‘Năr 18/4/1976, dôm bơngai mă blŭng đơ̆ng Gia Lâm đei măt tơ̆ Nam Ban. Đơ̆ng rŏng kơ ‘nŏh, dôm khul druh dăm đơ̆ng Từ Liêm, Đông Anh, Thanh Trì, Ba Đình, Đống Đa păng lơ tơring đơ̆ng Hà Nội rok trong druh kiơ̆. Lăp hlŏh 2 sơnăm, hlŏh 2.600 ‘nu druh dăm năm hơdrol choh khai hoang đei hlŏh 1.900 ha teh, pơih đei kơhrĕng km trong, kŭm hăm kon pơlei kon kông tơ̆ tơring pơm hnam, tưk tơiung tơdrong jang xa, pơjing đei lơ pơlei pơla ‘nao.

Hlŏh 50 sơnăm pơjing păng jang tŏk, tơring jang mŭk drăm ‘nao Hà Nội tơ̆ Lâm Đồng hlôi pơjing đei lơ tơring pơtăm cheh phe, ‘long mur, choh jang xa hăm kơmăy kơmŏk ‘nao; anih jang, trong nơnăm, hnam trưng, hnam pơgang đei tơlĕch jên man kơjăp ‘lơ̆ng, tơdrong arih xa kơ kon pơlei roi đunh roi tŏk. Hơnăn krao Lâm Hà, tơmât hơdai đơ̆ng Lâm Đồng păng Hà Nội ƀât apŭng đei pơjing lơ̆m sơnăm 1987, jing um rup tơƀôh hơdăh tơdrong pơvei băl kơjăp ‘lơ̆ng đơ̆ng 2 tơring.

Pơma tơ̆ lêh tơbăt, ƀok Hồ Văn Mười, Kơdră jang lơ̆m Trung ương Đảng, Kơdră vei lăng kon pơlei dêh char Lâm Đồng, pơma hơdăh tơdrong jơnei lơ̆m 50 sơnăm đơ̆ng jơhngâm đon adrin, tơdrong chu hŭt hơkâu păng tơdrong mât 1 ƀơ̆r đon, ‘mêm băl đơ̆ng lơ jơhnơr: "Năng dơ̆ng jăl trong 50 sơnăm, bơ̆n gơ̆h pơma, ‘nŏh ưh lăp hơdrô̆ tơdrong khai hoang đei 1 tơring teh đĕch, mă ‘nŏh jĭ tơdrong jang tơiung pơjing tơdrong arih xa, pơjing đon lui păng tưk tơiung tơdrong arih tơ̆ hơnô̆ hơnăp kơnh ăn lơ jơhnơr đơ̆ng rŏng. Tơdrong jơnei ‘nŏh ưh lăp pơtŏ hăm dôm anih jang, trong nơnăm dăh mă dôm tơring choh jang xa ‘nao đĕch mă oei tơƀôh hơdăh tơdrong gĭt kăl lơ̆m rim hnam man kơjăp ‘lơ̆ng, rim lăm hŏk chơt hơiă, rim unh hnam đei tơdrong arih xa hiôk sơđơ̆ng, ‘lơ̆ng rŏ".

Tơbăt 50 sơnăm tơring jang mŭk drăm ‘nao Hà Nội tơ̆ groi teh Lâm Đồng, lơ tơdrong jŏh ayŏ kơ dŏ xoang, tơplŏng kơdâu kŭm đei pơgơ̆r. Tơ̆ âu, đei pơm kơ trăi, pơdă tơƀôh tơmam đơ̆ng chăl adrol păng roi tơbăt tơmam OCOP đei pơgơ̆r tơ̆ tơring Lâm Hà, tơƀôh dơ̆ng jăl trong tơiung pơjing tơring jang mŭk drăm ‘nao păng tơdrong pơvei mât hơdai tôch hơiă đơ̆ng tơdrong jŏh ayŏ kơ dŏ xoang 2 tơring.

‘Măng mă âu, dêh char Lâm Đồng păng pơlei tơm Hà Nội hlôi kĭ pơkăp hla ar chih tơƀlŏk jang hơdai tôm tơdrong. Anih MTTQ Việt Nam pơlei tơm Hà Nội pơjao pơtrŏ tơgŭm hloh 1,3 ti hlak jên man 22 tŏ hnam tơgŭm ăn dôm unh hnam mơmat tat. Dêh char Lâm Đồng kŭm pôk hơpăh ăn dôm khŭl grŭp, bơngai păng unh hnam đei lơ tơgop lơ̆m tơdrong pơjing, atŏk tơiung tơring jang mŭk drăm ‘nao. Đăm jĭt sơnăm adrol sơ̆, dôm bơngai kon Hà Nội hơnhăk ba jơhngơ̆m mơlôh păng hơpơi ‘meh truh hăm groi kông Lâm Đồng muih roh choh klăng, pơjing tơdrong jang sa. Năr ‘nâu, dôm jơhnơr pơtăl dơ̆ng tŏk bŏk hơtŏk jơnei ‘noh hăm đon hơgei, kơmăy kơmŏk păng jơhngơ̆m đon tơplih ‘nao.