‘Măng pơgơ̆r đei pơgơ̆r lơ̆m khei ‘năr Việt Nam ‘nao pơgơ̆r keh đang Hop akŏm tih Kơdră tang măt lơ̆m teh đak ‘măng mă XIV kơ Đảng păng Việt Nam – EU đei atŏk kơtang tơgoăt tơgoăl jang hơdoi gĭt kăl tôm tong. Thủ tướng sơkơ̆t hơdăh, EU păng rim teh đak lơ̆m khul jĭ dôm teh đak jang hơdoi git hloh lơ̆m trong jang tơbôl kơ Việt Nam; tơdrong pơjing trong tơbôl ‘nao tơƀôh hơdăh tơdrong lui yom dih băl chinh trĭ roi năr roi kơtang păng pơjing hơyak pran vă pơih să hloh dơ̆ng jang hơdoi lơ̆m rim tơdrong. Hơlen găh tơgoăt tơgoăl Việt Nam – EU, Thủ tướng pơma tơbăt lăp đon tơ̆ hơnăp dôm hơyak atŏk tơ iung ‘lơ̆ng hơ iă đơ̆ng rŏng 35 sơnăm tơgoăt tơbôl (1990–2025). Tơcdrong tơlĕch jang jơnei Tơdrong tơchơ̆t Mơdro sa hiôk hian Việt Nam – EU (EVFTA) hlôi tơgop ba EU jing khul jang hơdoi tih mă 4 kơ Việt Nam, lơ̆m mă Việt Nam jĭ teh đak jang hơdoi tih hloh kơ EU lơ̆m ASEAN. Jang hơdoi lơ̆m vei lăng sơđơ̆ng teh đak, tơplih tŏ ‘mi kial, choh jang sa, tư phap, khoa hŏk-kmăi kmŏk, cham char ... jei tŏk bŏk đei pơih să hăm lơ tơdrong jang hơ iă. Thủ tướng athei ƀar păh hơnơ̆ng atok kơtang jang hơdoi kiơ̆ trong vang đei iŏk yoa, tơlĕch jang kiơ̆ jơnei EVFTA, pơtrŭt kơtang mơdro sa păng hơtŏ hơnơ̆ng, pơjing rơvơn ăn gơh tĕch mơdro dih băl păng sơđơ̆ng đei iŏk yoa sa hơpăh trŏ lăp kơ hơnih mơdro sa ƀar păh.