Tơ̆ jơ năm ngôi, Bí thư Đảng dêh char Lâm Đồng tơroi tơbăt găh pơtôch Hop akom tih kơdră tang măt lơ̆m teh đak ‘măng mă XIV kơ Đảng, dôm tơdrong kăl vă hrôih ba Tơdrong tơchơt Hop akom tih mă XIV mơ̆t lơ̆m tơdrong hơrih. Ƀok Y Thanh Hà Niê Kđăm  hôn bơnê kơtang dôm tơdrong hơdrin đơ̆ng Đảng ƀô̆, khul kơdră chĕp pơgơ̆r păng Kon pơlei Tơring kăl Phú Quý lơ̆m atŏk tơ iung muk drăm-tơpôl tơklep hăm vei kơjăp teh đak-sơđơ̆ng tơring, pơm tơm kơdih achon dơsĭ; adoi pơtruh nơ̆r tơthou hmach chơt hơ iă sơnăm ‘nao truh hăm đĭ đăng kang ƀô̆, đang viên, ƀô̆ đô̆i kŏng ang păng Kon pơlei oei lơ̆m achon dơsĭ. Ƀlep lơ̆m jơ ‘năr ou, khul bơ̆ jang hlôi pôk ăn 67 tơnô̆ tơmam drăm Têt ăn Hơnih bơ̆ jang Đảng , Jơnum vei lăng kon pơlei, Hơnih vei lăng kon pơlei, Hơnih jang Mặt trận Tổ quốc Việt Nam Tơring Kăl Phú Quý, atŭm hăm rim khul ƀô̆ đô̆i kong ang tŏk bŏk bơ̆ jang lơ̆m tơring. Lơ̆m ou, khul bơ̆ jang hlôi năm ngôi, hmach Têt Kơđông ƀô̆ đô̆i ‘Măng sơlam teh đak Dơnŏk duk Phú Quý; pôk tơmam drăm, hơlêm jơhngơm ăn kang ƀô̆, ƀô̆ đô̆i, thơ thou ăn hơnih bơ̆ jang ‘lơ̆ng keh kong tơdrong jang vei lăng kơjăp iăp kơtang tơdrong pơm tơm kơdih, vei lăng sơđơ̆ng tơring đak dơsĭ, achon dơsĭ lơ̆m jơ ‘năr Têt Nguyên đán Bính Ngọ 2026.