Bơngai M’nông tơ̆ xah Quảng Trực, dêh char Lâm Đồng hơnơ̆ng pơ-ư pơ-ang kơ pơlei pơla jĭ tơring kăng kư̆ kăch mang. Tơrĕk truh tơring sơlam ou, dôm sơnăm ou ki, Tơdrong Tơchơ̆t jang kơ teh đak gah tơjur hin dơnuh kơjăp sơđơ̆ng hlôi đei asong ming man keh đang trong nơnăm, pơnơ̆ đak; atŭm hăm tơdrong jang sut lê̆ hnam pơgia, hnam hyah hyok, tơgŭm ăn kon pơlei sơđơ̆ng pơm jang. Yă Thị Brao, bơngai đei kon pơlei lui yom tơ̆ pơlei Bu Prăng 1, xah Quảng Trực ăn tơbăt, kon pơlei M’Nông hơnơ̆ng chĕp vei tơdrong juăt jue kăch mang, tơguăt tơguăl tơ-iung pơjing pơlei pơla roi năr roi pơdrŏng 'lơ̆ng rŏ: “Ƀơ̆t sơnăm 'nao, inh hơpơi 'meh kon pơlei grăng hơkou jăn ling lang, tơguăt tơguăl 'mêm kơ-eng, tơgŭm dih băl, ưh đei tơklah chere dih băl ôh, atŭm hơdrin hơtŏk pơm jang păng vei răk tơƀăk mong joh ayŏ kơ pơlei pơla. Pơlei Bu Prăng 1 nhôn noh tơring kăng kư̆ kăch mang, đơ̆ng sơ̆ khơ̆ dang ei kon pơlei hơnơ̆ng vei răk tơƀăk mong tơdrong 'lơ̆ng joh ayŏ juăt jue. Tơdrong hơrih kon pơlei roi năr roi sơđơ̆ng, kon pơlei tơrĕk chă hơvơn kon hơ-ioh pơ-'nam hŏk pơhrăm, hŏk hơlen gah khua hŏk ki thuơ̆t, tơmơ̆t yua lơ̆m tơdrong pơm jang vă hơtŏk pơyua lơ hloh hăm tơm kơsu, kaphê. Kiơ̆ đơ̆ng noh, tơgop tơ-iung pơjing tơdrong hơrih roi năr roi phĭ tơtŏ dơnŏ 'lơ̆ng”.

Kon pơlei Bahnar tơ̆ xăh Ia Băng, dêh char Gia lai, sơng pơyan Puih mak ‘nao Bính Ngọ hăm ƀĕnh jơhngâm đon chơt hơiă yoa đơ̆ng tơdrong arih xa tơplih ‘nao ‘lơ̆ng rŏ. Đơ̆ng lăp pơm jang chŭn na ƀa đak đĕch, hrei ‘nâu kon pơlei hŏk iŏk trong jang xa ‘nao, jang kiơ̆ khoa hŏk ki thuơ̆t mưh rong kon tơrong, pơtăm ‘long kăp gĭt... hơnhăk ba iŏk yoa tôch lơ. Trong, unh điên, hnam trưng đei teh đak man hơmet kơjăp ‘lơ̆ng, lơ unh hnam răt đei gre ôtô, gre choh, kơmăy kơmŏk pơyoa ăn tơdrong choh jang xa păng arih xa... Tơdrong arih xa phĭ tơtŏ dơnŏ ‘lơ̆ng, đon lui kiơ̆ Đảng, Teh đak roi kơjăp.

Lăng ƀôh tơdrong tơplih ‘nao ‘lơ̆ng hơiă âu, ƀok Đư̆nh, oei tơ̆ plei Biă Tih, xăh Iă Băng, pơma: “Dang ei, gơnơm đơ̆ng đei cheh phe, yă cheh phe tŏk, lơ bơngai tơ̆ pơlei pơla răt đei bơ̆n ôtô, gre choh, hơdrô̆ gre honđa ‘nŏh rim hnam đei ngăl, hnam dôm ‘nu ‘nŏh đei dôm tong hloi. Tơdrong arih xa dang ei hiôk ‘lơ ‘lŏ, tơdrong ‘nâu gơnơm đơ̆ng hŏk kiơ̆ bơngai Yoăn kơna tơdrong arih xa gơ̆h hiôk jơnap thoi âu.”

