Chơt hơ iă ‘nă hal, hưch hanh hơmanh bơnê- ‘noh jĭ dôm jơhngơ̆m đon ƀôh hơdăh đơ̆ng kon pơlei găh tơdrong tơplih ‘nao kơ trong nơnăm - “muh măt” kơ teh đak lơ̆m dôm sơnăm tơjê̆ ou. Rŏ năng vă sơkơ̆t hơdăh: tim lăh đei trong nơnăm kơ Việt Nam đei tơmơ̆t jên jang lơ, ming man keh đang tĕnh koăng păng kơrŭn đĭ ai nhen chăl hrei ou. Trong tơm Tu-Pơbăh păh Hơlĕch roi năr roi đei jing nhen “kơting kơdŭ” kơ tơdrong jang mŭk drăm. Dơnŏk duk đak dơsĭ jrŭ tơ̆ Hải Phòng, pơlei tơm Hồ Chí Minh, đei ming hơmet, pơih să, sơđơ̆ng ăn tơdrong mơ̆t lĕch chơ tơmam drăm tĕch răt hăm teh đak đe. Rim cham gre păr tơm đei tơmơ̆t jên ming man ‘lơ̆ng, lơ̆m ou Cham gre păr apŭng plenh teh Long Thành- hơnih ming man tơm teh đak-tŏk bok tơlĕch jang kơtang, pơkă ăn đei jing jơhngơ̆m pran kơtang ăn tŏk kơtang kơ tơring jang mŭk drăm păh Pơbăh.

Atŭm hăm trong nơnăm, hơnih jang ming man ŭnh hơyuh jei đei atŏk tơ iung kơtang. Lơ trong vă jang ŭnh hơyuh kial, ŭnh hơyuh jơ̆ng ‘năr đei tơmơ̆t iŏk yoa. Tơlei ŭnh hơyuh tơm teh đak đei tơmơ̆t jên ming hơmet kiơ̆ trong gơh hơgei hloh, trŏ lăp ăn tơdrong ‘meh vă atŏk tơ iung mŭk drăm kơsô̆, mŭk drăm rơgoh ‘lơ̆ng. Atŭm hăm ‘noh, lơ̆m khei ‘năr tơ iung pơjing tơring kơdrơ̆m gơh hơgei, kmăi kmok kơsô̆, kmăi kmŏk viễn thông jơ̆p jang đei atŏk kơtang, pơjing hơyak kăl ăn Khul kơdră teh đak kơsô̆, mŭk drăm kơsô̆, tơpôl kơsô̆.

5 sơnăm ou ki, teh đak akŏm tơmơ̆t jên jang, lơ̆m ou 80% akŏm lơ̆m trong nơnăm. Mă kăl hloh lơ̆m sơnăm 2025 ou, teh đak tơmơ̆t jên jang tơmơ̆t truh 7% GDP. Lơ̆m khei ‘năr kon jên hu oei kơƀăh kơƀôch, kơsô̆ kon jên jang đơ̆ng teh đak tơmơ̆t jang ‘măn ăn trong nơnăm hlôi sơkơ̆t hơdăh trong tơlĕch ăn kơtang, vă iung jang kiơ̆ trong tơlĕch ăn atŏk kơtang trong nơnăm - mĭnh lơ̆m 3 “hơyak kơtang” kăl đei chih tơmơ̆t lơ̆m Tơdrong tơchơ̆t kơ Đảng.

Mă kăl hloh lơ̆m jăl jang Hop akom tih ‘măng mă XIII ‘noh tơdrong tơplih ‘nao keh kong găh trong bơ̆ jang tơmơ̆t jên jang trong nơnăm. Đơ̆ng mă găh lơ gơnang lơ̆m kon jên bơ̆ jang Teh đak, Việt Nam hlôi atŏk kơtang pơih să trong ăn lơ̆m khul kon pơlei păng khul teh đak đe vang tơmơ̆t jên jang. Jĭ hơnih jang vang iung jang lơ tơdrong vă jang trong nơnăm tơm kiơ̆ trong jang hơdoi hăm teh đak, ƀok Phan Hữu Duy Quốc, Hơnih tơm Kŏng ty Xây dựng Số 1, tơbăt:“ Lơ̆m tơdrong jang ming man, hăm kmăi kmŏk hle, rim hơnih ming man mơmat tat, dôm hơnih ming man kơjung hloh kơ Việt Nam dăh mă dôm gơng găn đak dơsĭ tih hloh, hơnih mơdro sa lơ̆m teh đak gơh jang đĭ bơih. Tơdrong atŏk tơ iung jĭ tôch kơ ‘lơ̆ng păng ling lang gơ̆h sơng iŏk jang dôm tơdrong jang tih anai”.

