Bí thư Đảng dêh char Đắk Lắk hôn bơnê kơtang dôm tơdrong tơgop đơ̆ng Radiô Nơ̆r Pơma Viêt Nam (VOV) pơma atŭm păng Hơnih bơ̆ jang oei lơ̆m tơring Tây Nguyên pơma hơdrô̆ hăm bơ̆ jang tơ iung pơjing Đảng, tơ iung pơjing khul jang chinh trĭ păng Mŭk drăm-tơpôl kơ dêh char Đắk Lắk lơ̆m khei năr ou ki. Ƀok akhan, rim tơdrong rapor, kơtơ̆ng ang, ƀai chih đơ̆ng VOV hlôi tơbăt hơdăh tôm tơdrong lơ̆m tơdrong jang mŭk drăm-tơpôl, tơdrong hơrih sa kơ kon pơlei rim hơdrung lơ̆m dêh char; yak hơdoi bơ̆ jang tơ iung pơjing Đảng, tơ iung pơjing khul jang chinh trĭ păng pơrô̆ chĕp pơgơ̆r. Hăm tơdrong rơvơn kơ tơdrong jang rapor pơre nơ̆r, VOV hlôi ba trong bơ̆ jang đơ̆ng Đảng păng Teh đak truh tơjê̆ hăm tơring hơtăih yăih, tơring kon kông; tơgop hơmet pơ ‘lơ̆ng tơgoăt tơgoăl dih băl kơjăp lơ̆m kon pơlei, vei kơjăp sơđơ̆ng dơ̆ng kơjăp chinh trĭ-tơpôl lơ̆m dêh char. Bí thư Đảng dêh char Đắk Lắk ‘meh vă VOV hơnơ̆ng iung jang kiơ̆ ‘lơ̆ng dôm tơdrong jang hlôi jơnei, atŏk kơtang tơƀôh tơbăt kơtơ̆ng ang găh bơ̆ jang chĕp pơgơ̆r, pơrô̆ jang đơ̆ng dêh char; tơƀôh tơbăt jơhngơm đon hơpơi ‘meh vă đơ̆ng kon pơlei; lang să rim trong jang hơ iă, tơdrong jang iŏk đei jơnei păng yak hơdoi hăm dêh char lơ̆m trong atŏk tơ iung.