Tơ̆ xah Ngọk Tụ (dêh char Quảng Ngãi), ‘nhŏng A Xương, bơngai Xơ Đăng, jĭ đảng viên mơlôh, Kơdră jơnŭm jang gah Măt trâ̆n adoi jang Kơdră Khul vei sơđơ̆ng tơpôl thôn Đăk Pung. ‘Nhŏng ăn tơbăt, thôn pơlei hơtŏk tơ-iung kơjăp sơđơ̆ng gơnơm dar deh tơplih đon tơchĕng, trong pơm jang; pơm kiơ̆ tơnăp tơchơ̆t tơlĕch đơ̆ng Đảng, khôi luơ̆t đơ̆ng Teh đak; tơguăt tơguăl, tơgŭm dih băl lơ̆m tơdrong hơrih.

A Xương ăn tơbăt: “Dang ei, kon pơlei lơ̆m tơring adoi đei tơrĕk hăm lơ kơtơ̆ng ang ‘nao, tơplih kơmăi kơsô̆... Ah mă đei tơchơ̆t đơ̆ng Teh đak, nhôn tơroi tơbăt ăn kon pơlei hŏk hơlen gah kơmăi kơsô̆, trong chih tơbang dư lĭu gah tơdrong hơrih xa kơ kon pơlei, pơtho kon pơlei hlôh vao păng iŏk yua kơmăi kơmŏk ‘nao, iŏk yua app VNeID, pơtho kon pơlei ƀônh ƀŏ hloh lơ̆m tơdrong tơrĕk hăm dôm tơchơ̆t tơgŭm đơ̆ng Teh đak gah kơtơ̆ng ang, hla bar chih gah kơdih po, unh hnam... Inh adoi sô̆ hơ-iă dang ei lơ unh hnam lơ̆m thôn pơlei hlôi băt “tơplih đon tơchĕng, trong pơm jang”, khĭn tơplih hơdrĕch ‘long pơtăm ưh đei yua lơ lơ̆m groi teh mir vă pơtăm ‘long kŏng ngĭp đei kơjă kăp hloh, nhen kơsu, kaphê păng minh ƀar ‘long pơtăm nai. Kon pơlei drơ̆ng lăp, akŏm jang xa hơtŏk jang vă pơm pơdrŏng”.

Hơiă hăm tơdrong arih xa tơplih roi ‘lơ̆ng, yă Nay H’Thu, Phŏ Bí thư chi ƀô̆ plei Tong Sê, xăh Ia Pa, dêh char Gia Lai, čhôk ‘nă akhan, đảng viên athei hơnơ̆ng năm hơdrol, jang mă tơnăp lơ̆m rim tơdrong vă pơlei pơla roi đunh roi phĭ tơtŏ dơnŏ ‘lơ̆ng: “Sơnăm so tôch, sơnăm ‘nao truh bơih, tơdrong hơpơi ‘mĕh đơ̆ng inh ‘nŏh unh hnam ling lang liĕm kâu, pran jăng, hiôk chơt. Inh hơpơi ‘mĕh đe kon mon adrin hŏk pơhrăm vă ning mônh kơnh jing bơngai đei yoa ăn tơpôl. Kơdih kâu inh hơnơ̆ng tơtă ăn kơdih kâu athei arih xa mă ‘lơ̆ng, hue lăng tơ̆ hơnăp, tơƀôh trong chong glung ăn kon pơlei, vang choh jang, atŏk tơiung mŭk drăm, pơjing tơdrong arih xa roi ‘lơ̆ng rŏ ƀiơ̆.”

