Pơgê hrôih năr hơtuch Pơyan yă rak, mŏ Rơ Châm Trư, pơlei Kép 1, tơring Ialy, dêh char Gia Lai chă hơpuih hơmet bơ̆n hnam, cham, hơmet ăn sơng tơmoi tơmang pơhiơ̆. Ŭnh hnam jang ăn đe oei lơ̆m hnam homestay, kơna hlôi chô̆ hơmet pơ ‘lơ̆ng tơ̆ hơnih sơng tơmoi mĭnh ƀar ge tơdrô.

Tơ̆ hnam gŏ hlôi đei pro har, ‘nhot bri păng dôm đing ‘lao pơ o vă pơm pơlăh đing. Mŏ Rơ Châm Trư tơbăt, lơ ŭnh hnam kon pơlei tơ̆ pơlei Kép dang ei hlôi băt jang tơmang pơhiơ̆ vă atŏk jang sa iŏk yoa kơjăp, adoi vă tơƀôh tơbăt tơdrong oei sa joăt joe kơ hơdrĕch hơdrung bơ̆n."Tơmoi năm jei lơ, klo hơkăn nhi ‘meh vă hơmet ming hnam pơtăm vă sơng tơmoi tep pơdơ̆h tơ̆ ou dăh mă sơng tơmoi sŏng sa tơ̆ ou hloi; đơ̆ng noh jei ăn tơmoi vang pơgơ̆r dôm tơdrong oei sa joăt joe kơ bơ̆n. Pơlei nhôn đei lơ tơdrong joăt ‘lơ̆ng hơ iă tôch kơ lơ".

Tơmang pơhiơ̆ pơlei pơla ưh khan lăp atŏk tơ iung tĕnh koăng tơ̆ rim pơlei pơla tơring groi kông kơ Gia Lai, mă lei truh hloi tơ̆ jih đak dơsĭ păh Hơlĕch kơ dêh char, dôm pơlei dăng hơnhoăl, tơring achon dơsĭ ... jei hlôi jing iơ iơ̆r iơ iăr. Yak hơdoi hăm khul tơmoi đơ̆ng Thái Nguyên yak kơtĕch rơbou kây sô̆ trŭh tơ̆ tơring achon dơsĭ Nhơn Châu, ‘nhŏng Nguyễn Sơn Triều tơbăt, pơđĭ lơ̆m khul jei tôch hlêng hlang tơ̆ hơnăp tơdrong ‘lơ̆ng rŏ tơ̆ ou: Đak dơsĭ hlăng hnhơr, oei sa hiôk chơt pha hloi hăm tơdrong oei sa rơ ông rơ ang ngăl ƀôh tơ̆ hơnih tơmang pơhiơ̆ đak dơsĭ. Lơ̆m ‘măng iung năm tơmang pơhiơ̆ achon dơsĭ, ‘nhŏng Triều hăm rim bơngai lơ̆m khul dreng năm ngôi hơnih gak dăr lăng đak dơsĭ đei ming man đơ̆ng vă đĭ anglŏ 19; phĭn rup tơ̆ Jrăng hla kơ Thanh niên; chă tơmang lăng jih tơmo Thảo Nguyên hăm dôm tơmo đei um rup ‘lơ̆ng rŏ. ‘Nhŏng Triều tơbăt:“Pơtêng hăm đak dơsĭ, jih đak dơsĭ tơ̆ găh Tu, ‘noh tơ̆ ou đak dơsĭ hăp jơk pha hlăng hloh ƀiơ̆. Chă lăng đak dơsĭ ‘noh ƀôh hloi bơ̆n ka chă glơi mơsuơ̆t mơsoăt lơ̆m đak. Khul chă phĭn tôch kơ lơ vă tơƀôh tơbăt găh đak dơsĭ tơ̆ ou hăm um rup kon pơlei pơlei hrăh jal hơrih sa tơ̆ jih đak dơsĭ ou tôch kơ ‘lơ̆ng rŏ".

Đơ̆ng rŏng kơ tơmơ̆t hơdoi hơnih jang hanh chinh, Gia Lai 'măng mă blŭng đei akŏm tôm tơdrong “bri – đak dơsĭ – groi kông – mŭk drăm joh ayŏ”. Pah Pơmơ̆t noh groi kông bri kơdrơ̆ng hăm dôm “hla tơsoh jơk” nhen Cham să bri kăp gĭt kơ apŭng plenh teh Groi kông Kon Hà Nừng, Pơgar pơkăp kơ teh đak Kon Ka Kinh, Hơnih vei răk cham char bri Kon Chư Răng. Atŭm hăm noh jĭ dôm hơnih kăp gĭt hŭi kơ đei nhen kông ŭnh Chư Đăng Ya, Biển Hồ, đei lơ chơkơi đak păng bri kơdrơ̆ng, hơvơn lơ tơmoi truh tơmang lăng păng 'mêm kơ cham char. Pah Hơlĕch, đei đak dơsĭ, achon teh hăm trong đak dơsĭ hơtaih hloh 135 km, hăm dôm hơnih truh tơmang lăng mă đe ư ang nhen Kỳ Co, Eo Gió, dơnou Thị Nại. Đak dơsĭ jơk, chuơh kok atŭm hăm cham char tơjih đak dơsĭ pơjing đei tơdrong 'lơ̆ng tih tên vă hơtŏk tơmang pơhiơ̆, pơdơh pơdei, tơplŏng kơdou tơ̆ đak dơsĭ păng tơmang lăng cham char bri plenh teh.

