Tơ̆ Hnam kơmăy hơdrĕng ot cheh phe kơ Công ty jang hơdoi Tơmât jên jang păng atŏk tơiung An Thái, dôm kơmăy hơdrĕng, ot cheh phe ƀôt păng cheh phe hach oei bơ̆ jang hơnơ̆ng vă tơtom pơjao tơmam ăn dôm anih tĕch mơdro hơdai lơ̆m apŭng plenh teh.

Ƀok Nguyễn Xuân Lợi, Kơdră chĕp kơ̆l công ty tơm ăn tơbăt, dôm hla ar răt tơmam ƀât blŭng sơnăm đei tĕch đang, tơmam hlôi đei chơ jur tơ̆ tơnŏk duk, pơjing tơdrong ‘lơ̆ng blŭng a vă jang tŏk lơ̆m sơnăm 2026: “Anih tĕch mơdro hơnơ̆ng kơchăng chă hơlen năng, băt hơdăh păng jang kiơ̆ đei yoa ‘lơ̆ng dôm trong jang, tơdrong tơgŭm đơ̆ng teh đak mưh jang xa, pơm tơlĕch tĕch mơdro. 'Nâu jĭ tơdrong 'lơ̆ng, tôch gĭt kăl vă bơ̆n hơnơ̆ng pơih xă anih tĕch mơdro, pơm hơtŏk kơsư̆k pơjei păng jang tŏk pran kơjăp tơ̆ hơnăp kơnh.”

Sơnăm 2025, jên tĕch mơdro tơ̆ teh đak đe đơ̆ng Đắk Lắk đei dang 2,8 ti USD, tŏk vă jê̆ 40% pơting hăm sơnăm adrol, lơ̆m noh tơmam đơ̆ng choh jang xa hơnơ̆ng jing tơmam tơm hăm dôm tơmam đei cheh phe, sầu riêng, ca cao, mắc ca… Tơdrong 'nâu pơjing đei jơhngâm pran vă anih tĕch mơdro hơđơ̆ng jơhngâm yak mât lơ̆m sơnăm jang xa 'nao. Ƀok Nguyễn Tiến Dũng, Phŏ Kơdră chĕp kơ̆l Công ty tơm TNHH MTV tĕch mơdro tơ̆ teh đak đe 2-9 Đắk Lắk (Simexco Daklak) ăn tơbăt, jĭ anih tĕch mơdro kơ teh đak năm hơdrol lơ̆m tơdrong tĕch tơmam đơ̆ng choh jang xa tơ̆ teh đak đe, yak mât lơ̆m sơnăm 2026, anih tĕch mơdro hơnơ̆ng hơtŏk tơdrong jang hơdoi hăm dôm anih jang lơ̆m apŭng plenh teh vă atŏk tơiung cheh phe 'lơ̆ng, pơih xă anih tĕch mơdro păng hơtŏk kơjă ăn cheh phe tơ̆ tơring.

Ƀok Nguyễn Tiến Dũng ăn tơbăt: “Nhôn đei 1 trong jang tôch rơđăh, ‘nŏh jĭ trong jang tŏk găh kơsô̆, hơtŏk tơdrong ‘lơ̆ng ăn kon pơlei jang chŭn mir kŭm nhen rim anih jang lơ̆m trong jang hơdoi đơ̆ng nhôn vă pơjing đei 1 anih jang cheh phe ‘lơ̆ng đơ̆ng Việt Nam tĕch tơ̆ jơ̆p plei teh”.

Kŭm hăm dôm anih tĕch mơdro cheh phe, lơ HTX plei ‘long kŭm ƀôh jang tŏk ‘lơ̆ng. Tơ̆ HTX Xanh Cao Nguyên, xăh Cư Mgar, dêh char Đắk Lắk, gui yoăn hơdrih oei mât lơ̆m pơyan tĕch mơdro tơ̆ teh đak Trung Quốc, Mi păng Canada… Ƀok Nguyễn Văn Thanh Bình, Kơdră chĕp kơ̆l HTX tơroi, kŭm hăm tĕch plei gui yoăn hơdrih tơ̆ teh đak đe, HTX oei tơlĕch jên man hnam kơmăy pơm tơmam vă atŏk tơiung dôm tơmam đei pơm hơmet ‘lơ̆ng.