Tơroi kơ tơdrong xa Têt, ƀok Y Tloi Niê, Kơdră pơlei Čư̆ Păm, xah Dăng Kang, dêh char Đăk Lăk ăn tơbăt, sơnăm ou ki kon pơlei lơ̆m pơlei ƀơm lơ tơnap tap kơyuơ đơ̆ng tŏ ‘mi kial pơm ăn. Đei tơdrong tơgŭm đơ̆ng Teh đak, kon pơlei hlôi sơđơ̆ng tơdrong hơrih sơng pơyan puih mak. Ƀok hơpơi ‘meh sơnăm ‘nao tơdrong hơrih kon pơlei tơ̆ dôm tơring ƀơm tŏ ‘mi kial pơrăm gô sơđơ̆ng sô̆ hơ-iă hloh: “Inh lui ngeh lơ̆m sơnăm ‘nao, Teh đak pơtoi tơrĕk, tơgŭm vă kon pơlei gơh phĭ tơtŏ hloh. Atŭm hăm noh, inh adoi hơpơi ‘meh đei atăm tơchơ̆t tơgŭm đe ngê̆ nhơ̆n chĭng chêng, tơgŭm đe sư đei jơhngơ̆m pran vă vei răk tơƀăk mong joh ayŏ juăt jue kơ kon pơlei kon kông”

Sơnăm 2025, Khul druh dăm xăh Hòa Ninh, dêh char Lâm Đồng tơlĕch lơ tơdrong jang tôch gĭt kăl ƀơm truh tơdrong arih xa. Khul jang hơdoi hăm Hnam trưng Đại học Đà Lạt pơm 2 anih "Tơ̆k hơdăh tơring tơrang" tơ̆ thôn 5a păng 10a; atŭm hăm ‘nŏh, hơpăh kơhrĕng tơpu tơmam đei hla ar hŏk, tơmam hŏk pơhrăm ăn hŏk tro tơnuh adrin hŏk; Pơgơ̆r roi tơbăt găh tơdrong tang găn ma túy, teh dong băl tơ̆ hnam trưng hăm đe hơioh. Khul druh dăm xăh vang jang vei lăng ‘lơ̆ng kơsô̆ jên đei tŏk iŏk tơ̆ Anih mong jên tơgŭm tơpôl, hăm kơsô̆ jên vă jê̆ 30 ti, tơgŭm ăn kơhrĕng ‘nu druh dăm đei anih gơnang yoa kơjăp vă atŏk tơiung tơdrong jang xa, tĕch mơdro.

Mŏ Ka Sôi – Bí thư Đoàn xăh Hòa Ninh, dêh char Lâm Đồng, ăn tơbăt: “Vă pơm hơtŏk tơdrong arih xa ăn kon pơlei tơ̆ tơring groi kông, inh hơpơi ‘mĕh teh đak hơnơ̆ng đei tơdrong tơgŭm tưk tơiung tơdrong joh ayŏ kơ dŏ xoang păng pơtho ăn kăn ƀô̆ jĭ bơngai kon kông kơtă tơ̆ tơring. Hăm khul druh dăm, inh hơnơng tơtă ăn bôl boăl chĕp kơjăp nơ̆r Ƀok Hô pơtho găh tơdrong mât 1 ƀơ̆r đon. Rim druh dăm athei jing 1 ‘nu bơngai jang pơnam, plang jơhngâm pran kơdih vă pơjing pơlei pơla. Lăp hơdrô̆ mât 1 ƀơ̆r đon đĕch, bơ̆n gơ̆h vei kơjăp tơdrong juăt, chơng hơnhăk pơlei pơla jang tŏk".

Đei tơmơ̆t hơdai đơ̆ng dôm xah Gia Bắc, Sơn Điền (hơdrol ki), xah Sơn Điền ‘nao oei lơ̆m pơkăp tơnap tap hloh kơ dêh char Lâm Đồng, hăm lơ hơdrung bơngai kon kông hơrih jang xa. Tơ̆ tơring hơtaih yaih, hơdruh tơdăm lơ̆m xah tŏk bŏk oei iŏk yua jơhngơ̆m pran sơnăm mơlôh vă tơ-iung pơjing pơlei pơla. Pơmai Ka Hành – Ƀĭ thư Đoan hơdruh tơdăm xah Sơn Điền ăn tơbăt, hơdơ̆r nơ̆r tơtă đơ̆ng Ƀok Hô "Minh sơnăm pơtơm đơ̆ng pơyan puih mak, minh tơdrong hơrih pơtơm đơ̆ng sơnăm mơlôh.

