Kiơ̆ đơ̆ng ƀok Tiến, ‘nou jĭ dôm xem bri brăh hui kơđei đei hơnăn lơ̆m Kơsơ̆p hla bơar ƀrê Việt Nam păng apŭng plĕnh teh, găh lơ̆m khul kăl vei lăng năng tông kơjăp. Dang ei khul bơ̆ jang tŏk bŏk iung jang dăr lăng hơlen, chih jô̆ vă băt hơdăh đei dôm tŏ adoi nhen xem bri ou đei dôm khul lơ̆m bri vei lăng năng tông ou. Kiơ̆ đơ̆ng rim bơngai jang vei lăng năng tông, tơdrong đei ƀôh xem bri brăh tih tên nhen krŭ păng rơmo bri jĭ tơƀôh hơdăh tơdrong gĭt kăl bri kơdrơ̆ng ‘lơ̆ng hơ iă. ‘Nou jĭ dôm xem bri joăt hơrih sa lơ̆m bri să, ‘ngiĕt sa măh mai păng hoei đei tơdrong pơrăm. Kơ yuơ lơ loh, tơdrong đei ƀôh rơmo bri tơ̆ Ea Sô tơbăt ăn bri brăh tơ̆ ou tŏk bŏk đei vei lăng năng tông ‘lơ̆ng, adoi sơkơ̆t hơdăh đei lơ bri ‘long git kăl lơ̆m bro bri vei lăng năng tông.