Kiơ̆ đơ̆ng yă Chuyên tơroi, mĕ yă ‘noh yă Dương Thị Chín, mĭnh hơnih jang kech mang đei ‘măng rong ‘me kang ƀô̆, ƀô̆ đô̆i hlôi tơroi găh tơdrong kon pơlei ƀôh mĭnh lŏk pơsat ƀô̆ đô̆i lôch răm lơ̆m sơnăm 1968. Vă ƀlŏk hơdơ̆r hơnih ƀŭ, yă Chín man chih chư đei ƀơm truh hơnih gre păr ayăt prăh ƀô̆ đô̆i. Mă đơ̆ng kơƀang chư pă gan nhên, yă Chuyên oei ƀlŏk hơdơ̆r nơ̆r mĕ chă tơroi păng năm tơroi ăn khul kơdră tơring. Kơtơ̆ng nơ̆r tơbăt, Khul K51,  Hơnih jang Chinh trĭ kơ Ƀô̆ đô̆i dêh char Đắk Lắk iung jang hơdoi hăm rim khul năm tơchă, kôch tơchă păng ƀôh kơting atŭm hăm lơ tơmam drăm. Kơcheh kơting hlôi pơtruh ăn vă khăm hơlen ADN, pơvih pơvăn hơlen băt hơnăn ƀô̆ đô̆i lôch dŏng teh đak. Tơdrong jang đơ̆ng yă Chuyên tơgop lang să jơhngơm đon ‘lơ̆ng lơ̆m bơ̆ jang năm tơchă, kôch akŏm kơting ƀô̆ đô̆i lôch dŏng teh đak, jang kiơ̆ jơhngơ̆m đon “Nhă đak chăm kơ tu”.