Sơng iŏk nơ̆r krao hơvơn đơ̆ng Thủ tướng Lê Minh Hưng, Thủ tướng Cộng hòa Ba Lan Donald Tusk iung năm tơmang teh đak Việt Nam đơ̆ng năr 24-26/10/2026. Pơgê năr 26/10, tơ̆ Hà Nội, đơ̆ng rŏng pơm lêh sơng păng pơma đam, Thủ tướng Lê Minh Hưng hăm Thủ tướng Ba Lan Donald Tusk hlôi vang chĕp pơgơ̆r ‘măng hop akom hơdoi, tơbăt hơdăh pơm hơtŏk tơgoăt tơgoăl ƀar teh đak jing Jang hơdoi gĭt kăl. Tơdrong pơm hơtŏk tơgoăt tơgoăl tơƀôh hơdăh kơrŭn đĭ ai đơ̆ng kơdră chĕp pơgơ̆r ƀar teh đak lơ̆m atŏk kơtang lui yom dih băl kơjăp chinh trĭ, pơih să jang hơdoi ‘lơ̆ng păng iung jang iŏk đei jơnei dôm tơdrong đei lơ̆m teh đak. Ƀar teh đak gô hơnơ̆ng atŏk kơtang ăn khul kơdră kơpal tơƀơ̆p pơma dơnuh dih băl, atŏk kơtang iung jang hơdoi ƀar păh rim hơnih bơ jang, khul jang păng tơring; adoi pơih să jang hơdoi lơ̆m rim ‘măng hop akŏm lơ pang, mă kăl tơ̆ Liên hợp quốc. Lơ̆m tơdrong jang mŭk drăm, mơdro sa păng tơmơ̆t jên jang, Việt Nam păng Ba Lan lăng truh atŏk kơtang jang hơdoi ‘moi kiơ̆ trong Tơdrong tơchơ̆t Mơdro sa hiôk hian Việt Nam - Jơnŭm atŭm châu Âu, pơjing rơvơn ăn hơnih mơdro sa ƀar teh đak. Rim tơdrong kĕ jang đei choh jang sa, kmăi kmŏk pơm tơlĕch tơmam drăm, ŭnh hơyuh, tơplih kơsô̆, trong gre nơnăm, pơgang păng tơmam jang pơgang. Ƀar păh jei lăng kơjăp pơtrŭt kơtang jang hơdoi pơtho pơhrăm, khoa hŏk, joh ayŏ, tơmang pơhiơ̆ păng kon pơlei năm ngôi dih băl; adoi atŏk kơtang iung jang hơdoi lơ̆m rim tơdrong apŭng plĕnh teh, tơring ‘moi kiơ̆ khôi luơ̆t apŭng plĕnh teh păng Tơdrong pơkăp Liên hợp quốc.