Đơ̆ng rŏng 1 sơnăm tơlĕch jang Tơdrong tơchơ̆t 57 đơ̆ng Anih tơm Chĭnh trĭ, tơdrong jang khoa hŏk, kơmăy kơmŏk, tơplih ‘nao hơgei păng tơplih kơsô̆ hlôi iŏk đei lơ jơnei yak blŭng gĭt kăl, hơdai hăm tơdrong chih pơkeh trong jang, khŭl jang chĕp kơ̆l pơgơ̆r đơ̆ng Trung ương truh tơring. Tơplih kơsô̆ tơ̆ teh đak bơ̆n hlôi tơpă tŏk hrĕnh hăm jơ nei rơđăh rơđong lơ̆m apŭng plĕnh teh nhen: kơsô̆ anih jang viễn thông pơrĕng dơ̆ng mă 67, internet hrĕnh dơ̆ng mă 18, Khŭl kơdră teh đak điện tử dơ̆ng mă 71... Mă loi ‘noh anih dơ̆ng tơplih ‘nao hơgei kơ Việt Nam dơ̆ng mă 44 lơ̆m apŭng plĕnh teh.

Lơ̆m teh đak đei dang 4.000 anih mơdro sa pơjing tơdrong jang sa hơgei. Tơ̆ hop akŏm, Tổng Bí thư Tô Lâm pơma hơdăh hơnăp jang gĭt kăl - đei tơdrong ‘lơ̆ng păng tơm kơ khoa hŏk, kơmăy kơmŏk, tơplih ‘nao hơgei păng tơplih kơsô̆. ‘Nâu jĭ athei pơgŏ vă hơtŏk tơiung hrĕnh păng kơjăp teh đak lơ̆m jăl jang truh. Tổng Bí thư tơroi 7 trong vă jang păng kŭm jing dôm tơdrong đei pơgơ̆r athei dôm anih tơm, anih jang, tơring akŏm vei kơjăp, bơ̆jang kiơ̆; lơ̆m noh drơ̆ng nơ̆r băt hơdăh trong jang kăl kơ sơnăm 2026 ‘noh jĭ “Bơ̆jang pran ‘lơ̆ng, păr ang iŏk yua”.