Tơ̆ jơ bơ̆ jang, Kơ iĕng Kơdră chĕp pơgơ̆r Kuô̆k hô̆i hôn bơnê tơdrong bơ̆ jang đơ̆ng tơring lơ̆m bơ̆ jang hơmet ăn. Rim tơdrong jang đei tơlĕch jang ‘lơ̆ng, kơjăp, sơđơ̆ng ăn trong tơlĕch jang kiơ̆ tơdrong Tơchơ̆t; bơ̆ jang pơdrơ̆ng dih băl, hơmet ăn khul kơdră đei iung jang ƀlep tơdrong tơchơ̆t; tơdrong sơđơ̆ng đei iung jang kơtang, pơjing rơvơn ăn năr pôk rơih. Găh tơdrong bơ̆ jang truh ou kơnh, Kơ iĕng Kơdră chĕp pơgơ̆r Kuô̆k hô̆i athei tơring hơnơ̆ng tơlĕch jang kiơ̆ mă tôm tong rim hla bơar pơrô̆ jang đơ̆ng Trung ương păng Jơnŭm pôk rơih Teh đak; hơmet ăn ‘lơ̆ng rim tơdrong vă năr pôk rơih tơpă jing năr lêh kơ kon pơlei. Mă kăl ‘noh atŏk kơtang pơtho ming, pơtho tơbăt tơdrong bơ̆ jang ăn rim hơnih chĕp pơgơ̆r pôk rơih, khul vei lăng pôk rơih; adoi hơmet ‘lơ̆ng hơnih tăh hla mă trŏ lăp trong mơ̆t, trong lĕch păng pơklep mă tôm hla bơar chih hơnăn bơngai tăh hla mă tôm tong, mă hơdăh.