Pơgê năr 1/7, Hô̆i đŏng kon pơlei dêh char Gia Lai ('nao) pơgơ̆r 'Măng hop akŏm mă mônh, jăl jang 2021 - 2026. 'Nou jing 'măng hop akŏm kăp gĭt gah chinh trĭ, luơ̆t pơkăp păng tơpă jing gru kơnăl gĭt kăl kơ jơhnơr hơrih lơ̆m tơdrong jang tơ-iung pơjing dêh char Gia Lai ('nao), pơkăp hơtŏk tơ-iung tenh, kơjăp sơđơ̆ng, hơtŏk tơ-iung lơ̆m tơring păng teh đak. Hô̆i đŏng kon pơlei dêh char Gia Lai ('nao) jăl 12 đei 119 'nu tang măt. Tơ̆ hop akŏm, Hô̆i đŏng kon pơlei dêh char hlôi tơbang Tơchơ̆t đơ̆ng Hơnih jang tơm Kuôk hô̆i gah tơdrong pôk dôm kơchư̆k jang kơdră Hô̆i đŏng kon pơlei dêh char.

Kiơ̆ kơ noh, ƀok Rah Lan Chung, Phŏ Ƀĭ thư Hơnih jang Tĭnh uy đei pôk jang Kơdră Hô̆i đŏng kon pơlei dêh char Gia Lai ('nao) jăl jang 2021–2026; Ƀok Trương Văn Đạt, jang lơ̆m Hơnih jang Tĭnh uy păng yă Huỳnh Thúy Vân, jang lơ̆m Tĭnh uy đei pôk jang Phŏ Kơdră Hô̆i đŏng kon pơlei dêh char Gia Lai ('nao).  Hơnih jang tơm Kuôk hô̆i pôk yă Đinh Ly An jang Kơdră Hơnih jang Khôi luơ̆t pơkăp; ƀok Phạm Tấn Thành jang Kơdră Hơnih jang Mŭk drăm – Jên mong; yă Huỳnh Ngọc Hà jang Kơdră Hơnih jang Joh ayŏ - Tơpôl kơ Hô̆i đŏng kon pơlei dêh char Gia Lai ('nao) jăl jang 2021-2026. Pơma ah jơ iŏk sơnong jang, ƀok Rah Lan Chung, Kơdră Hô̆i đŏng kon pơlei dêh char Gia Lai ('nao) ăn tơbăt, hăm kơchư̆k jang păng sơnong jang kăp gĭt đei pơjao, ƀok gô jang kiơ̆ dôm tơdrong jang đei jơnei đơ̆ng dôm jăl jang hơdrol, 'nhăk tôm tơdrong gơh, kơ̆l 'ngok vă pơm jang kơyuơ kơ kon pơlei, tơgăl jing bơngai tang măt mă kon pơlei pôk jang, keh đang tơnăp sơnong jang đei pơjao.