Tơ̆ rim dêh char, tơdrong jang pơgơ̆r pôk rơih đơ̆ng dêh char truh tơring hlôi đei hơmet pơ‘lơ̆ng hrôih. Anih pôk rơih rim tơring đei pơjing ƀlep tơdrong hơgăt, đei hloi dôm khŭl joăt jang găh bơngai jang, roi tơbăt, tơgŭm, vei sơđơ̆ng - pơgang păng hơmet pơ ‘lơ̆ng tơdrong tơkêng tơhlâu. Rim tơring kơchăng pơjing trong tơlĕch jang hơdăh, klăih song rơđăh bơngai, rơđăh tơdrong, vei sơđơ̆ng rim tơdrong đei tơlĕch jang ƀlep trong jang ƀlep luơ̆t ngăl.

Hơdai hăm tơdrong hơmet ăn tơmam, tơdrong jang roi tơbăt, mă loi ‘noh jĭ lơ̆m hơnih mạng, đei rim tơring lăng kăl. Tơ̆ hơnăp tơdrong roi tŏk đơ̆ng dôm tơdrong kơtơ̆ng ang glăi, ưh kơ trŏ, tơroi kư̆ kă găh pôk rơih, khŭl kơdră păng kon pơlei hlôi kơchăng tang găn, iung jang đơ̆ng hrôih, đơ̆ng hơtăih. Ưh kơ lê̆ đei ưh kơ ê lơ̆m rim tơdrong, rim trong jang vei sơđơ̆ng tơpôl đei tơlĕch jang hrơ̆ch tơ̆ dôm dêh char tơring tơ ter đak dơsĭ Nam Trung Bộ păng Tây Nguyên.