Pơgê hei (23/9), tơ̆ Hnam Quốc hội, Anih chĕp kơ̆l pơgơ̆r Quốc hội mât lơ̆m đơt 2 kơ ‘măng hop akŏm mă 37. Til pơgê hei, Anih chĕp kơ̆l pơgơ̆r Quốc hội tơgop nơ̆r ăn Luơ̆t thuê̆ tĕch răt tơmam gĭt kăl. Tơdrong kăl tơrek ‘nŏh, Luơ̆t Thuê̆ tĕch răt tơmam gĭt kăl chih: thuê̆ tĕch răt tơmam gĭt kăl hăm hơlăk, ƀier gô đei hơtŏk hơnơ̆ng đơ̆ng sơnăm 2026 păng truh sơnăm 2030 gô pŭ thuê̆ truh 100%.

Tơ̆ hop akŏm Tơgop nơ̆r ăn Hla ar chih Luơ̆t thuê̆ tĕch răt tơmam gĭt kăl (oei chih hơmet) yoa Grŭp Anih tĕch mơdro, tơmât jên jang đơ̆ng teh đak đe vang jang hăm Ƀăo bơngai Tang măt kon pơlei pơgơ̆r ‘nao âu, dôm bơngai juăt jang, bơngai dơ̆ng tang ăn anih tĕch mơdro tơlĕch lơ nơ̆r pơma apinh vă vei lăng ‘lơ̆ng tơdrong đei yoa đơ̆ng Khul kơdră teh đak păng anih tĕch mơdro. Kiơ̆ kơ ‘nŏh dôm anih tĕch mơdro lăp đon hăm tơdrong tơchĕng đơ̆ng Đảng păng teh đak mưh tơlĕch trong thuê̆ tĕch răt tơmam gĭt kăl vă vei lăng jơhngâm pran ăn kon pơlei, găn ƀiơ̆ tơdrong răt yoa dôm tơmam pơrăm truh jơhngâm pran, nhen hơlăk, ƀier, hât...