Tơ̆ dêh char Khánh Hòa, đơ̆ng rŏng hlŏh 5 khei jang kiơ̆ KPI – Kơsô̆ pơtŏ tơdrong đei yoa mưh bơ̆ jang- ăn ƀôh, KPI ưh lăp dơ̆ng ƀât kơsô̆ chih tơ̆ kơmăy tinh đĕch mă oei jing ‘long pơtŏ tơdrong ‘lơ̆ng mưh bơ̆ jang đơ̆ng rim bơngai păng khul tơpôl hai. Ƀok Phạm Minh Nhựt, Kơdră vei lăng Khul jang găh chă tơmang lăng Nha Trang Khánh Hòa, akhan: “Tơdrong tơmât yoa KPI lơ̆m rim tơdrong jang yơ kŭm hơnhăk ăn tơdrong đei yoa ‘lơ̆ng ƀiơ̆. Hăm kăn ƀô̆ mưh bơ̆ jang kiơ̆ dôm tơdrong hơgăt, bu bu kŭm athei hlôh vao hơdăh kơdih kâu kăl yă kiơ, bơ̆ jang thoi yơ. Mưh bơngai jang hlôh vao athei jang yă kiơ păng jang lơ liơ vă ‘lơ̆ng ‘nŏh sơ tơgŭm ăn bơngai đei xa yoa, chă pơm bơ̆n hla ar âu to roi hrĕnh ƀiơ̆".

Gơnơm đơ̆ng KPI, kơdră chĕp kơ̆l dêh char hlôh vao hơdăh biơ̆ jơnăr bơ̆ jang jô̆ păh lăp 1 năr tơ̆ rim anih jang. Pơtih gia, Grŭp Anih jang găh Anih chĕp kơ̆l Đảng dêh char, MTTQ Việt Nam dêh char, Khul chĕp kơ̆l Đảng găh dôm Anih jang Đảng păng anih jang găh sư ‘nŏh đei 4,97 jơ; grŭp jang găh Khul kơdră pơgơ̆r tơring kơ dêh char đei 6,13 jơ; dôm anih jang nai ‘nŏh 6,11 jơ; Anih chĕp kơ̆l Đảng tơ̆ dôm xăh, phường ‘nŏh 5,21 jơ; păng Anih vei lăng kon pơlei tơ̆ xăh ‘nŏh 6,17 jơ. Tơ̆ Anih vei lăng tơring jang mŭk drăm păng Tơring jang kơmăy kơmŏk dêh char Khánh Hòa, Kơdră chĕp kơ̆l Anih jang âu, ƀok Trần Minh Chiến ăn tơbăt, kiơ̆ đơ̆ng KPI, tơdrong bơ̆ jang roi ‘lơ̆ng, roi hơdăh nhen thoi um rup: “Kiơ̆ đơ̆ng KPI gơh ƀôh hơdăh, kăn ƀô̆ gơ̆h băt rim tơdrong nhen thoi um rup mưh bơ̆ jang tơdrong jang atŭm lơ̆m anih jang. Biên chê̆ ưh đei tŏk, tơdrong jang roi lơ. Yoa thoi noh, athei hơtŏk đon jang rơgei, bơ̆ jang kiơ̆ trong hŏk iŏk, jang kiơ̆ kơmăy kơmŏk mă pran hlŏh dơ̆ng”.

Dêh char Khánh Hòa đơ̆ng rŏng kơ tơmât hơdai oei tơlĕch lơ tơdrong hơgăt tôch kơjung: tơdrong jang tŏk GRDP jô̆ păh lăp 11% - 12% 1 sơnăm; GRDP kiơ̆ kơ̆l bơngai dơ̆ng lơ̆m Grŭp 10 lơ̆m teh đak; mŭk drăm kơsô̆ đei 35% GRDP; kơsô̆ tơring kơdrâm ‘lơ̆ng đei 70%. Tơdrong nol năm hơdoi ưh đei iĕ kiơ: 2 tơdrong tơhlăk tih hlŏh găh anih jang, trong nơnăm tôch gĭt kăl (mă loi ‘nŏh găh anih jang kơmăy sô̆) păng khul bơngai jang rơgei, kŭm hăm nơ̆r athei hơtŏk đon rơgei ăn khul kăn ƀô̆. Yoa thoi noh, KPI jĭ tơdrong gơ̆h pơtŏ đei rim tơdrong jang, vă hơlen năng dôm tơdrong jang âu, pơm ăn đon pơhnŏng jing kơsô̆ chih tơroi tôch hơdăh.

Bí thư Đảng dêh char Khánh Hòa, ƀok Nghiêm Xuân Thành, pơma hơdăh KPI gô jing tơmam vei lăng hai, jĭ gơng tơƀưh dôm tơdrong pơhnŏng vă jang păng dôm tơdrong jang đei rim năr hai: “Tơdrong jang kiơ̆ KPI gơh ăn ƀôh kơsô̆ bơngai jang kăl đei dôm yơ. Năng kơsô̆ jơ jang gô băt anih jang ‘nŏh oei rơkăh dăh mă ưh kơmăh dôm ‘nu kăn ƀô̆, rơkăh dôm ‘nu, rơkăh ƀât tơdrong jang kiơ”.

