Jô̆ truh năr 18/6, dêh char Đăk Lăk hlôi keh đang in tơbang tơdrong chih akŏm atŭm hăm hloh 1.700 hla bar hơvơn hăm nơ̆r Việt păng nơ̆r Anh, pơtruh ăn rim bơngai tang măt, anih asong jang lơ̆m păng 'nguaih kơ teh đak.

Hop akŏm asong jang mă blŭng đơ̆ng rŏng kơ hơgrop dêh char, Đăk Lăk kơchĕng gô pơjao tơchơ̆t asong jang, hla bar pơkăp chih măt asong jang dah mă chih hla bar tơbăt ăn 28 tơdrong jang tih, hăm kơsô̆ jên chih măt hloh 43.500 tih hlj. Vă vei sơđơ̆ng ăn hop akŏm đei pơgơ̆r tơnăp, hơvơn đei lơ hơnih asong jang, Kơdră Hơnih jang vei lăng kon pơlei dêh char Đăk Lăk Đỗ Hữu Huy pơgơ̆r hăm rim hơnih jang pơtoi chă hơlen băt tơdrong tơlĕch jang, kơchăng tơrĕk hăm hơnih jang mŭk drăm păng keh đang dôm tơdrong pơkăp pơm jang.