Hloh 1 khei kơ ou, lơ̆m dôm năr hơtuch giĕng, tơ̆ Hơnih jang Kăp gĭt xah Hàm Thuận, dêh char Lâm Đồng, khul joh ayŏ kơdŏ suang păng pơdah hơbăn ao tanh bơngai Chăm hăt hot pơtơ̆p pơhrăm. 'Nhŏng Thông Đinh Đương ăn tơbăt, ou jĭ 'măng mă blŭng 'nhŏng đei năm akŏm Năr joh ayŏ Chăm jơ̆p teh đak, kơdih po sư pơ-ư pơ-ang păng chơt hơ-iă dêh: " 'Nou ưh hơdrô̆ jĭ minh Năr akŏm tih, mă ou oei jĭ hơnih vă kơ nhôn atŭm jơhngơ̆m chă tơbang pơdah joh ayŏ kơ kon pơlei Chăm nhôn truh hăm tôm kon pơlei pơla. Hmach bơnê kơ Đảng păng Teh đak hlôi tơgŭm ăn lơh pơgơ̆r tơdrong akŏm ou vă kon pơlei Chăm tơ̆ rim tơring lơ̆m jơ̆p teh đak gơh vih akŏm, hơtŏk tơdrong joh ayŏ kră sơ̆ ăn đe sơnăm mơlôh vei răk tơƀăk mong joh ayŏ kon pơlei Chăm. Inh adoi nhen rim bơngai lơ̆m khŭl joh ayŏ, dang ei tŏk bŏk hơdrin pơhrăm, hơpơi 'meh pơtruh dôm tơdrong pơdah 'lơ̆ng hloh ăn kon pơlei pơla chă akŏm lăng".

Hăm hơnăn pơtruh ăn Năr akŏm noh “Vei răk, tơƀăk tơdrong joh ayŏ kon pơlei Chăm dêh char Lâm Đồng lơ̆m chăl sơnăm 'nao”, khŭl Lâm Đồng gô pơtruh akŏm hăm lơ tơdrong kăp gĭt vă tơbang tơdrong 'lơ̆ng kơ joh ayŏ Chăm tŏk bŏk đei kon pơlei vei răk. Lơ̆m noh, tơdrong jang joh ayŏ akŏm lơ̆m dôm tơdrong nhen: tơbang pơdah pơtơm kơ lêh akŏm, khôi juăt hơrih xa păng joh ayŏ juăt jue kơ kon pơlei Chăm; tơbang pơdah joh ayŏ juăt jue kon pơlei Chăm lơ̆m tơdrong jang tơ-iung pơjing păng vei lăng pơlei pơla. Atŭm hăm noh, đei tơdrong tơbang pơdah tơdrong jang juăt jue kră sơ̆ gah tanh brai, man lơ̆n kơ kon pơlei Chăm; pơlong joh ayŏ kon pơlei pơla păng tơbang pơdah hơbăn ao tanh kơ kon pơlei Chăm.

Ngê̆ nhơ̆n Ưu tŭ Lâm Tấn Bình tơ̆ xah Bắc Bình ăn tơbăt, lơ̆m năr akŏm, khŭl gô tơbang pơdah gah khôi pơtơm “Pôk kơchư̆k thâi Cả kơtŏng khŭl Kadhar tơdrong lui Bàlamôn kơ bơngai Chăm Lâm Đồng”. 'Nou jĭ tơdrong hơmet huach lơ khei năr: "Lêh pôk kơchư̆k thâi Cả Kadhar jĭ 'măng akŏm tơdrong joh ayŏ juăt jue kră sơ̆ kơ bơngai Chăm, kiơ̆ dôm khôi juăt hăm dôm tơdrong hơri Lui kăp gĭt đơ̆ng đe kơdră pơgơ̆r tơdrong lui Gru kadhar, hrơ hrou atŭm hăm nơ̆r krao akhan đơ̆ng Muk Pajuw, vă pôk bơnê kơ đon bơnôh, tơdrong hơrih kơ đe ƀok Pơtao Dơnơm hlôi đei jing Yang, kiơ̆ đơ̆ng dôm tơdra hiôk wơch kơ brŏ kanyi, pơjing đei tơdra hiôk 'lơ̆ng kăp gĭt hram lơ̆m đon lui kơ kon pơlei kiơ̆ lui".

