Lơ̆m ‘măng năm tơmang teh đak Cộng hòa Philippines, năr 01/6, đơ̆ng rŏng vang năm Pơm lêh sơng tơ̆ Hơnih hơnơ̆m bơ̆ jang Malacanang, hơnih tơm Manila, Kơdră chĕp pơgơ̆r Teh đak Tô Lâm pơgơ̆r pơma đam hăm Kơdră tơm Philippines Ferdinand Romualdez Marcos Jr. Tơ̆ pơma đam, ƀar ‘nu kơdră chĕp pơgơ̆r drơ̆ng mĭnh nơ̆r tơlech Nơ̆r tơchơ̆t atŭm pơm hơtŏk tơgoăt tơgoăl Việt Nam - Philippines jing Jang hơdoi Gĭt kăl Atŏk kơtang, pơih đei atŏk tơ iung ‘nao ăn jang hơdoi. Hăm tơdrong pơm hơtŏk tơgoăt tơgoăl jing Jang hơdoi Gĭt kăl Atŏk kơtang, ƀar păh drơ̆ng mĭnh nơ̆r iung jang hơdoi tơ iung pơjing Tơdrong iung jang kiơ̆ tơgoăt tơgoăl ‘nao lơ̆m khei năr kơnh. Găh dôm tơdrong lơ̆m tơring păng apŭng plĕnh teh, ƀar ‘nu kơdră sơkơ̆t hơdăh hơnơ̆ng iung jang hơdoi kơjăp, tơgum djru dih băl tơ̆ rim ‘măng hop akŏm lơ pang, mă kăl ‘noh Liên hợp quốc păng ASEAN. Ƀar ‘nu kơdră drơ̆ng mĭnh nơ̆r pơtrŭt rim Hơnih tơm, hơnih bơ̆ jang păng tơring ƀar teh đak iung jang hơdoi kơjăp, tơlĕch jang jơnei rim tơdrong drơ̆ng mĭnh nơ̆r hlôi iŏk đei ƀar păh Kơdră chĕp pơgơ̆r ƀar teh đak, tơgop hơnhăk tơgoăt tơgoăl Jang hơdoi Gĭt kăl Atŏk kơtang Việt Nam – Philippines mơ̆t lơ̆m chăl atŏk tơ iung ‘nao.