Hăm hơnăn “Gia Lai - Bri kơdrơ̆ng hơsơ̆ng truh đak dơsĭ rơgoh ‘lơ̆ng”, Sơnăm Tơmang pơhiơ̆ teh đak 2026 hơnhăk nơ̆r tơbăt găh tơdrong tơgoăt dih băl ƀar păh bri kông hăm tơring đak dơsĭ, ƀar păh bri kông ‘lơ̆ng rŏ păng tơdrong oei sa hơ iă kơ rim hơdrĕch hơdrung. ‘Nou jing jơ ‘năr vă Gia Lai tơƀôh ăn apŭng plĕnh teh dôm tơdrong kăp gĭt tơdrong joăt bri kông păng kon bơngai ‘lơ̆ng hơ iă kơ tơring groi teh Tây Nguyên. Lơ̆m sơnăm 2026 tơchĕng lăng gô đei 244 tơdrong pơgơ̆r joh ayŏ kơdŏ soang, tơmang pơhiơ̆ păng đă ƀŏng lŏng tơplŏng kơdou đei pơgơ̆r hơnơ̆ng tơ̆ Gia lai păng lơ tơring lơ̆m teh đak. Tơdrong kăl ‘noh Pơgơ̆r pơm lêh blŭng a Sơnăm Tơmang pơhiơ̆ teh đak - Gia Lai 2026, gô đei pơgơ̆r lơ̆m năr 28/3 tơ̆ phương Quy Nhơn.Lơ̆m giĕng lêh pơgơ̆r blŭng a, dêh char Gia Lai gô pơgơ̆r Hop akoưm pơtrŭt tơmơ̆t jên jang sơnăm 2026, tơchĕng lăng gô vă pôk ăn Tơdrong tơchơ̆t trong jang tơmơ̆t jên jang păng kĭ pơkăp jang hơdoi ăn lơ tơdrong vă jang găh rim tơdrong jang choh jang sa, ŭnh hơyuh, trong hnam, mơdro sa - tơmang pơhiơ̆. ‘Ngoăih kơ ‘noh, lơ tơdrong jang tơmang pơhiơ̆ ‘măn ăn tơmoi jei gô đei pơgơ̆r nhen: Tơdrong pơgơ̆r tơƀôh tơbăt chehphe tơklep hăm tơmang hiơ̆ choh jang sa; tơƀôh tơbăt ‘nhĕm ‘nhot tơring; rim ‘măng pơgơ̆r pơlong đă ƀŏng lŏng tơplŏng kơdou atŭm hăm lơ tơdrong pơgơ̆r joh ayŏ kơdŏ soang ‘lơ̆ng rŏ.