Atŭm hăm noh, Gia Lai oei đei mŭk  kăp gĭt gah joh ayŏ, đơ̆ng Tơdrong joh ayŏ chĭng chêng Tây Nguyên truh dôm mŭk drăm kăp gĭt nhen Bài Chòi, hát Bội, chok bioh juăt jue, atŭm hăm hơnih gru gra kră sơ̆ Chăm Pa đei ƀôh jơ̆p jang. Ƀok Trần Việt Anh – Kơdră Jơnŭm jang Tơmang pơhiơ̆ dêh char Gia Lai ăn tơbăt, tơchơ̆t tơlĕch 'nao gah jang tơmang pơhiơ̆ tơ̆ tơring: "Nhôn gô pơgơ̆r hơdoi hăm dôm hơnih jang mŭk drăm, ưh hơdrô̆ kơ dêh char Gia Lai 'nao mă gô atŭm hăm dôm hơnih jang mŭk drăm lơ̆m păng 'nguaih kơ teh đak gô chă dôm tua tơmang pơhiơ̆ kiơ̆ tơring, pơm thoi yơ vă hơtŏk jang hơdoi hăm dôm tơring chă hơlen băt đei dôm tơdrong 'lơ̆ng kơ đak dơsĭ păng dôm tơdrong 'lơ̆ng kơ bri kông".

Sơnăm 2025, tơmang pơhiơ̆ Gia Lai hơtŏk pran kơtang, sơng hloh 12 triu 'nu tơmoi. Hop akŏm Đảng ƀô̆ dêh char Gia Lai 'măng mă I (jăl jang 2025–2030) hlôi sơkơ̆t hơdah, tơmang pơhiơ̆ jĭ minh lơ̆m sơnăm jang mŭk drăm dơnơm hloh, đei jơnei tơchơ̆t truh sơnăm 2030 sơng pơhlom 18,5 triu 'nu tơmoi, lơ̆m noh đei hloh 1,1 triu 'nu tơmoi đơ̆ng teh đak đe; hơtŏk tơmang pơhiơ̆ kiơ̆ pơkăp jơk, kơjăp sơđơ̆ng, đei kơjă hơtŏk kơjung.

Sơnăm 2026, Gia Lai đei rơih iŏk pơgơ̆r Sơnăm Tơmang Pơhiơ̆ kơ Teh đak hăm hơnăn “Gia Lai – Akŏm um ai joh ayŏ, pơlan tơdrong rơgoh jơk”, hăm lơ tơdrong akŏm gô vă pơgơ̆r đơ̆ng khei 3 truh khei 12/2026. Yă Nguyễn Thị Kim Chung – Phŏ Kơdră Hơnih jang Joh ayŏ, Tơplŏng kơdou păng Tơmang pơhiơ̆ Gia Lai ăn tơbăt:"Hơnih jang hlôi tơgŭm ăn dêh char chih akŏm keh đang tơchơ̆t jang hơtŏk tơmang pơhiơ̆ dêh char Gia Lai đơ̆ng sơnăm 2025 - 2030. Lơ̆m noh, đei ƀôh hơdah gah dôm tơmam drăm tơmang pơhiơ̆ lơ̆m tơchơ̆t hơtŏk jang tơmang pơhiơ̆ truh chă tơroi tơbăt hơtŏk tơmang pơhiơ̆, dôm tơchơ̆t jang hơtŏk tơmang pơhiơ̆ lơ̆m khei năr truh nhen gô chih akŏm tơchơ̆t tơgŭm gah hơtŏk tơmang pơhiơ̆ pơlei pơla, tơmang pơhiơ̆ choh jang xa, tơgŭm pơhrăm bơngai jang pơvih ăn tơmoi tơmang pơhiơ̆ đơ̆ng teh đak đe truh".

Pơyan puih mak tŏk bŏk truh tơ̆ tơring groi kông păng achon đak dơsĭ, 'nhăk ba tơdrong hơrih 'nao, jơhngơ̆m pran 'nao ăn tơdrong tơmang pơhiơ̆ Gia Lai. Lơ̆m tơdrong 'lơ̆ng kơ puih mak, bri giơ̆ng 'lơ̆ng – đak dơsĭ jơk ƀlik ưh hơdrô̆ jĭ cham char 'lơ̆ng, mă tŏk bŏk jing jơhngơ̆m pran vă hơtŏk tơ-iung, pơih pơjing minh tơdrong jang hơtŏk tơ-iung kơjăp ăn tơring teh ou.