Oh Đỗ Thị Mỹ Duyên, 24 sơnăm, oei tơ̆ phường Buôn Ma Thuột, dêh char Đắk Lắk tơbăt, mạng tơpôl dang ei jing hơnih sư pơma dơnuh, lăng ngôi vă kơchơt hai păng jing hơnih lăng đŏk tơdrong roi tơbăt kăl hai. Mă loi ‘noh, ƀơ̆t ‘mi kial hơbŭt, đak lơ̆p, dŏng tơgŭm hăt hot ‘noh mạng tơpôl ling jang đei roi tơbăt tôm. Tơdrong ưh kơ ‘lơ̆ng ‘noh jĭ roi tơbăt tơ̆ hơnih âu so, ‘nao hrâu hrĕk, ƀơ̆t lăp ưh kơ trŏ. Đơ̆ng ‘măng ‘mi kial hơbŭt tôch kơ dêh phă pơrăm Tây Nguyên-Nam Trung bộ, oh Duyên yua lơ mạng tơpôl păng ƀôh dôm fanpage kơ khŭl lĭnh Kŏng an, hlôi vei sơđơ̆ng tơtĕnh, lơ păng trŏ ƀlep dơ̆ng. Đơ̆ng noh, oh Đỗ Thị Mỹ Duyên hơnơ̆ng pơih lăng dôm trang âu:

“Ĭnh đa pơih lăng facebook, lơ̆m ‘noh đa pơih lăng trang kơ Kŏng an Đắk Lắk.  Lơ̆m noh đa chih tăh dôm um rup, roi tơbăt dôm bơngai pơm glăi Luơ̆t trong nơnăm. Dăh mă ‘nao âu ‘noh lơ um rup găh dŏng sar bar, dŏng tơgŭm kon pơlei tơring đak lơ̆p tơ̆ dôm xăh păih Hơlĕch (dêh char Phú Yên so). Ĭnh kŭm hơnơ̆ng vang chă tơƀôh ăn băl dơ̆ng, păng sơđơ̆ng jơhngơ̆m hoei kơ bơngơ̆t tơdrong tơroi ya”.

Bơ̆jang kiơ̆ athei đơ̆ng Anih tơm vei lăng Kŏng an găh tơplih kơsô̆, iŏk yua khoa hŏk kơmăy kơmŏk lơ̆m tơdrong jang, dôm anih jang găh Kŏng an dêh char Đắk Lắk adoi pơm fanpage. Kiơ̆ đơ̆ng ‘noh, khŭl lĭnh kŏng an tŭn pran roi tơbăt khôi luơ̆t, sơng iŏk nơ̆r roi tơbăt đơ̆ng kon pơlei, tơgop vei sơđơ̆ng tơpôl păng iung jang tơroi găn plơ̆ dôm tơdrong tơroi, tơchĕng glăi. Trung tá Trần Viết Nghĩa, Kơdră Khŭl roi tơbăt, pơtho tơƀôh Hơnih bơ̆jang chĭnh trĭ Kŏng an dêh char Đắk Lắk tơbăt, fanpage “Kŏng an dêh char Đắk Lắk” yua đơ̆ng anih jang vei lăng, dang ei đei hloh 121.000 ‘nu bơngai răp hơlen lăng, vă jê̆ 9 triệu ‘nu pơih lăng. Ưh khan lăp chih tăh roi tơbăt khôi luơ̆t, sơđơ̆ng tơpôl, sơng iŏk nơ̆r tơroi plơ̆, tơroi pơm yoch đơ̆ng kon pơlei, mă oei jing hơnih chă tơroi nơ̆r pơma krao hơvơn mĭnh jơhngơ̆m đon, tơgŭm kon pơlei đei hiong răm đơ̆ng ‘mi kial pơrăm.

“Lơ̆m ‘măng ‘mi tih đak lơ̆p âu ki, tơ̆ xăh Hòa Thịnh đei 1 ‘nu drŏ kăn toĕn vă rơneh mă lei ưh kơ gơh chă năm vih vơ̆t yua đơ̆ng đak tih. Kơtơ̆ng ang đei nhôn tơtom chih tăh lơ̆m fanpage păng lăp đơ̆ng rŏng kơ ‘noh, khŭl lĭnh dŏng sar bar, dŏng tơgŭm Kŏng an xăh Hòa Thịnh hlôi sơng iŏk, tơtĕnh tơlĕch jang ba drŏ kăn vă rơneh truh tơ̆ hnam pơgang rơneh tơtom. Ĭnh akhan ‘nâu jĭ tơdrong tơgŭm tơtom, ‘lơ̆ng đơ̆ng fanpage truh kon pơlei”.

