Anih vei lăng kon pơlei dêh char Gia Lai ‘nao tơlĕch ăn tơdrong tơchơ̆t drơ̆ng ăn Kŏng ti Tơmơ̆t jên jang păng Vei lăng hnam tih Ion Complex (pơlei tơm Hà Nội) jĭ anih tơmơ̆t jên jang bơ̆jang kiơ̆ Tơdrong jang pơm Cham golf Đak Đoa, hăm akŏm jên pơm hloh 1.150 ti hlak jên. Tơdrong jang pơm Cham golf Đak Đoa đei tơlĕch jang tơ̆ Hơnih jang hơdai Đak Đoa, khei ‘năr bơ̆jang đơ̆ng jăl khei mă I-2026 truh jăl khei mă IV-2029, khei ‘năr bơ̆jang 50 sơnăm.

Anih vei lăng kon pơlei dêh char Gia Lai pơjao kơ Anih vei lăng găh Choh jang sa păng Cham char pơgơ̆r dăr hơlen, bơ̆jang kiơ̆ pơm bơ̆n hla ar pơjao teh, ăn thuê teh ƀlep tơdrong hơgăt khôi luơ̆t; hơdai hăm ‘noh jang hơdai hăm Anih vei lăng Jên hu hơlen lăng hơdăh kơjă mŭk tơmam tơklep hăm teh, lơ̆m noh đei teh bri hơngo păng dôm jên jang ƀơm truh mă anih tơmơ̆t jên jang hlôi nôp jên ƀơ̆t đei iŏk jang. Dôm anih jang kơpal, anih jang ƀơm truh păng Anih vei lăng kon pơlei xăh Đak Đoa đei hơnăp jang hơdai, dăr hơlen, pơtho anih tơmơ̆t jên jang pơm tôm bơ̆n hla ar găh tơmơ̆t jên jang, teh, ming man, chĕng hơmet teh, vei lăng cham char, tang găn ŭnh sa pĭt ŭnh sa, vei sơđơ̆ng tơpôl.