Pơgê 27/1, Anih tơm pơgơ̆r Ƀô̆ đô̆i vei lăng tơring sơlam dêh char Gia Lai jang hơdai hăm Anih vei lăng kon pơlei xăh Ia Púch pơgơ̆r tơdrong jang “Pơyan puih mak Tơring sơlam - Hiôk jơhngơ̆m kon pơlei lơ̆m tơring” sơnăm 2026 hăm lơ tơdrong jang hơdăh ‘lơ̆ng lăng găh Kon pơlei tơring sơlam. VOV.Bahnar - Tơdrong jang ‘noh đei pơgơ̆r joh ayŏ kơdŏ soang; axong tơmam ăn ŭnh hnam teh đak tơgŭm, ŭnh hnam mơmat tat; khăm jĭ, pơtho tơƀôh jơhngơ̆m pran păng asong đĕch pơgang.

Dôm anih jang, bơngai đei jơhngơ̆m đon ‘lơ̆ng hlôi pơjao hloh 800 tơpu tơmam hăm akŏm kơjă hloh 600 triệu hlak jên. Hơdai hăm ‘noh jĭ dôm tơdrong jang tơ̆ ‘ngoăih nhen Kơdeng tơmam ưh kơ hoach jên, Kơdeng tơmam ‘nhot rơgoh Tơring sơlam, “ ti dui Tơring sơlam”, tơdrong pơchơt kră sơ̆ păng pơlong nŭng ƀĕng chư̆ng, pơm tơdrong hiôk chơt, tơklep lĭnh - kon pơlei. ‘Nâu jĭ tơdrong jang hơnơ̆ng rim sơnăm, tơgop bơ̆jang kiơ̆ jơnei tơdrong jang tơgŭm vei lăng sơđơ̆ng tơdrong hơrih sa tơpôl, tơgŭm kon pơlei tơring sơlam sơng Tết tơnŏ hiôk.