‘Nou găh hơnih ming man ‘măng mă ƀar lơ̆m tŏk bŏk khei 3 sơnăm ou, tơchĕng hơlou gô pơm keh đang lơ̆m khei 6/2027 kiơ̆ trong tơlĕch jang đơ̆ng Hơnih tơm Chinh trĭ. 3 hnam trương teh đak rong ‘me đei iung jang ming man năr 19/3/2026 tơ̆ rim tơring sơlam teh đak Đắk Wil, Thuận Hạnh păng Tuy Đức, hăm akŏp kon jên tơmơt jang vă jê̆ 678 ti hlak jên. Mĭnh hnam trương đei tơmơ̆t jang vă jê̆ 226 ti hlak jên, hnam trương đei 30 lăm hok đơ̆ng lăm 1 truh lăm 9, sơđơ̆ng ăn tơdrong ‘meh vă hŏk pơhrăm, oei sa ăn hloh 1.000 ‘nu hŏk tro păng ƀok thây kô pơtho. Găh tơdrong jang iŏk tơvih teh, Hơnih vei lăng kon pơlei dêh char Lâm Đồng hlôi bơ̆ jang hăm tơngla tơmơ̆t jên jang, Hơnih vei lăng kon pơlei rim tơring păng rim hơnih bơ̆ jang đei ƀơm truh. Rim tơring pơkăp keh đang iok tơvih teh hơdrol năr 30/6 truh vă sơđơ̆ng ăn tơlĕch jang ming man.