Ơ mih ma duch nă kon pơlei pơla, kang ƀô̆ păng ƀô̆ đô̆i kŏng ang lơ̆m teh đak păng kon pơlei oei tơ̆ teh đak đe!

Puih mak Bính Ngọ hlôi truh, lơ̆m jơ ‘năr tơƀưh gĭt kăl kơ sơnăm so -sơnăm ‘nao, Ĭnh apĭnh pơtruh nơ̆r ƀơ̆r pơma hăm đĭ đăng kon pơlei pơla, kang ƀô̆, ƀô̆ đô̆i kŏng ang lơ̆m teh đak păng kon pơlei bơ̆n oei tơ̆ teh đak đe sơnăm ‘nao ling lang pran jăng grăng akou. Ĭnh jei apĭnh pơtruh nơ̆r hăm bôl boăl, kon pơlei rim teh đak lơ̆m apŭnh plĕnh teh sơnăm ‘nao rơngei hiôk hian, hơnŭk hơnoa, tơgoăt tơgoăl păng atŏk tơ iung.

Sơnăm Ất Tỵ 2025, Teh đak bơ̆n hlôi yak hloh mĭnh jăl trong đei lơ tơdrong gĭt kăl păng iŏk đei jơnei ‘lơ̆ng hơ iă; adoi, jei jing mĭnh sơnăm teh đak bơ̆n yak hloh tơdrong tơnap tap, tơdrong long, hăm dôm tơdrong đei ƀôh ưh kơ măh ê, tơnap tap kơ dôm tơdrong lơ̆m apŭng plĕnh păng tơring, atŭm hăm ‘mi kial pơrăm kơtang, pơm hiong răm tôch kơ dêh, pơm ăn jơhngơ̆m đon ơh sơ-‘ngon kơtang, pơm hiong răm ăn kon pơlei.

Hăm jơhngơ̆m đon nuih mơng pran kơtang, hơdrin kơtang, pơđĭ lơ̆m Đảng, lơ̆m kon pơlei, lơ̆m ƀô̆ đô̆i kŏng ang bơ̆n hlôi tơgoăt tơgoăl kơjăp, kơrŭn đĭ jơhngơ̆m mĭnh nơ̆r ƀơ̆r đon, kiơ̆ yok ‘lơ̆ng jơhngơ̆m pran lơ̆m hơdrĕch hơdrung păng tơdrong tơgŭm djru đơ̆ng bôl boăl apŭng plĕnh teh, bơ̆n hlôi keh kong đĭ đăng rim trong tơlĕch jang tơm, hăm dôm tơdrong đei ƀôh jơnei hơ iă: Pơm tơm kơdih, pơm tơ-‘ngla, rơngei keh kong, groi teh gei kơjăp, cham char rơngei hiôk hian đei vei kơjăp; tŏk mŭk drăm găh khul dơ̆ng hơlou lơ̆m apŭng plĕnh teh, hlôi jing teh đak jang sa iŏk đei jô̆ hơtŏ tŏk lơ; tơdrong hơrih sa tơpôl đei lăng ba kơjăp; chinh trĭ, tơpôl sơđơ̆ng; vei lăng sơđơ̆ng teh đak, sơđơ̆ng dơ̆ng kơjăp đei vei kơjăp păng atŏk kơtang; jang tơƀôl hăm teh đak đe, vang mơ̆t hơdoi apŭng plĕnh teh đei atŏk kơtang, hơnih dơ̆ng, tơdrong yom kơ Việt Nam đei tŏk kơtang lơ̆m apŭng plĕnh teh; pơjing đei hơyak gĭt kăl hloh vă teh đak bơ̆n yak mơ̆t lơ̆m chăl atŏk tơ iung ‘nao.

Yak mơ̆t lơ̆m sơnăm ‘nao Bính Ngọ 2026 - Sơnăm mă blŭng jang kiơ̆ Tơdrong tơchơ̆t Hop akŏm tih mă XIV kơ Đảng, hăm tơdrong joăt joe ‘mêm kơ eng teh đak, jơhngơ̆m đon tơgoăt tơgoăl kơjăp, jơhngơ̆m hơdrin đĭ ai păng hơpơi ‘meh vă kơtang, đĭ Đảng, kon pơlei, ƀô đô̆i kŏng ang bơ̆n hơnơ̆ng tơgoăt tơgoăl pôm nơ̆r ƀơ̆r đon, vang iung jang kơtang, tơgĕch jơ rơvơn, yak hloh tơdrong tơnap tap, tơdrong long, iung jang kiơ̆ ‘lơ̆ng jơhngơ̆m đon hơdrin đĭ ai, hưch hanh hơdrĕch hơdrung, ling lang tơplih ‘nao tơchăr, iung jang kơtang vă jang kiơ̆ ‘lơ̆ng rim trong tơlĕch jang tơ iung pơjing teh đak Việt Nam rơngei hiôk hian, pơm tơm kơdih, pơdrŏng, hơnŭk hơnoa, gơh hơgei oei sa ‘lơ̆ng.

Lơ̆m jơhngơ̆m đon chơt hơ iă ‘nă hal sơng pơyan Puih mak ‘nao, mĭnh ‘măng dơ̆ng Ĭnh hmach thơ thou ăn kon pơlei pơla, kang ƀô̆ đô̆ đô̆i kŏng ang lơ̆m teh đak păng kon pơlei oei tơ̆ teh đak đe sơnăm ‘nao iŏk đei jơnei ‘nao; hơdrĕch hơdrung păng kon pơlei bơ̆n roi năr roi pơdrŏng, đei tơdrong hơrih sa phĭ tơtpŏ dơnŏ ‘lơ̆ng dơ̆ng kơjăp, hơnŭk hơnoa.

Bơnê lơ!