Bí thư Đảng dêh char Đắk Lắk Lương Nguyễn Minh Triết chih răk, pôk pơ ư dôm tơdrong jang đei đơ̆ng kơđông linh Hòa Hiệp Nam, phường Hoà Hiệp (plt Tuy Hoà, dêh char Phú Yên so) lơ̆m tơdrong vei lăng tơdrong pơm tơm teh đak, vei lăng tơdrong sơđơ̆ng tơ̆ tơring sơlam.

Khei ‘năr truh, Bí thư Đảng dêh char Đắk Lắk athei khul chĕp kơ̆l Đảng, ƀok yŏng Kơđông linh Hòa Hiệp Nam hlôh vao kơjăp, bơ̆ jang đei jơnei ‘lơ̆ng dôm tơdrong Tơchơ̆t đơ̆ng Hop akŏm bơngai tang măt lơ̆m teh đak ‘măng mă XIV kơ Đảng; hơnơ̆ng tơrek truh, vei lăng ‘lơ̆ng tơdrong arih xa găh tơmam drăm, jơhngâm đon ăn kăn ƀô̆, linh, mă loi ‘nŏh đe linh bơ̆ jang hơtăih kơ hnam tơnŏ, oei dơ̆ng tơ̆ kơđông vă trư̆k têt. Ƀlep ƀât sơnăm ‘nao, ƀok Lương Nguyễn Minh Triết thơ thou ăn đe kăn ƀô̆, linh tơ̆ Kơđông Hòa Hiệp Nam sơng xa Têt chơt hơiă ‘nă hal, sơđơ̆ng ‘lơ̆ng, jang đang ‘lơ̆ng rim tơdrong đei pơjao.