“Hơdai hăm tĕch plei hơdrih tơ̆ teh đak đe, HTX oei tơlĕch jên man hnam kơmăy vă pơm hơmet tơmam plei ‘long sơ ‘ngieo, sơ̆k kro păng ep đak gui yoăn vă tĕch tơ̆ teh đak đe. HTX kŭm tơlĕch trong pơm hơmet lơ tơmam ‘lơ̆ng đơ̆ng plei gui yoăn nhen tơmam krăl, ep đak vă pơm hơtŏk kơjă tơmam đơ̆ng choh jang đei. Vă gơ̆h đei măh mai tơmam, HTX oei hơtŏk tơdrong jang hơdoi hăm dôm bơngai jang păng pơih xă tơring pơtăm gui yoăn kiơ̆ nơ̆r pơtho pơtăm 1 ƀôt, pơvih ăn tơdrong pơm tơlĕch, tĕch mơdro đunh đai tơ̆ teh đak đe".

Kŭm hăm hơtŏk đei kơjă, jang đei tơmam lơ păng ‘lơ̆ng vă tĕch tơ̆ teh đak đe, dôm anih tĕch mơdro tơmam đơ̆ng choh jang xa tơ̆ Đắk Lắk kŭm jang tŏk pran ‘lơ̆ng tơdrong pơm hơmet tơmam. Kiơ̆ ƀok Hoàng Danh Hữu, Kơdră chĕp kơ̆l Khul vei lăng, Công ty TNHH tĕch mơdro, pơvih pơvăn Ê Đê, pơm hơmet tơmam ‘lơ̆ng tơgŭm ăn dôm anih tĕch mơdro pơm đei lơ tơmam, chă đei anih tĕch mơdro ‘nao, tưk tơiung hơnăn tơmam ‘lơ̆ng. Dôm anih tĕch mơdro hơpơi ‘meh gơ̆h jang xa lơ ƀiơ̆ hăm dôm anih jang nai kiơ̆ đơ̆ng tơlĕch trong tĕch mơdro.

Ƀok Hoàng Danh Hữu pơma: “Nhôn kŭm tôch hơpơi ‘mĕh Anih tơm vei lăng jang kơmăy, tĕch mơdro hơtŏk trong tĕch mơdro hơdai 2 pang hăm dôm teh đak dang ei bơ̆n đei tơdrong pơvei jang hơdoi gĭt kăl păng jang hơdoi tôm tơdrong, vă hơtŏk tơdrong tĕch tơmam lơ̆m noh đei cheh phe đơ̆ng Việt Nam tơ̆ dôm teh đak âu tơplih ăn lăp pơma đam găh dôm tơdrong tơchơ̆t tĕch mơdro hiôk hian atŭm,‘nŏh bơ̆n pơgơ̆r jang hơdoi 2 pang lơ ƀiơ̆ vă gơ̆h đei trong jang, tơdrong tơgŭm lăp 'lơ̆ng."

Sơnăm 2026, Đắk Lắk tơlĕch đon pơhnŏng tĕch tơmam tơ̆ teh đak đe đei hlŏh 2,9 ti USD, akŏm jơhngâm pơih xă anih tĕch mơdro păng hơtŏk kơjă tơmam đơ̆ng choh jang xa đei kiơ̆ đơ̆ng pơm hơmet ‘lơ̆ng tơmam. Hăm jơhngâm đon bơ̆ jang tôch hơiă đơ̆ng blŭng sơnăm, tơpôl anih tĕch mơdro tơmam đơ̆ng choh jang xa tơ̆ tơring oei tơƀôh hơdăh đon pơhnŏng khŏm pơm hơtŏk tơdrong ‘lơ̆ng, pơjing hơnăn tơmam păng hơnhăk tơmam đơ̆ng choh jang xa đei Đắk Lắk lĕch truh tơ̆ jơ̆p anih tĕch mơdro lơ̆m apŭng plenh teh. Tơdrong ‘nâu vang tơgop pơm hơtŏk iŏk yoa ăn kon pơlei, anih tĕch mơdro păng tưk tơiung tơdrong jang mŭk drăm, tơpôl kơ dêh char, năm truh tơdrong jang tŏk 2 kơsô̆ lơ̆m chăl ‘nao./.