Kiơ̆ roi tơbăt, jăl khei mă I/2026, Phú Quý pơvei jang tŏk ‘lơ̆ng, tơmang lăng sơng vă jê̆ 42 rơbâu ‘nu tơmoi, tĕch mơdro - pơvih pơvăn ‘lơ̆ng hơiă; rôp yâu ka hơdang đei 3.570 tấn, tŏk pơting hăm khei ‘nâu sơnăm hơdrol. Hơmet ming bơ̆jang, tơplih kơsô̆, khŭl lĭnh - vei sơđơ̆ng đei vei kơjăp.

Mă lei anih jang kăl tơnŏk đak dơsĭ, đak ƀlăng, hơmet rơgoh râm rĕk păng vei lăng teh, pơvih pơvăn tơmang lăng oei ưh kơ ‘lơ̆ng. Pơma tơ̆ hop akŏm, Kơdră Anih vei lăng kon pơlei dêh char Lâm Đồng Hồ Văn Mười pơma hơdăh, hăm tơring gĭt kăl Phú Quý, kăl kơ hơmet pơ ‘lơ̆ng dôm tơdrong tơhlăk găh trong nơnăm, tơnŏk đak dơsĭ, ŭnh điên, đak păng cham char; tơgŭm hơdrol hơtŏk tơiung tơdrong jang ka, tơmang lăng, krao hơvơn tơmơ̆t jên jang proh hơmet, jô̆ hơlen anih jang kăl tơ ter đak dơsĭ, cham gre păr, tơnŏk dơ̆ng kơtă lơ̆m jăl jang truh.