Vă jê̆ 15 sơnăm iŏk đơ̆ng năr đei drơ̆ng nơ̆r asong tơmât jên jang, truh đĭ sơnăm 2025, Tơdrong jang pơm anih chă tơmang lăng, pơdơ̆h ngôi Kông lôk Mái Nhà tơ̆ xăh Ô Loan, dêh char Đắk Lắk ‘nao pơtơm tơlĕch jang. Tơdrong jang đei teh vă jang xă vă jê̆ 200ha, hăm kơsô̆ jên jang truh 5.000 ti, đei tơproh hơmet vă pơm anih chă tơmang lăng, pơdơ̆h ngôi tơter đak dơsĭ ‘lơ̆ng hơiă, hăm lơ anih đei man lăp hăm tơdrong hơgăt 6 sơnglŏng.

Kŭm nhen lơ kon pơlei oei xa tơter đak dơsĭ Đắk Lắk, ƀok Võ Văn Ngầu, tơ̆ xăh Ô Loan hơmĕng ‘nâu gô jing tơdrong ‘lơ̆ng vă rou tơiung tơdrong chă tơmang lăng tơter đak dơsĭ tơ̆ tơring: “Mih ma duch nă gô chang đunh bơih. Tơdrong jang đei tơlĕch jang ‘lơ̆ng ‘nŏh tơring âu gô jing anih ‘lơ̆ng hơiă kơ tơring”.

Mă đơ̆ng oei tơlĕch jang rơđŭk rơđăk, hăm lơ tơdrong hơmĕng, mă lei đơ̆ng rŏng vă jê̆ 1 puăt sơnăm ming man, tơdrong jang 5.000 ti âu ‘nao lăp jang đei dang 40 ti hlak jên đĕch. ‘Nâu kŭm jing tơdrong atŭm tơ̆ lơ tơdrong jang tih tơ̆ Đắk Lắk. Kiơ̆ kơsô̆ chih jô̆, lơ̆m dêh char đei 39 tơdrong jang găh chă tơmang lăng đei asong tơmât jên jang, lơ̆m noh đei truh 28 tơdrong jang đei kơsô̆ jên jang hlŏh 16.850 ti tŏk bŏk tơƀâp pơmat tat, tơhlăk tăk pơdui đunh.

Vă hơtŏk hrĕnh tơdrong ming man tơ̆ dôm tơdrong jang tih gĭt kăl, dêh char Đắk Lắk pơjing lơ Khul jang chă sek tơlang dôm tơdrong tơhlăk tăk; pơih đei “đơt bơ̆ jang tơm 30 măng năr hơmet pơ ‘lơ̆ng tơdrong tơhlăk mưh chưk pơ ‘ngoăih teh”. Lơ khul jang jur truh tơ̆ tơring vă sek tơlang dôm tơdrong ưh hơiă, hơtŏk hrĕnh tơdrong jang ming man.

Kiơ̆ ƀok Đào Mỹ, Phŏ Kơdră vei lăng kon pơlei dêh char Đắk Lắk, tơdrong sek tơlang kĕh dôm tơdrong jang ưh jăh tơlĕch jang ưh lăp vă huei lê̆ đei tơdrong pơhuach kư̆ kă, brăh brư găh teh đĕch, mă oei pơjing đei tơdrong ‘lơ̆ng vă jang tŏk ‘nao ăn tơdrong chă tơmang lăng tơ̆ tơring dơ̆ng: “Nhôn tôch tơrek truh tơdrong chă rơih dôm bơngai tơmât jên jang đei jên jang lơ tơpă. Gô đei nơ̆r tơl tơblang hơdăh ăn dôm tơdrong jang. Oei dôm bơngai tơmât jên jang hơyơ ưh đei tơlĕch jên jang ‘nŏh nhôn gô đei trong sek tơlang kiơ̆ tơdrong hơgăt, vă dôm tơdrong ‘lơ̆ng đơ̆ng tơring đei iŏk yoa pơđĭ, tưk tơiung roi ‘lơ̆ng, mă loi hăm dôm tơdrong jang tih, gĭt kăl”.

