Tơ̆ xah Bảo Lâm 1, tơdrong drơ̆ng lăp đơ̆ng kon pơlei tŏk bŏk oei tơgop pơklaih minh lơ̆m dôm tơdrong tơnap tap tih hloh ah mă pơtơm dôm tơdrong ming man trong nơnăm: hrŭ 'mong teh iŏk ming man. Lơ unh hnam kơchăng pơih lê̆ pơga, tơdrong ming man ah hơnăp hnam vă pơjao teh ming man tơdrong kăl yua atŭm. Đei dôm unh hnam athei akŏm lơ jên vă hơmet ming dơ̆ng, mă lei adoi chơt hơ-iă kơlih tơdrong pơyua đunh đai mă tơdrong ming man atŭm hơnhăk ăn. Yă Cao Thị Nghệ, oei tơ̆ xah Bảo Lâm 1 tơroi:  “Mă huach truh kơhrĕng triu hlj, inh kŭm sô̆ hơ-iă mơ̆n. 'Nhŏng oh ming man trong nơnăm kŭm dăp đon dăp bơnôh, jang măng năr, 'mi kial kŭm jang hloi mơ̆n”.

Tơdrong drơ̆ng nơ̆r đơ̆ng kon pơlei tơgŭm ăn hơmet pơ ‘lơ̆ng tơnap tap găh hơnih teh, pơjing rơvơn vă bơngai tơmơ̆t jên jang akŏm khul jang, kmăi kmŏk păng tơmam drăm ming man. Tơ̆ dôm jăl trong pơvih pơvăn ăn choh jang sa, tơdrong iung jang keh đang ming man jĭ tôch gĭt kăl mưh kon pơlei vă jê̆ truh pơyan phĕ chehphe. Ƀok Lê Quang Tuấn, tang măt ăn hơnih ming man, tơbăt: “Nhôn akŏm khul jang, kmăi kmŏk, gre, proh hơmet tôm tơmam drăm vă iung jang ming man tĕnh koăng. ‘Nhŏng oh iung jang kơtang, prăt măng năr tơplih dih băl jang, hơdrin jang keh đang hrôih, vă jăh tơmơ̆t iŏk yoa, tơgŭm ăn kon pơlei chă yơ yak hiôk hian lơ̆m pơyan ‘mi păng chơ pơdŭ chehphe lơ̆m pơyan phĕ”.

Hơdrin iung jang đĭ ai đơ̆ng bơngai tơmơ̆t jên jang lơ̆m ming man atŭm hăm tơdrong lăp đon drơ̆ng nơ̆r pơjao teh, kon pơlei tŏk bŏk tơgop kơtang iung jang tĕnh koăng kơ rim hơnih ming man. ‘Nou jing tơdrong kăl hloh mưh Lâm Đồng yak mơ̆t lơ̆m jơ ‘năr iung jang kơtang tơlĕch kon jên teh đak tơmơ̆t jang sơnăm 2026.

Ƀok Trần Đình Phước, Kơ iĕng Kơdră chĕp pơgơ̆r Hơnih vei lăng kon pơlei tơring Bảo Lâm 1 akhan, tơdrong drơ̆ng mĭnh nơ̆r đơ̆ng kon pơlei jĭ tơdrong kăl hloh vă hơmet pơ ‘lơ̆ng tơnap tap găh iŏk tơvih teh, atŏk kơtang iung jang ming man păng tơlĕch kon jên teh đak tơmơ̆t jang: “Vă pơjing đei drơ̆ng mĭnh nơ̆r, nhôn hlôi iung jang hơdoi hăm rim hơnih bơ̆ jang, hơnih jang pơtruh trong pơgơ̆r hop akŏm kon pơlei, pơrô̆ pơrôp rim ŭnh hnam kĭ pơkăp yuih pơđĭ dur pơgar, pơjao ăn teh. Đei ŭnh hnam măh yuih hloi hnam păh hơnăp, dur pơgar lơ̆m hơgăt teh tôch kơsă, mă lei kon pơlei oei chơt hơ iă lăp đon tơgŭm djru vă hơnih ming man hrôih đei iung jang, atŏk kơtang tơlĕch kon jên jang teh đak tơmơ̆t jang”.