Pơtôch 'măng hop akŏm, Tổng Bí thư, Kơdră teh đak bơ̆n Tô Lâm bơnê kơ khei năr ou ki, tơdrong jang tơbôl păng jang hơdoi lơ̆m apŭng plenh teh đei jơnei kăp gĭt, đei tơplih gah tơdrong tơgŭm, jang hơdoi păng pơgơ̆r jang tơgop vei sơđơ̆ng hiôk hian, pơih să tơdrong jang hơdoi păng akŏm jơhngơ̆m vă jang hơtŏk tơ-iung teh đak. Jang tơbôl lơ̆m lơ tơdrong jang, dôm tơdrong jang đei tơlĕch jang drơ̆ng minh, tơdrong chă hơlen dôm tơchơ̆t đei tơplih đơ̆ng tơchơ̆t jang jing sơkơ̆t hơdah tơdrong jang đei jơnei, pơm hơdah sơnong jang.

Tổng Bí thư, Kơdră teh đak pơgơ̆r hăm Jơnŭm pơgơ̆r dôm tơdrong jang pơtoi tơgŭm, asong jang vă pơtoi hơtŏk 'lơ̆ng, kơjăp sơđơ̆ng kơ dôm tơdrong jang đei jơnei. Rim hơnih jang đei tơrĕk kăl akŏm pơtơm dôm sơnong jang tơm lơ̆m dôm khei hơtuch sơnăm, hơtŏk jang đei jơnei tơdrong jang tơbôl, tơplih dôm pơkăp jing tơdrong tơlĕch jang, tơmam drăm păng tơring tĕch răt vă pơvih ăn tơdrong hơrih kon pơlei; hơmet 'lơ̆ng ăn sơnong jang pơtoi, lơ̆m noh đei APEC 2027.