei. Rim tơdrong tơchơ̆t găh 1 tơdrong jang gĭt kăl mă lei đei 1 đon pơhnŏng ‘nŏh jĭ pơjing trong jang kơjăp vă Việt Nam jang tŏk hrĕnh păng pran kơjăp. 

Rim khul kơdră chĕp kơ̆l, Anih jang đảng, anih jang kơ teh đak, khul grŭp tơpôl đơ̆ng Trung ương truh tơ̆ tơring jăh tơlĕch jang kiơ̆ mă ‘lơ̆ng dôm tơdrong tơchơ̆t, pơjing trong jang mă hơdăh, tơmât hơnăp jang đơ̆ng bơngai chĕp kơ̆l hăm dôm tơdrong jang đei, pơm ‘lơ̆ng “hơdăh tơdrong jang, hơdăh bơngai jang, hơdăh khei ‘năr jang, hơdăh tơdrong jang đei”.

3. Quốc hội hơmet ming Khôi luơ̆t tơm teh đak păng pơdrơ̆ng kiơ̆ lơ tơdrong jang tơgŭm ‘lơ̆ng

‘Năr 16/6/2025, tơ̆ ‘Măng hop akŏm mă 9, hăm 100% bơngai tang măt đei măt yơ̆r ti drơ̆ng lăp, Quốc hội hlôi pơdrơ̆ng kiơ̆ tơdrong tơchơ̆t hơmet ming, tơmơ̆t dơ̆ng 1,2 tơdrong đơ̆ng Khôi luơ̆t tơm teh đak sơnăm 2013. Tơchơ̆t gĭt kăl âu pơm đei tơdrong ‘lơ̆ng trŏ luơ̆t ăn tơdrong pơm tŏ sĕt bơngai jang teh đak, pơm lăp hăm ‘meh vă hơtŏk tơiung lơ̆m jăl jang ‘nao, mă loi ‘noh jĭ proh hơmet khŭl kơdră chĕp kơ̆l tơring păng dôm tơdrong hơgăt Mặt trận Tổ quốc Việt Nam, dôm anih jang chĭnh trĭ - tơpôl, dôm khŭl tơpôl yua đơ̆ng  Đảng, Teh đak pơjao hơnăp jang.

Hloh 2 ‘măng hop akŏm joăt hmă păng 1 ‘măng hop akŏm ưh kơ ê lơ̆m sơnăm 2025, Quốc hội jăl XV đei dôm tơplih ‘nao ‘lơ̆ng, ‘moi kiơ̆ akŏm kơsô̆ 89 luơ̆t, 91 tơdrong tơchơ̆t, đei hloh 40% akŏm kơsô̆ luơ̆t, tơchơ̆t lơ̆m pơđĭ jăl jang jăl XV. Quốc hội hlôi hơmet ming, tơmơ̆t dơ̆ng lơ luơ̆t hơgăt dôm tơdrong tơm nhen teh, tơmơ̆t jên jang teh đak, pơgơ̆r khŭl kơdră chĕp kơ̆l tơring, pơjao dơ̆ng tơdrong gơh jang ăn tơring lơ̆m tơchơ̆t trong jang tơmơ̆t jên jang, klăih song jên jang teh đak, proh hơmet khŭl bơ̆ jang.

4. Hop akŏm Đảng jơ̆p tơring đei pơgơ̆r đang ‘lơ̆ng pơih trong năm truh Hop akŏm mă 14 kơ Đảng

Hlŏh 60.000 anih jang Đảng, lơ̆m noh đĭ đăng 40 Đảng ƀô̆ găh Trung ương hlôi pơgơ̆r đang Hop akŏm Đảng ƀô̆ jăl jang đơ̆ng 2025 - 2030 hăm tơdrong đei ƀôh atŭm ‘nŏh tơdrong hơmet tôch ‘lơ̆ng, pơgơ̆r hrĕnh păng khul kơdră pơgơ̆r bơ̆ jang ƀônh sơđơ̆ng đơ̆ng rŏng kơ hop akŏm. ‘Nâu ưh lăp tơdrong jang chinh trĭ tih lơ̆m đơ̆ng đĭ đăng Đảng, đĭ đăng khul linh, đĭ đăng kon pơlei đĕch mă oei jing tơdrong git kăl vă gơ̆h pơgơ̆r đang ‘lơ̆ng Hop akŏm mă XIV kơ Đảng. Mă loi, đĭ đăng 34 ‘nu Bí thư đảng dêh char, plt păng 1,2 kơchư̆k jang tơm tơ̆ tơring đơ̆ng rŏng kơ hop akŏm tơtă bơngai đơ̆ng tơring nai ngăl, trŏ thoi nơ̆r athei đơ̆ng Trung ương, tơƀôh hơdăh đon pơhnŏng tơplih ‘nao tơdrong jang kăn ƀô̆, hơtŏk đon tơnăp, jang roi ‘lơ̆ng, găn ƀiơ̆ tơdrong jang dơdoă lơ̆m tơring păng hơtŏk đon ki luơ̆t, jang roi tơnăp lơ̆m rim anih jang chinh trĭ. 

