Năr 7/5, tơ̆ phương Buôn Ma Thuột, dêh char Đăk Lăk, Hơnih jang Tơroi tơbăt păng Pơrô̆ pơrôp Trung ương jang atŭm hăm Hơnih tơm Kŏng an, Hơnih tơm Kon kông păng Tơdrong lui atŭm hăm Tĭnh uy Đăk Lăk pơgơ̆r hop akŏm băt hơdah, jang kiơ̆ dôm hla bar chih tơm đơ̆ng Ƀan Ƀĭ thư gah tơdrong jang kon kông, tơdrong lui lơ̆m jăl jang 'nao. Hop akŏm băt hơdah sơnong jang kơ dôm jăl jang, jơnŭm jang đảng lơ̆m pơgơ̆r pơm jang gah tơdrong jang kon kông, tơdrong lui tơguăt hăm hơtŏk mŭk drăm – tơpôl, vei sơđơ̆ng tơpôl teh đak păng vei sơđơ̆ng chĭnh trĭ.

Pơma pơgơ̆r jang,  ƀok Phạm Tất Thắng, jang lơ̆m Trung ương Đảng, Phŏ Kơdră Hơnih jang Tơroi tơbăt păng Pơrô̆ pơrôp Trung ương ră hơdah, tơdrong jang kon kông, tơdrong lui jing tơdrong jang tơm, đunh khei năr, tơgop hơtŏk tơdrong tơguăt tơguăl tôm kon pơlei. Rim jăl jang dah hrôih pơkăp jing tơdrong jang hơdah, vei sơđơ̆ng tơdrong jang kơ bơngai đei kon pơlei lui yom, đe kơdră pơgơ̆r tơdrong lui lơ̆m chă hơvơn tôm kon pơlei.