Bơ̆ jang kiơ̆ nơ̆r pơtho đơ̆ng Thủ tướng teh đak, Anih chĕp kơ̆l pơgơ̆r khul linh dêh char kơchăng roi tơƀôh ăn Anih vei lăng kon pơlei dêh char păng Anih pơgơ̆r vei lăng kơ kon pơlei dêh char tơlĕch tơdrong jang, vang tơgŭm ăn kon pơlei jăh đei hnam oei ‘nao kơjăp ‘lơ̆ng, năng ‘nâu jĭ tơdrong jang tơm athei pơ ’nhŏ jang hơdrol.

Khul jang tơm ‘nŏh jĭ ƀô đô̆i păng linh dân quân vang chưk hơmet teh, pơm ming hnam, man ‘nao hnam ăn kon pơlei hiong răm lơ đơ̆ng ‘mi tih đak lơ̆p. Lơ̆m kơsô̆ 35 tŏ hnam đei tơlĕch man, đei 6 tŏ hnam man ‘nao păng 29 tŏ hnam pơm hơmet ming, đĭ đăng đei man đang păng pơjao ăn kon pơlei adrol kơ năr hơgăt ngăl. Akŏm đĭ đăng jên man, hơmet ming hlŏh 2,9 ti hlak jên, iŏk đơ̆ng jên dêh char, dôm kơsô̆ jên tơgŭm păng vă jê̆ 2.500 năr jang đơ̆ng đe kăn ƀô̆, linh.