Tơ̆ Trung ương, Hop akŏm Đảng ƀô̆ Quốc hội, Khul kơdră teh đak, Mặt trận Tổ quốc Việt Nam, dôm anih jang Đảng kơ Trung ương, Khul linh păng Công an kơchăng hơmet ming Khul kơdră pơgơ̆r kiơ̆ trong jang ‘nao, tŏ sĕt bơngai, chih hơdăh hơnăp jang, tơdrong gơ̆h jang, pơm lăp hăm tơdrong chĕp kơ̆l pơgơ̆r lơ̆m chăl jang tŏk ‘nao.

5. Mŭk drăm tŏk GDP lơ hloh lơ̆m 5 sơnăm âu ki

Lơ̆m khei ‘năr mŭk drăm apŭng plĕnh teh lơ ưh kơ sơđơ̆ng, mă loi ‘noh jĭ long nol yua đơ̆ng tơdrong jang iŏk thuê̆ đơ̆ng Mi păng ƀơm ưh kơ  ‘lơ̆ng kơtang yua đơ̆ng tŏ ‘mi kial pơrăm, Việt Nam iŏk đei jang tŏk hrĕnh GDP sơnăm 2025 hloh 8% (tơroi kơsô̆ chih jô̆ trŏ ƀlep ƀơ̆t đei tơbăt hơdăh tơpă). ‘Nâu jĭ kơsô̆ tŏk lơ hloh lơ̆m 5 sơnăm âu ki. Tĕch tơ̆ teh đak đe ‘noh tơdrong hơgăt đơ̆ng mŭk drăm ƀơ̆t hơmet ming tơmam tơplih ‘lơ̆ng jing grŭp pơm tơlĕch. Kơsô̆ jên tĕch tơlĕch răt tơmơ̆t đơ̆ng teh đak đe đei hloh  920 ti USD. Mŭk drăm tih hơnơ̆ng sơđơ̆ng, hơtŏk kơjă lơ đei vei lăng tơchĕng hơdrol tơ̆ kơsô̆ hơla kơ 4%. Thu mong jên jang ăn teh đak truh tŏk bŏk khei 12/2025 đei dang 2,47 triệu ti hlak jên, yak hloh 25% jô̆ tơchĕng hơdrol păng tŏk pran pơting hăm khei ‘nâu sơnăm hơdrol. GDP jô̆ păh lăp kơ̆l bơngai jô̆ pơhlom đei dang 5.000 USD, tŏk 1,4 ‘măng pơting hăm sơnăm 2020, hơnhăk Việt Nam lơ̆m grŭp teh đak iŏk yua jô̆ păh lăp lơ. Anih mơdro sa jên hu hơtŏk tơiung sơđơ̆ng, anih mơdro sa chứng khoán đei hơtŏk tơ̆ anih mơdro sa ‘nao iung lơ̆m sơnăm 2025.

6. Hơtŏk tơdrong vei sơđơ̆ng tơdrong arih xa tơpôl, jang đang tơdrong sut pơđĭ hnam hiăh hiok

‘Năr 26/8/2025, tơdrong bơ̆ jang, pơjei băl “Đĭ đăng lơ̆m teh đak vang sut pơđĭ hnam hiăh hiok” tôch đơ̆ng rŏng 1 sơnăm 4 khei tơlĕch jang, jang đang hrôih ƀiơ̆ 5 sơnăm 4 khei. Vă jê̆ 50.000 ti hlak jên đei yoa vă sut pơđĭ 334.234 tŏ hnam hiăh hiok. ‘Năr 30/11/2025, Thủ tướng teh đak hơnơ̆ng tơlĕch tơdrong jang "Quang Trung" jăh man hơmet ming hnam păk, pơchăh yoa đơ̆ng ‘mi kial, đak lơ̆p tơ̆ dôm dêh char Tơring Tŏk bŏk, hăm đon pơhnŏng man ‘nao 1.628 tŏ hnam adrol kơ ‘năr 31/1/2026 păng pơm hơmet đang 34.352 tŏ hnam tơglơ̆h adrol kơ ‘năr 31/12/2025.