Dêh char Khánh Hòa jĭ anih blŭng a ‘nŏh teh đak jĭ anih mă hơtuch vă bơ̆ jang kiơ̆ KPI hăm kăn ƀô̆. Anih tơm jang nô̆i vŭ hlôi tơlĕch trong jang kiơ̆ KPI hrơ̆ch ‘lơ̆ng jơ̆p lơ̆m teh đak iŏk đơ̆ng blŭng sơnăm 2026, tơmât hơdai hăm tơplih hăm kơmăy sô̆. Mưh kơsô̆ chih jô̆ đei chih tơmât kiơ̆ jơnăr, 1 blăh hô sơ pơm hiơ̆ ưh lăp dơ̆ng ƀât nơ̆r pơam tơblang đĕch, mă oei tơƀôh hơdăh lơ̆m kơmăy hloi, pơm ăn tơdrong bơ̆ jang, pơm hla ar ăn tơpôl jing 1 anih pơjei băl bơ̆ jang tơpăt ‘lơ̆ng.

Kơdră tơm jang Nô̆i vŭ Phạm Thị Thanh Trà pơma hơdăh: “Khul kơdră teh đak vă tơlĕch tơdrong hơgăt tôch rơđăh găh tơdrong hơlen năng kăn ƀô̆, bơngai jang kơ teh đak. Dôm tơdrong hơgăt gô đei chih pơjing ‘moi kiơ̆ tơdrong iŏk yoa kơmăy kơmŏk ‘nao, tơmât hơdai KPI hăm tơdrong jang teh đak tơ̆ Việt Nam, tơklep hăm tơdrong jang, pơm ‘lơ̆ng, rơđăh rơđong păng lăp hăm yăn âu. ‘Nâu jĭ tơdrong tơm vă bơ̆ jang tơnăp ‘lơ̆ng, ưh pă đei đon tơchĕng ‘đei biên chê̆ truh đĭ chăl arih bơih”.

Jĭ mĭnh tơdrong vă hơlen năng tôch trŏ, Kơsô̆ pơtŏ tơdrong đei yoa mưh bơ̆ jang - KPI mă Khánh Hòa oei jang kiơ̆ ưh lăp tơƀôh kiơ̆ đơ̆ng dôm tơdrong jang tơ̆ yăn âu đĕch mă oei tơƀôh hloi đon adrin đơ̆ng rim anih jang, rim bơngai dơ̆ng. Kiơ̆ Phŏ Kơdră Quốc hội Nguyễn Thị Thanh, ‘nâu jĭ tơdrong tơm vă tưk hơtŏk tơdrong pơm tơm đơ̆ng kon pơlei tơ̆ tơring: “Khánh Hòa jĭ 1 lơ̆m dôm anih jang năm hơdrol lơ̆m tơdrong chih pơjing KPI vă hơlen năng, chih pơjing tơdrong jang. Tơdrong tôch hơiă mưh bơ̆ jang dôm tơdrong tôch ‘nao găh tơdrong pơm kiơ̆ kon pơlei pơm tơm, kơchăng chih tơmât dơ̆ng dôm tơdrong ‘nao vă bơ̆ jang kiơ̆ trong kon pơlei pơm tơm lơ̆m chăl tơplih ‘nao hăm kơmăy sô̆”.

Đơ̆ng tơring truh dêh char, truh teh đak, Kơsô̆ pơtŏ tơdrong đei yoa mưh bơ̆jang - KPI oei tơiung jơhngâm pran ‘nao lơ̆m tơdrong joh ayŏ kơ dŏ xoang păng tơdrong đei yoa mưh bơ̆ jang kơ teh đak. Lơ̆m hla ar chih tơroi Chinh trĭ tơ̆ Hop akŏm Đảng đô̆ dêh char Khánh Hòa 'măng mă I, KPI đei năng jĭ tơmam ki thuơ̆t tơm vă bơ̆ jang đei đon hơpơi 'mĕh: jing jơhngâm pran ăn tơdrong jang tŏk kơ teh đak, truh sơnăm 2030 jĭ plt găh Trung ương, anih tơm chă tơmang lăng - pơvih pơvăn tơ̆ đak dơsĭ kơ apŭng plenh teh. KPI đei chih tơbăt tơ̆ 3 tơdrong tơm: Năm hơdrol lơ̆m tơdrong jang kăn ƀô̆; pơm tơplih đei yoa tơ̆ yăn âu mưh hơlen năng bơngai jang; păng jang kiơ̆ hrơ̆ch 'lơ̆ng lơ̆m rim anih jang chinh trĭ, pơm 'lơ̆ng rơđăh rơđong, trŏ ƀlep. 'Nâu kŭm jing hơyak năm mă blŭng vă tơdrong jang teh đak tơ̆ Việt Nam roi jê̆ hăm dôm tơdrong hơgăt 'nao 'lơ̆ng, rơgei păng đei yoa./.

- Link ƀai 1: https://vov4.vov.vn/bahnar/kotong-ang-lom-topol-thoi-su-xa-hoi/lo-bai-chih-kpi-johngom-pram-homet-po-long-dong-khanh-hoa-truh-lom-teh-dak-bai-1-khanh-hoa-pom-yuk-yuk-trong-holou-jang-kio-kpi-dong-jang-hma-truh-chih-rak-hodah-long-496735.vov4