Tơdrong pơgơ̆r “Puih mak vang vei lăng đak dơsĭ-Têt ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei” đei pơgơ̆r lơ̆m jơ ‘năr chơt hơ iă ‘nă hal, tơgoăt tơgoăl dih băl ‘lơ̆ng liĕm. Rim tơdrong pơgơ̆r joh ayŏ kơdŏ soang hơ ‘nguơ̆i kơ đak dơsĭ, pơlei pơla, um rup ƀô̆ đô̆i  kơ Khul ƀô̆ đô̆i vei lăng đak dơsĭ iung bơ̆ jang lơ̆m rim duk, gak tơ̆ hơnih kmăi tĭrvĭr, hnam hơdrơ̆r DK1... păng pơyan Puih mak teh đak hlôi mơ̆t lơ̆m jơhngơ̆m đon ‘lơ̆ng rŏ, tơgop tơgoăt kơjăp hloh dơ̆ng jơhngơ̆m đon ‘mêm kơ eng dih băl, pơvei dih băl ƀar păh ƀô̆ đô̆i hăm kon pơlei tơring đak dơsĭ achon dơsĭ găh Pơbăh kơ Teh đak. Đại tá Phạm Ngọc Quý - Kơdră chĕp pơgơ̆r jang Chinh trĭ Tơring 2 Ƀô̆ đô̆i đak dơsĭ tơbăt:“Tơdrong pơgơ̆r “Puih mak vang vei lăng đak dơsĭ-Têt ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei”, ƀlep lơ̆m jơ ‘năr Têt Nguyên đán vă ƀlŏk hơdơ̆r hôn bơnê kơ rim ŭnh hnam đei iŏk yoa ăn teh đak păng dôm bơngai đei iŏk yoa ăn teh đak kơ tơring, hơnih jang, adoi tơgŭm djru rim tơmam drăm trŏ lăp ăn rim ŭnh hnam ƀô̆ đô̆i đei tơdrong hơrih sa mơmat tat. Hăm đe kôn mon kon sou kon pơlei rôp ka hơdang mă hơnih iŏk rong ‘me, tơdrong pơgơ̆r ou jei hơpơi ‘meh vă chă tơgŭm djru ăn đe mon păng ŭnh hnam đe sư sơng đei Têt hiôk chơt, tôm tong hloh. Đơ̆ng noh tơgoăt kơjăp hloh dơ̆ng tơdrong tơgoăt tơgoăl dih băl ƀô̆ đô̆i kon pơlei lơ̆m jang kiơ̆ rim tơdrong bơ̆ jang lơ̆m rim jăl jang sơnăm 2026.

Kiơ̆ đơ̆ng Đại tá Đỗ Hồng Duyên, Kơ iĕng Kơdră chĕp pơgơ̆r Đảng Tơring 2 Ƀô̆ đô̆i đak dơsĭ: Tơdrong pơgơ̆r “Puih mak vang vei lăng đak dơsĭ-Têt ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei” ‘noh jĭ jơ ‘năr vă kang ƀô̆, ƀô̆ đô̆i atŭm hăm kon pơlei plang ăn dih băl jơhngơ̆m đon hiôk chơt sơng Têt, lang să jơhngơ̆m đon ‘mêm kơ eng dih băl, pơjing đei tơdrong hiôk chơt pơyan Puih mak tơ̆ tơring ƀĕnh ƀang đak rơnglă poh yă kơtang păng kial tơhlu jăng. Đơ̆ng noh tơgop lơ̆m pơtho tơbăt dôm tơdrong oei sa joăt joe ‘lơ̆ng rŏ Têt joăt joe kơ hơdrĕch hơdrung, pơm hơtŏk jơhngơ̆m đon lăng tông nông gia dih băl, ‘mêm kơ eng dih băl kơjăp iăp kơtang lơ̆m rim kang ƀô̆, đoan viên hơdruh tơdăm.

