Lơ̆m jăl jang ou ki, Jơnŭm jang Drăkăn dôm jăl jang hlôi kơchăng tơplih 'nao tơdrong jang, đei tơƀôh kiơ̆ dôm tơdrong jang nhen tơdrong pơlong "Pơjing bơngai Drăkăn Việt Nam ah chăl 'nao"; tơdrong hơvơn "Pơjing unh hnam 5 ưh, 3 rơgoh"; dôm tơdrong jang tơgŭm drăkăn tơjur hin dơnuh, hơtŏk mŭk drăm đei pơih să, tơgop tơgŭm hloh 200 rơbou unh hnam đei drăkăn klaih đơ̆ng hin dơnuh; 118 rơbou unh hnam drăkăn đei tơgŭm iung pơm jang păng pơjing 'nao hloh 700 hơp tak xah yuơ đe drăkăn vang jang vei lăng... Hop akŏm hlôi pôk Ƀan châ̆p hanh Trung ương Jơnŭm jang đe Drăkăn Việt Nam jăl 14 đei 111 'nu jang. Yă Lê Thị Thủy đei pôk jang dơ̆ng Kơdră Jơnŭm jang đe Drăkăn Việt Nam jăl jang 'nao.

Pơma pơgơ̆r Hop akŏm, Kơdră Kuô̆k hô̆i Trần Thanh Mẫn sơkơ̆t hơdah, lơ̆m prăt jơhnơr hơrih kơ teh đak, drăkăn Việt Nam hlôi sơkơ̆t hơdah sơnong kăp gĭt lơ̆m tôm tơdrong jang hơrih xa tơpôl. Kơdră Kuô̆k hô̆i Trần Thanh Mẫn lui ngeh, hăm tơdrong juăt jue 'lơ̆ng rŏ, đon băt kơ teh đak, tơdrong plang, đon 'mêm bơnat, tơdrong gơh hơgei păng jơhngơ̆m đon hơtŏk tơ-iung kơtang, drăkăn Việt Nam gô pơtoi đei lơ tơgop tih tên hloh dơ̆ng ăn tơdrong hơtŏk tơ-iung tenh păng kơjăp sơđơ̆ng kơ teh đak lơ̆m chăl hơrih 'nao, tơgăl hăm 8 chư mah mă Ƀok Hô 'mêm kơ-eng hlôi pôk ăn đe drăkăn Việt Nam "Nuih mơng – Khĭn kơtang – Dim rơnim – Pơ-'nam sơ̆n".