Mĭnh fanpage đei yua nai kơ kŏng an Đắk Lắk ‘noh jĭ “Hơnih kanh sat vei lăng trong nơnăm Đắk Lắk”. Fanpage âu sơng đei hloh 33.000 ‘nu bơngai răp hơlen lăng, hăm hloh 1 puăt triệu ‘nu pơih lăng rim khei. ‘Nâu jĭ kênh roi tơbăt Luơ̆t trong nơnăm; tơtom roi tơbăt dôm tơdrong ƀơm truh vei sơđơ̆ng trong nơnăm păng sơđơ̆ng tơpôl. Kiơ̆ đơ̆ng fanpage, Hơnih Kanh sat vei lăng trong nơnăm oei hơnơ̆ng sơng iŏk um rup, phim tơroi đơ̆ng kon pơlei găh dôm tơdrong pơm glăi tơ̆ trong nơnăm, tĕch mơdro tơmam kơ̆m... Trung tá Nguyễn Khiếu Nam Vũ, vei lăng trang kơtơ̆ng ang “Hơnih kanh sat vei lăng trong nơnăm Đắk Lắk”, tơbăt:

“Anih jang hlôi đei dơ̆ng mĭnh kênh kơtơ̆ng ang sơng iŏk roi tơbăt đơ̆ng kon pơlei. Kiơ̆ đơ̆ng noh, hơnih jang hlôi  phak vă jê̆ 100 ‘nu pơm glăi, hăm akŏm kơsô̆ jên hloh 300 triệu hlak jên. Nhen: Tŏk bŏk khei 12 âu ki, đơ̆ng roi tơbăt đơ̆ng kon pơlei lơ̆m fanpage hăm clip 2 gre chơ tơmoi kơdâu ploi hrĕnh, nhôn hlôi hơlen lăng, băt hơdăh păng phak 2 tong gre chơ tơmoi pơm glăi. Mă hơdăh, tơdrong glăi yua đơ̆ng Đ. V. P., oei tơ̆ xăh Tuy Đức, dêh char Lâm Đồng, huơ̆r gre ô tô kơƀang kơsô̆ 48B-000.XX, đei phak 5 triệu hlak jên păng trừ 2 điểm hla ar ăn phep huơ̆r gre”.

Pơđĭ hơnih jang păng kŏng ăn 102 xăh, phường găh Kŏng an dêh char Đắk Lắk tă kơ pơm fanpage, lơ trang sơng đei lơ bơngai pơih lăng, đei fanpage iŏk đei kơhrĕng rơbâu ‘nu tơmoi ‘meh păng răp hơlen lăng. Tơdrong chih tăh lơ̆m trang đei chih ‘lơ̆ng, hơiă, đơ̆ng roi tơbăt khôi luơ̆t, vei sơđơ̆ng tơpôl truh dôm tơdrong jang dŏng sar bar, dŏng tơgŭm, păr ang bơngai ‘lơ̆ng, tơdrong ‘lơ̆ng păng iung jang tơroi tơdrong kơtơ̆ng ang glăi ưh kơ đei yua. Ƀok Nguyễn Quốc Hiệp, Phŏ Kơdră Anih vei lăng găh Joh ayŏ, Tơplŏng kơdâu păng Tơmang lăng dêh char Đắk Lắk hơlen lăng, ‘nâu jĭ tơdrong jang roi tơbăt trŏ lăp hăm trong jang tơplih kơsô̆ hrei ‘nâu.

“Tơ̆ hơnăp kơnh, Anih jang hơnơ̆ng jang hơdai đei yua hloh dơ̆ng hăm dôm anih jang lơ̆m khŭl lĭnh Kŏng an dêh char Đắk Lắk vă hơtŏk loi dơ̆ng roi tơbăt jơ̆p jang hloh dơ̆ng, tơgŭm kon pơlei gơh băt hrĕnh hloh, tơtom kơtơ̆ng ang tơ̆ dôm trang fanpage kơ khŭl lĭnh Kŏng an truh hăm kon pơlei. Hơnơ̆ng roi tơƀôh dôm trang âu hăm kon pơlei, mă loi ‘noh jĭ kon pơlei tơ̆ tơring hơtăih hơtŏ, tơring kon pơlei kon kông, băt dôm trang fanpage âu jơ̆p jang hloh”.

Tơpă yan âu ăn ƀôh, dôm fanpage kơ Kŏng an Đắk Lắk ưh khan lăp jing kênh roi tơbăt tơpă tơ̆ hơnih mạng, mă hlôi jing gơng tơƀưh tơjê̆, lui ngeh đơ̆ng khŭl lĭnh kŏng an păng kon pơlei. Tơ̆ noh, tơdrong kơtơ̆ng ang đei chă tơroi tơtĕnh, ƀlep; nơ̆r tơroi đơ̆ng kon pơlei đei răp mơ̆ng, hơmet pơ ‘lơ̆ng tơtom, tơgop vei kơjăp tơdrong sơđơ̆ng tơpôl, păr ang rơđăh ‘lơ̆ng jơhngơ̆m đon “yua kơ kon pơlei pơvih pơvăn” lơ̆m chăl tơplih kơsô̆.