Truh năr 30/5, rim khul kơdră kơpal lơ̆m jơ̆p teh đak hlôi ƀôh băt hloh 2.000 'măng pơm glăi, sek tơlang hloh 1.600 'măng; kơsô̆ jên phak hrŭ hanh chĭnh hloh 17,8 tih hlj, kơjă tơmam drăm pơm yoch đei jê̆ 115,6 tih hlj. Băt hơdah tơdrong hơdrin đơ̆ng rim hơnih jang tơm păng rim tơring, Phŏ Thủ tướng Hồ Quốc Dũng akhan, tơdrong jang tơjră păng sek tơlang tơdrong glăi adoi tam mă trŏ nhen tơchơ̆t tơlĕch, lơ̆m kơplah tơdrong pơm kiơ̆ khôi luơ̆t pơkăp gah iŏk yua kơ̆l 'ngok tơchăr hơgei đơ̆ng lơ hơnih jang oei tam mă tơnăp.

Phŏ Thủ tướng pơgơ̆r hăm rim hơnih jang tơm, rim tơring asong bơngai jang mă hơdah, vă jang đei jơnei tơdrong jang iŏk yua kơ̆l 'ngok tơchăr hơgei păng athei sek tơlang tơdrong yoch gah tơdrong ou đei truh 20% pơtêng hăm sơnăm 2025.