Hnam yă Đặng Thị Duy Hiền, tơ̆ thôn Thành Nam, xah Suối Dầu, dêh char Khánh Hòa tơglơh ah 'măng 'mi kial đak hơbông ou ki. Hăm tơdrong tơgŭm đơ̆ng jơnŭm pơgơ̆r tơring păng ƀô đô̆i, yă Đặng Thị Duy Hiền hlôi pơtơm pơm hnam 'nao. Tơdrong ming man ƀơm lơ tơnap tap kơlih ưh đei bơngai man, ưh đei tơmam ming man păng tŏ 'mi kial ưh sơđơ̆ng. Hăm tơdrong thoi noh, kan ƀô̆, khul linh Đăi đô̆i Trunh sat Kơ yơ̆i 1, Hơnih tơm vei lăng Khul linh dêh char Khánh Hòa iŏk jang “Tơdrong jang Quang Trung” hlôi tơtom năm truh, chơ pơdŭ tơmam ming man, tơgop jơhngơ̆m vă man dơnal hnam. Lơ̆m tŏ sĕt năr, hnam 'nao jê̆ keh đang, hơ-'nhăk tơdrong hơ-iă păng sơđơ̆ng jơhngơ̆m hăm yă Đặng Thị Duy Hiền: “Đei teh đak tơgŭm ăn kơ inh pơm hnam tơ̆ hơnih oei 'nao tơ̆ ou. Inh bơnê kơ rim hơnih jang tơpôl hlôi tơgŭm ăn kơ inh pơm hnam oei keh đang hơdrol kơ Têt Nguyên đan. Jơhngơ̆m đe ƀô đô̆i đei truh 30% lơ̆m kơsô̆ jên man hnam, noh inh yua kơsô̆ jên ou vă răt tơmam ming man vă keh đang”.

Lơ̆m dôm năr ou ki, hă si Nguyễn Hoài Nam, pơm jang lơ̆m Đăi đô̆i Trunh sat Kơ yơ̆i 1, Hơnih tơm vei lăng Khul linh dêh char Khánh Hòa, hăt hot pơm jang tenh kuăng. Phŏ chă pơdŭ tơmo, drŭt gre rùa pơdŭ tơmam ming man atŭm hăm khul jang tơm vă keh đang dơnal hnam: “Hơyuh 'năr lơ̆m dôm năr ou hơnơ̆ng kơ 'mi ah kơsơ̆ mă lei kan ƀô̆, khul linh nhôn adoi oei hơdrin keh đang hnam hơdrol kơ pơkăp. Noh jing sơnong jang kơ nhôn”.

Hnam yă Lê Thị Đã, tơ̆ Kueng kơphô̆ 1, phương Đô Vinh, dêh char Khánh Hòa, tŏk bŏk jê̆ keh đang. Tơdrong sô̆ hơ-iă ƀôh hơdah ah muh măt bơngai drăkăn hlôi ƀơm lơ tơdrong hiong răm lơ̆m 'măng 'mi kial đak hơbông ou ki. 'Nhŏng Võ Văn Tâm, kon drŏnglo yă Lê Thị Đã ƀrơ̆k kơ jơhngơ̆m ah mă ƀô đô̆i kơtă truh tơgŭm pơm hnam oei ăn unh hnam:  “Đak hơbông ou ki, hnam mĕ inh tơglơh pơđĭ. Gơnơm đei jơnŭm pơgơ̆r tơring păng Trung đoan 896 tơgŭm dăp đon dăp bơnôh ăn unh hnam. Dang ei, hnam adoi jê̆ keh đang bơih".

Pơm kiơ̆ “Tơdrong jang Quang Trung” kơyuơ Thủ tướng teh đak pơtơm, Hơnih tơm vei lăng Khul linh dêh char Khánh Hòa jang atŭm hăm rim hơnih linh Tơring 4 Khul linh duk, Khul linh Đăk kŏng 5 hlôi hơvơn 70 khul ming man, hăm jê̆ 1.150 kan ƀô̆, khul linh atŭm hăm lơ tơmam drăm pơm jang, tenh kuăng vih tơ̆ dôm tơring ƀơm răm kơtang vă tơgŭm kon pơlei pơm hơmet hnam oei hư răm đơ̆ng rŏng kơ đak hơbông.

Ưh hơdrô̆ pơm hơmet bơbŭng hnam tơpăr, khul linh oei pơjing đon lui ăn kon pơlei tơ̆ tơring đak hơbông. Đơ̆ng dôm hơnih tơpăi tơglơh, hiong răm đơ̆ng rŏng kơ 'mi kial, minh tơdrong hơrih 'nao tŏk bŏk đei iung jing tơ̆ tơring teh pơlei pơla Khánh Hòa – kơjăp hloh, tơnŏ hloh, lơ̆m đon bơnôh tơguăt khul linh – kon pơlei kơjăp ling lang.