Sơnăm mơlôh noh pơyan puih mak kơ tơpôl"… khul hơdruh tơdăm vang iung jang lơ̆m dôm tơdrong tơchơ̆t pơlong jang: “Lơ̆m sơnăm ‘nao 2026, inh hơpơi ‘meh đei lơ tơdrong ‘nao. Noh jing hơvơn dôm tơdrong kĕ đei vă tơgŭm đe hŏk tro oei tơnap tap, pơgơ̆r dôm tơdrong joh ayŏ, tơplŏng kơdou, adoi nhen gô vă pơjing kâu lak ƀô̆ chĭng chêng ăn đe hơ-ioh tơ̆ ou. Dôm tơdrong nai nhôn gô vă iŏk ming man lơ tơdrong jang hơdruh tơdăm: trong chô̆ hla kơ  “hơdah – jơk – rơgoh – ‘lơ̆ng”, pơtăm pơkao tơ̆ Hơnih soi ƀlŏk kơ Linh lôch tang xah Sơn Điền; pơgơ̆r chă tang găn păng tơjră lôch glơ̆k tơ̆ đak ăn đe hơ-ioh, bơ̆n hơdrin hŏk pơhrăm truh tôch vă kơ hlôh vao, băt trong pơm jang, hơtŏk tơ-iung unh hnam păng pơlei pơla kơdih”.

Mŏ H’Vinh, hơdruh tơ̆ xăh Đức An, dêh char Lâm Đồng jĭ 1 lơ̆m dôm bơngai oei mơlôh jang rơgei, vang jang ‘lơ̆ng tơdrong pơjei băl tơ̆ tơring. Chĕp vei jơhngâm đon hơnơ̆ng năm hơdrol đơ̆ng druh dăm mưh jang kiơ̆ tơdrong Tơchơ̆t đơ̆ng Hop akŏm Đảng jơ̆p tơring, H’Vinh kŭm hăm lơ đoàn viên, druh dăm lơ̆m pơlei hơnơ̆ng năm hơdrol lơ̆m tơdrong choh jang xa, pơjing tơdrong arih xa ‘lơ̆ng, vang tơgop pơjing pơlei pơla roi đunh roi tơplih ‘nao ‘lơ̆ng rŏ, jang tŏk roi pran kơjăp.

Mŏ H’Vinh, tơroi: “Sơnăm 2025 jĭ sơnăm đei lơ tơdrong jơnei ‘lơ̆ng đơ̆ng teh đak bơ̆n, mă loi jĭ pơgơ̆r đang ‘lơ̆ng Hop akŏm Đảng. Đơ̆ng dôm trong jang tôch trŏ đơ̆ng Hop akŏm, kŭm hăm tơdrong chĕp kơ̆l pơgơ̆r đơ̆ng khul chĕp kơ̆l Đảng xăh, tơring hlôi pơngơ̆t truh tôm tơdrong vă jang tŏk mŭk drăm, jŏh ayŏ kơ dŏ xoang, tơdrong arih xa kơ kon pơlei, kiơ̆ đơ̆ng noh pơm tơplih ‘lơ̆ng lơ̆m tơdrong arih xa kơ kon pơlei. Jĭ bơngai oei hơdruh, kơdih kâu inh hơnơ̆ng adrin hŏk pơhrăm, adrin jang ‘lơ̆ng tơdrong jang Đoàn tơ̆ tơring, hơtŏk đon tơnăp, hơnơ̆ng năm hơdrol đơ̆ng sơnăm mơlôh, vang tơgop ăn tơdrong jang tŏk kơ pơlei pơla”.