Trong xek tơmơ̆t gô đei dêh char tơlĕch jang kiơ̆ jơ̆p jang. Trong pơgơ̆r pơlong tơmơ̆t hŏk lăp jang kiơ̆ hăm rim hnam trương jăl pêng chuyên. Sơnăm hŏk ou, dêh char Lâm Đồng đei hloh 54.800 ‘nu hŏk tro lăm 9; trong pơkăp krao tơmơ̆t hŏk lăm 10 rim hnam trương teh đak kơ dêh char sơnăm hŏk truh ou kơnh ‘noh vă jê̆ 45.000 ‘nu hŏk tro. Lơ̆m ou, rim hnam trương jăl pêng xek tơmơ̆t 42.500 ‘nu hŏk tro; 4 hnam trương jăl pêng chuyên pơlong tơmơ̆t hok vă jê̆ 1.300 ‘nu hŏk tro păng rim hnam trương jăl pêng teh đak rong ‘me xek tơmơ̆t hloh 1.000 ‘nu hŏk tro. Trong xek tơmơ̆t kiơ̆ tơring. Tơ̆ tơring tơtil hăm rim phương, hŏk tro đei chih hơnăn xek tơmơ̆t hŏk tơ̆ hnam trương tơjê̆ ŭnh hnam oei. Khei ‘năr chih hơnăn apĭnh mơ̆t hŏk lăm 10 rim hnam trương teh đak tơ̆ Lâm Đồng đei tơlĕch jang đơ̆ng năr 25 - 30/5 kiơ̆ trong chih hơnăn trư̆k tuyên. Tơdrong xek tơmơ̆t gô đei iung jang đơ̆ng năr 15 - 24/7 păng jang keh đang xek tơmơ̆t hơdrol năr 31/7. Đơ̆ng rŏng ‘noh, rim hnam trương jăl pêng ‘ngoăih hnam trương teh đak, rim hnam trương yăo yŭk thương xuyên, hnam trương pơtho tơdrong jang tơ̆ Lâm Đồng gô pơgơ̆r sek tơmơ̆t păng keh đang hơdrol năr 31/8/2026.