Kŭm hăm ‘nŏh, lơ tơdrong tơgŭm tih găh jang pơgang, pơtho pơhrăm đei tơlĕch. Tơdrong tơchơ̆t 71‑NQ/TW khŏm jang ‘lơ̆ng tơdrong pơtho pơhrăm mâm non ăn đĭ đăng kon mon đơ̆ng 3 - 5 sơnăm păng hơtŏk kơsô̆ druh dăm hŏk đang lăm 12 tŏ sĕt hlŏh ‘nŏh truh 85% lơ̆m sơnăm 2030; đơ̆ng sơnăm hŏk 2025 - 2026, hơioh mâm non păng hŏk tro hŏk phô thŏng tơ̆ rim hnam trưng teh đak pơjing ưh pă đei nôp jên hŏk kiơ. Tơlĕch man 100 tŏ hnam trưng teh đak rong tơ̆ dôm xăh sơlam. Tơdrong tơchơ̆t 72-NQ/TW tơlĕch đon pơhnŏng đơ̆ng sơnăm 2026 đĭ đăng kon pơlei đei khăm hơlen jơhngâm pran kiơ̆ khei, ưh kơ đei huach jên.

7. Tŏk ‘lơ̆ng găh anih jang kăl, pơm tơdrong ‘lơ̆ng kơjăp ăn teh đak hơtŏk tơiung

Sơnăm 2025 tơƀôh hơyak tŏk ‘lơ̆ng pran kơtang găh hơtŏk tơiung anih jang kăl, jing tơdrong ‘lơ̆ng, gĭt kăl ăn tơdrong jang hơmet ming anih jang kăl hrơ̆ch, ‘nao, pơm lăp hăm ‘meh vă hơtŏk tơiung kơ teh đak lơ̆m chăl ‘nao. Đơ̆ng rŏng 3 lêh tơlĕch jang, et hơtŏk dôm tơdrong jang tih, tơm lơ lơ̆m teh đak; đĭ đei 564 tơdrong jang hăm akŏm kơsô̆ jên tơmơ̆t jang hloh 5,14 triệu ti hlak jên; vă jê̆ 140 tơdrong jang tih jang đang, ăn tơmơ̆t lơ̆m bơ̆jang, iŏk yua jơnei. Lơ̆m noh, kăl kơ lăng truh ‘noh jĭ et hơtŏk, ăn gre kơdâu ki thuơ̆t hloh 3.500 km trong gre kơdâu hrĕnh, sơng ‘măng păr mă blŭng tơ̆ Cham gre păr  Long Thành, ăn tơmơ̆t lơ̆m iŏk yua Hơnih Jơnŭm kơchơ Pơdă teh đak, dôm tơdrong jang ŭnh hơyuh tơm... hơdai hăm, tơlĕch jang tơdrong jang cham gre păr Gia Bình, tơnŏk Hòn Khoai, anih kơdrơ̆m Cần Giờ, anih kơdrơ̆m tơplŏng kơdâu Olympic, dôm tơdrong jang pơm trong gre treng anih kơdrơ̆m, hơmet ăn man trong gre treng kơdâu hrĕnh Bắc – Nam, dôm tơdrong jang pơyua ăn APEC sơnăm 2027 tơ̆ Phú Quốc.

8. Pơgơ̆r đang ‘lơ̆ng lêh tih tơbăt 80 sơnăm Kăch mang khei 8 iŏk jơnei păng Quốc khánh 2/9; 50 sơnăm Năr tơblăh iŏk rơngei tơring Pơbăh, pơjing đei mĭnh teh đak kơjăp ‘lơ̆ng

Lơ tơdrong jang tih, gĭt kăl lơ̆m sơnăm 2025 đei pơgơ̆r đang ‘lơ̆ng, tôch tơgăl păng sơđơ̆ng ‘lơ̆ng hơiă. Lơ̆m noh, dôm tơdrong jang đơ̆ng 2 lêh tih tơbăt 80 sơnăm Kăch mang khei 8 iŏk jơnei păng Quốc khánh 2/9; 50 sơnăm Năr tơblăh iŏk rơngei tơring Pơbăh, pơjing đei mĭnh teh đak kơjăp ‘lơ̆ng hlôi ‘măn đei tơdrong hơiă đơ̆ng sơ̆ tam mă biơh đei. Lêh yak pơrŏ khul linh tơ̆ Cham xă Ba Đình pơgê 2/9 tơ̆ Anih tơm Hà Nội păng rok trong Lê Duẩn pơgê ‘năr 30/4 tơ̆ plt Hồ Chí Minh hăm kơtriu ‘nu kon pơlei păng dôm khul linh tơblăh vang akŏm. Um rup khul linh yak pơrŏ “yak tŏk bŏk jơhngâm đon kon pơlei” ưh lăp păr ang nơ̆r tơbăt tôch hơiă găh đon hơpơi ‘mĕh chĕp kơ̆l pơgơ̆r kơdih, rơngei hiôk hian, jang tơbôl truh hăm bôl boăl lơ̆m apŭng pklenh teh đĕch mă oei ‘măn đei lơ tơdrong tôch hơiă găh jơhngâm pran kơtang, hưch ‘mêm kơ hơdrech hơdrung.