Ƀôh hơdăh dơ̆ng đơ̆ng lơ hơnih ming man tơm teh đak lơ̆m khei năr ou ki hlôi tơƀôh hơdăh ăn tơdrong hơ iă kơ trong lăng kăl đơ̆ng Đảng găh atok tơ iung trong nơnăm ‘lơ̆ng hơ iă, gơh hơgei, hơtŏ hăm rim teh đak lơ̆m tơring. Tiến sỹ Nguyễn Phương Bắc - Sơ̆ jang Kơdră chĕp pơgơ̆r Hơnih tơm chă tơchĕng hơlen atok tơ iung mŭk drăm-tơpôl dêh char Bắc Ninh, hơlen:“Teh đak tơmơ̆t jên jang jăl mă ou akŏm lơ̆m dôm tơdrong jang tơm, mă kăl rim tơdrong vă jang tih lơ̆m tơring, pơih să cham char atŏk tơ iung. Bắc Ninh- Bắc Giang lăp đơ̆ng rŏng ƀar dêh char hơgrop jing mĭh ‘noh ‘moi kiơ̆ trong so ‘noh tơdrong tơƀưh dih băl kơ rim tơring groi kông găh Tu hăm tơring tơmăn đak kroong Hồng.

Mơ̆t lơ̆m chăl hle, trong vă pơjing Hla bơar chih tơbăt Tơdrong bơ̆ jang Chinh trĭ pơtruh ăn Hop akom tih ‘măng mă XIV hơnơ̆ng sơkơ̆t hơdăh: atŏk kơtang trong hnam hơnơ̆ng jing mĭnh hơyak kăl hloh kơ atŏk tơ iung teh đak. Trong proh hơmet đei trŏ lăp ‘lơ̆ng hơ iă hloh, iŏk atŏk tơ iung tơring jing tơdrong tơm, atŏk kơtang tơƀưh dih băl tơring tơrang, tơdrong jang. Trong tơlĕch ăn ưh khan tơ iung pơjing dơ̆ng lơ hơnih ming man, mă pơjing đei trong nơnăm ‘lơ̆ng gơh hơgei păng kơjăp, đơ̆ng noh pơm hơtŏk kĕ pơjei teh đak, pơm hơtŏk kơtang hơnih dơ̆ng kơ Việt Nam lơ̆m tơring păng lơ̆m plei teh. 

Bơngai joăt jang hơlen Mŭk drăm, giáo sư, tiến sỹ Hoàng Văn Cường- Kơdră jang lơ̆m Hơnih bơ̆ jang Jên hu-Hơnih mong jên bơ̆ jang kơ Kuŏk hô̆i hơlen hơdăh, trong jang ‘nao lơ̆m hơvơn tơmơ̆t jên jang trong nơnăm đei ƀôh hơdăh hloi lơ̆m rim tơdrong vă jang tơm đei iung jang hrơ̆p mĭnh ‘măng lơ̆m sơnăm ou.“Sơ̆ bơ̆n lăp hơvơn găh lơ lơ̆m tơdrong ming man trong ‘nao, mă lei truh dang ei bơ̆n lăng ƀôh tơdrong đei iŏk yoa kơ hăp gơh iung jang hloi lơ̆m rim tơdrong jang ou to. Kơ yuơ lơ loh, bơ̆n kăl pơih să trong jang hơdoi teh đak hăm kon pơlei vang tơmơ̆t jên jang lơ̆m rim tơdrong jang kăl găh jang pơgang, găh pơtho pơhrăm, rim tơdrong jang joh ayo kơdŏ soang, đă ƀŏng lŏng tơplŏng kơdou vă pơjing đei tơdrong atŏk tơ iung kơtang”.

Lăng dơ̆ng jăl jang Hop akŏm tih ‘măng mă XIII, trong iung jang atŏk kơtang trong nơnăm ou to hlôi pơjing đei hơyak pran kơtang ăn chăl atŏk tơ iung ‘nao. Rim jăl trong gre rĕnh đei pơm tơƀưh kơjung hloh dơ̆ng, mĭnh cham gre păr, dơnŏk duk đei pơih să,rim hơnih kơdrơm gơ̆h hơgei đei iung jang ... hlôi păng tŏk bŏk jang kiơ̆ đei tơdrong hơpơi ‘meh vă găh mĭnh Việt Nam atok tơ iung tĕnh koăng, kơjăp ‘lơ̆ng. ‘Nou jĭ hơyak tih tên, pơjing đei hơyak pran vă teh đak kĕ yak mơ̆t lơ̆m jăl trong atŏk tơ iung ‘nao, pran kơtang, hơnuk hơnoa lơ̆m dôm chăl đơ̆ng rŏng.