Hơdai hăm sơng iŏk jên jang, hơmet pơ ‘lơ̆ng dôm anih tơhlăk oei găn trong, hơtŏk hrĕnh dôm tơdrong jang chă tơmang lăng tih, Đắk Lắk oei hơmet ming pơ ‘lơ̆ng Anih jang chă tơmang lăng lơ̆m tơring ‘nao, đơ̆ng rŏng đei tơmât hơdai. Ƀok Trần Hồng Tiến, Kơdră Anih vei lăng joh ayŏ kơ dŏ xoang, tơplŏng kơdâu păng chă tơmang lăng ăn tơbăt, dêh char hlôi pơjing đei tơdrong juăt ‘lơ̆ng găh tơmang lăng kiơ̆ đơ̆ng Lêh cheh phe, Lêh sầu riêng tơklep kơjăp hăm tơdrong ‘lơ̆ng đơ̆ng choh jang xa; lêh ka ngư đak dơsĭ, lêh soi kơ yang đơ̆ng bơngai jang xa tơklep kơjăp hăm tơdrong juăt, jŏh ayŏ kơ dŏ xoang tơ̆ đak dơsĭ. Đắk Lắk kŭm atŏk tơiung dôm pơlei chă tơmang lăng lơ̆m tơpôl, tơklep hăm tơdrong juăt tôn chĭng chêng tơ̆ Tây Nguyên.

Tơ̆ hơnăp kơnh, Đắk Lắk vă tưk tơiung hơdai tơring Tơter đak dơsĭ găh Hơlĕch hăm Tơring groi kông găh Pơmât vă pơjing lơ tơmam chă tơmang lăng lăp ‘lơ̆ng kiơ̆ rim grŭp tơmoi chă tơmang lăng: “Nhôn chih hơdăh vă pơm ăn dôm tơdrong ưh kơ ‘lơ̆ng jing tơdrong ‘lơ̆ng vă atŏk tơiung chă tơmang lăng. Tơring găh Pơmât iŏk tơdrong joh ayŏ kơ dŏ xoang, tôn chĭng chêng, cheh phe pơm tơmam tơm. Tơring găh Hơlĕch ‘nŏh atŏk tơiung chă tơmang lăng pơdơ̆h ngôi, iŏk yoa dôm anih cham char bri brăh ‘lơ̆ng hơiă vă sơng tơmoi. Nhôn ưh đei tơlĕch trong jang lơ 1 ‘măng hloi, mă vă chă rơih kiơ̆ grŭp tơmoi chă tơmang lăng mă lăp”.

Đơ̆ng rŏng 1 sơnăm pơih xă, tơƀưh “bri kông – đak dơsĭ”, Đắk Lắk tŏk bŏk đei lơ hơyak năm blŭng a hăm tơdrong hơmet pơ ‘lơ̆ng pơmat tat găh tơdrong jang ƀơm truh chă tơmang lăng. Lơ tơdrong jang pơm anih pơdơ̆h ngôi tih đei tưk tơiung; tơdrong oei tơhlăk găn trong bơngai tơmât jên jang đei set hơlen vă hơmet ming; pơjing đei lơ tơdrong ‘lơ̆ng hơiă.

Trong gre kơdâu hrĕnh Khánh Hoà - Buôn Ma Thuột pơm đĭ vă đang bơih; dôm ving đak dơsĭ ‘lơ̆ng hlŏh tơ̆ dêh char đei tơmât lơ̆m hơnăn vă sơng iŏk jên jang... Trong yak đơ̆ng bri kông hăm đak dơsĭ roi jê̆, 1 anih chă tơmang lăng cham char bri brăh ‘lơ̆ng rŏ lăp hăm tơdrong hơgăt lơ̆m apŭng plenh teh păng đei tơdrong ‘lơ̆ng hơdrô̆ tơ̆ Đắk Lắk tŏk bŏk đei pơjing./.

Ƀai1: https://vov4.vov.vn/bahnar/todrong-juat-long-dong-so-van-hoa/cha-tomang-lang-dak-lak-dong-rong-dom-jal-trong-ko-ne-518015.vov4