9. ‘Mi kial pơrăm kơtang păng hlĭch tam mă byơh ƀôh pơm ăn hiong răm tôch kơ dêh găh bơngai păng mŭk drăm

Sơnăm 2025 đei hơlen lăng ‘noh jĭ 1 lơ̆m dôm sơnăm ‘mi kial pơrăm đei ƀôh hơtơ̆k tơtăk, krưp krĕnh păng hlĭch hloh lơ̆m jơhnơr hơrih tŏ ‘mi kial Việt Nam hăm lơ tơdrong krê hơmơt đei ƀôh să, pơtrơp păng hơdrom băl nhen kial hơbŭt, ‘mi tih jơ̆p jang, đak lơ̆p, đak lŏk jruh păng teh hơlih. ‘Mi kial hơbŭt pơrăm lơ̆m teh đak hlôi pơm ăn 468 ‘nu lôch, hiong dong, 741 ‘nu rơka; vă jê̆ 4.200 tŏ hnam đei păk pơchăh, 348.834 tŏ hnam đei hư răm; 545.395hek tar ƀa, ‘nhot đei đak lơ̆p, hiong răm; 71.687 tŏ kon tơrong, 5,16 triệu tŏ ‘ier bip đei lôch, jroh hoch; 171.763 hơdrao rong ka hơdang đei hiong răm; 1.070km thong, hơbong đak đei hư răm; 140km bơnơ̆ đak krong, bơnơ̆ đak dơsĭ đei hơlih; 1.259km trong nơnăm đei hư răm... Akŏm hiong răm jô̆ pơhlom hloh 98.677 ti hlak jên.

Tơdrong jang tơ jră hăm ‘mi kial pơrăm hlôi đei tơlĕch jang kiơ̆ trong akŏm, kơtang păng drơ̆ng 1 nơ̆r đơ̆ng Trung ương truh tơring. Yua thoi noh, pơting hăm lơ teh đak đei ‘mi kial pơrăm lơ̆m tơring păng apŭng plĕnh teh, hiong răm hlôi đei tang găn lơ.

10. Tơdrong jang kơmăy jŏh ayŏ kơ dŏ xoang đei lơ tơdrong ‘lơ̆ng hăm lơ tơdrong hơri hơxoang, pơm phim iŏk đei jên vĕ păng bơngai lăng tôch lơ, đơ̆ng sơ̆ tam mă biơh đei

Sơnăm 2025 tơbăt sơnăm đei jơnei ‘lơ̆ng đơ̆ng anih jang kơmăy jŏh ayŏ kơ dŏ xoang Việt Nam mưh anih pơgơ̆r pơm phim iok đei lơ tơdrong tôch hơiă đơ̆ng sơ̆ tam mă biơh đei găh jên vĕ păng bơngai năm lăng. Dôm tơdrong joh ayŏ đei pơgơ̆r kiơ̆ tơdrong hơgăt đơ̆ng apŭng plenh teh, tơmât yoa ‘lơ̆ng tơdrong juăt so păng nơ̆r pơma chăl hle, ƀĕnh tơdrong hưch hanh, vang tơgop tưk tơiung jơhngâm đon ‘mêm kơ teh đak kiơ̆ trong ‘nao. Găh tơdrong pơm xinrơma, iŏk đei jên vĕ lơ hlŏh tơ̆ anih tĕch vĕ Việt hăm phim “Mưa đỏ” iŏk đei hlŏh 714 ti hlak jên păng lơ phim nai kŭm iŏk đei jên vĕ truh kơ hrĕng ti ‘năi.

‘Năr 14/11/2025, Thủ tướng Phạm Minh Chính kĭ ăn tơdrong jang atŏk tơiung dôm anih jang kơmăy jŏh ayŏ kơ dŏ xoang Việt Nam truh sơnăm 2030, trong vă jang truh sơnăm 2045. Lơ̆m noh đon pơhnŏng truh sơnăm 2030, dôm anih jang kơmăy joh ayŏ kơ dŏ xoang jang tŏk jô̆ păh lăp dang 10% 1 sơnăm păng tơgop 7% GDP kơ teh đak. Truh sơnăm 2045, Việt Nam jing teh đak jang tŏk pran găh kơmăy kơmok joh ayŏ kơ dŏ xoang, pơchơt ngôi lơ̆m tơring châu Á.