Tơbăt ăn jơhngơ̆m đon chơt hơ iă lơ̆m ‘măng pơgơ̆r, yă Bùi Thị Thu Hương - Kơ iĕng Kơdră chĕp pơgơ̆r Hơnih vei lăng kon pơlei tơring Long Sơn, pơlei tơm Hồ Chí Minh, tơbăt: jang kiơ̆ trong bơ̆ jang kơdră tơring ƀar kâp, ƀô̆ đô̆i đak dơsĭ ling lang yak hơdoi hăm kon pơlei lơ̆m lơ tơdrong jang:“Khul ƀô̆ đô̆i Tơring ling lang yak hơdoi hăm nhôn iung jang ƀô̆ đô̆i - kon pơlei, kon pơlei rôp ka hơdang tơklep kơjăp hăm đak dơsĭ. Khul ƀô̆ đô̆ lăng ba kơjăp kon pơlei, lăng tông nông gia kon pơlei đơ̆ng sơđơ̆ng tơring đak dơsĭ truh tơdrong oei sa hơrih sa kơ kon pơlei”.

Hơnhăk ba jơhngơ̆m đon chơt hơ iă ‘nă hal ăn rim ŭnh hnam đei iŏk yua ăn teh đak, tơdrong pơgơ̆r oei hơnơ̆ng pơjing đei jơhngơ̆m pran ăn dôm hŏk tro kon hơ ‘lơ̆p kon pơlei rôp ka hơdang đei Tơring 2 Ƀô̆ đô̆i đak dơsĭ rong ‘me. Oh Lê Triệu Tuấn Việt, hŏk tro jăl ƀar pêng Bình Châu 2, chơt hơ iă pơma:“Ĭnh sơng iŏk đei tơmam drăm đơ̆ng đe ma pôk ăn, ĭnh chhôk dêh. Ĭnh đei đe ma chă tơgŭm djru lơ̆m hŏk pơhrăm, sơnăm ou ki iŏk đei hŏk pơhrăm gơh. Mưh ‘lŏ kơnh ĭnh ‘meh pơm ƀô̆ đô̆i đak dơsĭ dăh mă pơm ƀô̆ đô̆i, kơ yuơ ĭnh đei đe ma chă tơgŭm djru vă đơ̆ng rŏng ou mưh ‘lŏ ‘noh vang tơgop tŏ sĕt lơ̆m vei lăng năng tông Teh đak, rơngei hiôk hian.”

Jei đei jơhngơ̆m đon hiôk chơt lơ lou mơ̆n, mŏ Ngô Thị Quốc, tơbăt jơhngơ̆m đon:“Ba tôch chơt hơ iă ‘nă hal păng bơnê kơ đe mih ma ƀô̆ đô̆i hlôi lăng tông nông gia tơgŭm djru păng iŏk vei lăng năng tông kon hơ ‘lơ̆p ĭnh. Rim ‘măng Têt truh, Tơring 2 Ƀô̆ đô̆i đak dơsĭ jei hơnơ̆ng năm hơlêm păng chă tơgŭm ăn tơmam drăm, hmach thơ thou Têt ăn ŭnh hnam, tơdrong ‘nou jĭ tôch hơ iă, tơgŭm ăn ŭnh hnam dă ƀiơ̆ tơnap tap. Ĭnh pă băt pơma yă kiơ bơih lăp băt bơnê kơ rim đe mih ma ƀô̆ đô̆i Đak dơsĭ, hmach thơ thou ăn đe mih ma mĭnh pơyan puih mak tơpă chơt hơ iă ‘nă hal, hơnŭk hơnoa.”

Tơdrong pơgơ̆r “Puih mak vang vei lăng đak dơsĭ-Têt ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei” jĭ tơdrong pơgơ̆r ƀĕnh ƀang jơhngơ̆m đon ‘mêm kơ eng dih băl, lăng ba dih băl, tơƀôh hơdăh jơhngơ̆m đon “Nhă đak chăm kơtu”, tơdrong joăt joe “Ƀô̆ đô̆i hăm kon pơlei mĭnh jơhngơ̆m đon”, đơ̆ng noh hơnơ̆ng sơkơ̆t hơdăh hơnăp jang, jơhngơ̆m đon ‘mêm kơ eng, jơhngơ̆m đon lui yom đơ̆ng kang ƀô̆, ƀô̆ đô̆i Tơring 2 Ƀô̆ đô̆i đak dơsĭ hăm kon pơlei păng kôn mon kon hơ ‘lơ̆p kon pơlei rôp ka hơdang - dôm bơngai tŏk bŏk prăt măng prăt năr tơklep kơjăp hăm đak dơsĭ, vei lăng đak dơsĭ, yak hơdoi hăm Ƀô̆ đô̆i đak dơsĭ kon pơlei Việt Nam vei lăng kơjăp iăp kơtang tơdrong pơm tơ-‘ngla đak dơsĭ, achon dơsĭ gĭt kăl kơ Teh đak.