'Nguaih kơ tơdrong joh ayŏ juăt jue, joh hơri, tơplŏng kơdou, khŭl Lâm Đồng oei vang akŏm tơbang pơdah joh ayŏ juăt jue tơ̆ tơring, pơm hơdah um rŭp kon pơlei Chăm tơ̆ Lâm Đồng lơ̆m tơdrong jang tơ-iung pơjing păng vei lăng pơlei pơla; gru grua, tơring tơrang 'lơ̆ng, dôm tơdrong soi tơbeh; tơbang pơdah gah hla bar chih akŏm gah mŭk drăm joh ayŏ Hơdrung hơdrĕch Pơtao Chăm…

Mă kăl, khŭl gô năm akŏm tơbang pơdah minh ƀar hơnih truh tơmang kăp gĭt kơ Lâm Đồng, tơbang pơdah minh ƀar tơmam drăm choh jang xa, tơmam drăm OCOP 'lơ̆ng hloh;... Ƀok Nguyễn Tú Long, Phŏ Kơdră Hơnih jang Joh ayŏ păng Vei lăng Cham să Đăk Nông – dêh char Lâm Đồng ăn tơbăt, khŭl đei 85 'nu truh hăm Năr akŏm vă chă hŏk hơlen, atŭm dih băl hơtŏk tơ-iung: "Dang ei, tơdrong jang hơmet akŏm hlôi keh đang. Lăng atŭm tơdrong akŏm ƀenh kơ joh ayŏ kon pơlei Chăm. Sơnăm ou, khŭl dơnơm 'noh khŭl Hàm Thuận Bắc (so) đei: đă ƀơlŏng, dôm tơdrong tơplŏng kơdou tơpôl, đang kơ khŭl joh suang tơpôl păng tơbang pơdah hơbăn ao tanh. Gah tơbang pơdah lêh pơtơm 'noh khŭl pơgơ̆r tơdrong lui kơ Bắc Bình (so)"

Năr akŏm Joh ayŏ kon pơlei Chăm 'măng mă 6 tơ̆ dêh char Khánh Hoà gô pơgơ̆r đơ̆ng năr 26 truh năr 28/6 ou kơnh, jĭ tơdrong akŏm kăp gĭt gah joh ayŏ  Chăm lơ̆m jơ̆p teh đak. Năr akŏm đei hloh 700 ngê̆ nhơ̆n, bơngai joh ayŏ kơdŏ suang truh đơ̆ng 7 dêh char, pơlei tơm noh: Khánh Hòa, Gia Lai, Lâm Đồng, Tây Ninh, An Giang, Đăk Lăk păng pơlei tơm Hồ Chí Minh.

Atŭm hăm Khánh Hòa, Lâm Đồng jĭ dêh char đei lơ kon pơlei Chăm hloh lơ̆m teh đak. Khei năr ou ki, tơdrong jang vei răk tơƀăk mong dôm kơjă iŏk ayŏ juăt jue 'lơ̆ng rŏ kơ kon pơlei kon kông hơnơ̆ng đei tơring jang tơnăp. Hăm pơkăp hŏk hơlen, hơtŏk hlôh vao, tơnăp sơnong jang hăm tơpôl lơ̆m tơdrong jang vei răk tơƀăk mong dôm kơjă joh ayŏ juăt jue lơ̆m khei năr mơ̆t jang hơdoi păng hơtŏk tơ-iung kơ teh đak, rim bơngai jang joh ayŏ kơdŏ suang tơ̆ pơlei pơla păng đe ngê̆ nhơ̆n bơngai Chăm dêh char Lâm Đồng tŏk bŏk hăt hot oei pơhrăm păng gô chang truh Năr akŏm joh ayŏ kơ kon pơlei po kơdih.