Tơ̆ jơ sơng, Tổng Bí thư, Kơdră teh đak bơ̆n Tô Lâm sơkơ̆t hơdah Đảng, Teh đak păng Kon pơlei Việt Nam lăng tơgĭt tơdrong tơbôl jang hơdoi hăm Cộng hòa Liên bang Đức, ling lang lăng Đức jĭ teh đak kăp gĭt kơ Việt Nam tơ̆ châu Âu. Tổng Bí thư, Kơdră teh đak bơ̆n Tô Lâm tơroi gah minh ƀar tơdrong jang hơdoi kơ 2 teh đak lơ̆m khei năr truh, lơ̆m noh kăl hơtŏk đon lui gah chinh trĭ kiơ̆ tơdrong asong khul kơpal hơpeh hơpong dih băl, akŏm pơma đam kơpal rim khŭl Đảng, Teh đak păng Kuô̆k hô̆i, hăt hot iŏk yua Tơchơ̆t Tĕch pơdro hiôk hian Việt Nam - EU (EVFTA) vă dah hrôih hơtŏk tơmam tĕch răt kơ 2 pah đei hloh 20 tih đôlar, pơtoi tơdrong mă 2 teh đak jĭ tơring tĕch răt mă blŭng hăm dih băl tơ̆ EU păng ASEAN; atŭm hăm noh hơnơ̆ng hơtŏk tơdrong jang hơdoi tơpă, đei jơnei lơ̆m dôm tơdrong jang phara băl nhen khua hŏk kŏng ngê̆, tơplih 'nao gơh hơgei, tơplih kơmăi kơsô̆, mŭk drăm rơgoh 'lơ̆ng, mŭk drăm sơđơ̆ng.

Phŏ Kơdră Kuô̆k hô̆i Bodo Ramelow drơ̆ng nơ̆r hăm Tổng Bí thư, Kơdră teh đak bơ̆n gah tơdrong hơtŏk hơpeh hơpong kon pơlei, akŏm gah joh ayŏ tơpôl hloh 200.000 bơngai Việt Nam tơ̆ Đức adoi nhen kơ rơbou bơngai Việt Nam hlôi hŏk pơhrăm, pơm jang tơ̆ Đức vă hơmet tơdrong tơm jang tơbôl păng jang hơdoi kơjăp sơđơ̆ng kơ 2 teh đak.