Kiơ̆ hla bơar chih tơbăt bơ̆ jang, jang kiơ̆ ‘Măng iung jang “500 măng năr” tơchă, kôch akŏm păng sơkơ̆t băt hơdăh hơnăn ƀô̆ đô̆i lôch dŏng teh đak oei tim mă tôm kơtơ̆ng ang kơnăl, truh dang ei lơ̆m teh đak hlôi kôch akom đei 1.080 kơting ƀô̆ đô̆i lôch dŏng teh đak. Hơnih tơm Kŏng ang hlôi dăr lăng, chih tơmơ̆t, hơlen hơdăh kơtơ̆ng ang kơ hrĕng rơbou kơting ƀô̆ đôi lôch dŏng teh đak tim mă băt hơdăh hơnăn; iung jang iŏk khăm hơlen ADN tơ̆ lơ tơring păng sơkơ̆t băt hơdăh hơnăn 23 kơting ƀô̆ đô̆i lôch dŏng teh đak. Khul kơdră Teh đak hlôi pơjing Trong vă jang pơgơ̆r iung jang tơbăt 80 sơnăm Năr Ƀô̆ đô̆i rơka-Lôch dŏng teh đak; tơ iung pơjing Tơdrong vă jang hăm akŏp kon jên jang dang 13.000 ti hlak jên vă jang tơdrong jang pôk ăn, vei lăng năng tông dôm bơngai đei iok yoa ăn kĕch mang. Iung pơma pơtôch Hop akŏm, Kơ iĕng Thủ tướng Phạm Thị Thanh Trà pơma hơdăh, tơbăt 80 sơnăm Năr Ƀô̆ đô̆i rơka-Lôch dŏng teh đak jĭ tơdrong pơgơ̆r tôch gĭt kăl găh chinh trĭ, chăl sơnăm, tơbăt hơdăh jơhngơ̆m đon ‘mêm kơ eng dih băl lơ̆m teh đak; jĭ jơ ‘năr vă kơ Đảng, kon pơlei, ƀô̆ đô̆i kŏng ang ƀlŏk hơdơ̆r, pôk pơ ư hôn bơnê dôm tơdrong hiong răm, plang ăn tih tên đơ̆ng dôm bơngai đei iŏk yoa ăn teh đak. Kơ iĕng Thủ tướng athei pơgơ̆r rim tơdrong pơgơ̆r tơbăt sơđơ̆ng ‘lơ̆ng, trŏ lăp, đei trong lang să tơdrong ‘lơ̆ng rŏ; tơklep kơjăp hăm tơdrong vei lăng ăng tông ‘lơ̆ng hơ iă găh tơdrong oei sa ăn unh hnam đei bơngai lôch dŏng teh đak, ƀô̆ đô̆i jĭ jăn, rơka păng bơngai đei iŏk yoa ăn teh đak.