Tơ̆ xăh Tuy An Đông, khul linh công an, ƀô đô̆i kŭm hăm khul kơdră tơring akŏm bơ̆n tơmam, kơmăy kơmŏk vă tơgŭm ăn dôm unh hnam đei lơ̆m tơring teh vă pơm trong tơter đak dơsĭ, pơdŭ tơmam tŏk oei tơ̆ plei hle. Mă đơ̆ng hnam 'nao man tam mă đang, lơ unh hnam chu pơdŭ tơmam, pơjao teh vă jang tơlĕch tơdrong jang pơm trong. Ƀok Phạm Chí Bảo, tơ̆ xăh Tuy An Đông ăn tơbăt, unh hnam ƀok tơgŭm, drơ̆ng nơ̆r pơjao teh hăm đon hơpơi 'mĕh trong jăh pơm đang, pơjing tơdrong hiôk hian mưh yak vih vât păng jang tŏk tơ̆ tơring: “Inh ‘mĕh jăh pơjao teh ăn teh đak pơm trong ‘năi, vă jăh pơm đei trong ‘lơ̆ng, yak vih vât hiôk hian”.

Vă gơ̆h pơjao đĭ đăng teh tơ̆ trong kơjung hlŏh 22km oei tơlĕch jang ming man, dôm tơring oei hơtŏk hơnăp jang năm hơdrol đơ̆ng đe kăn ƀô̆, đảng viên. Unh hnam ƀok Nguyễn Văn Hiếu, kăn ƀô̆ xăh Tuy An Đông, jĭ 1 lơ̆m dôm unh hnam pôk rĭ hnam hrôih hlŏh, mă đơ̆ng tam mă jô̆ hơlen tôm tơmam lơ̆m hnam ră: “Unh hnam ‘nao jô̆ hơlen mă oei hơnơ̆ng chă pơlung kon kăn pơm kiơ̆, jăh pơjao teh mă hrôih vă anih jang ming man jăh tơlĕch jang kiơ̆ tơdrong jang đơ̆ng Anih chĕp kơ̆l Đảng dêh char păng Anih vei lăng kon pơlei dêh char tơlĕch.”

Hrei ‘nâu lơ tơdrong jang đei jên jang đơ̆ng teh đak tơ̆ Đắk Lắk oei bơ̆ jang hiơ̆ ƀiơ̆ yoa tơhlăk găh tơdrong chưk pơ 'ngoăih teh. Hơdrô̆ trong tơter đak dơsĭ dang 1.500 unh hnam đei ƀơm truh tơ̆ teh păng hnam oei. Yoa thoi noh, tơdrong jang “30 măng năr” đei năng jĭ tơdrong jang tơm đơ̆ng dôm xăh, phường tơring đei tơdrong jang năm klĕch. Kŭm hăm roi tơbăt, dôm tơring oei tơlĕch tơdrong tơgŭm, pôk pơ ư hăm dôm unh hnam chu pơjao teh hrôih. Ƀok Trần Văn Biên, Kơdră vei lăng kon pơlei xăh Tuy An Đông ăn tơbăt: "Tơroi tơbăt pơjing đei đon lui hăm kon pơlei păng roi tơbăt dôm tơdrong tơgŭm, pôk pơ ư kiơ̆ tơdrong hơgăt 26 đơ̆ng Anih vei lăng kon pơlei dêh char, lơ̆m noh đei tơdrong tơgŭm ăn dôm unh hnam chu pơm kiơ̆ adrol đơ̆ng 8 triu truh 15 triu hlak jên.”

Dêh char Đắk Lắk tơlĕch đon pơhnŏng jang đang đĭ đăng tơdrong jang chưk pơ ‘ngoăih teh tơ̆ trong tơter đak dơsĭ adrol kơ ‘năr 31/8/2026. Hơdrô̆ jăl trong kơjung vă jê̆ 1km găh Tu gơng An Hải năm klĕch xăh Tuy An Đông jang đang adrol kơ ‘năr 30/6 âu kơnh.

Vă bơ̆ jang đei lăp hăm tơdrong hơgăt atŭm, dôm anih jang ming man vă tơlĕch jang kiơ̆ trong lôm hơkok. Ƀok Nguyễn Khoa Anh, tang măt ăn Anih vei lăng dôm tơdrong tơmât jên jang ming man tơ̆ tơring Hơlĕch kơ dêh char Đắk Lắk ăn tơbăt: “Tơring pơjao teh truh dang yơ, Anih vei lăng tơdrong jang vă athei anih iŏk jang krao akŏm bơngai bơ̆ jang truh dang noh vă gơ̆h jang đang trŏ khei ‘năr hơgăt.”

Hăm đon pơhnŏng đơ̆ng khul kơdră tơring kŭm hăm tơdrong tơgŭm đơ̆ng kon pơlei, tơdrong jang oei pơm tơplih ‘lơ̆ng tơ̆ dôm tơring tơter đak dơsĭ. Dôm met teh đei pơjao năr ‘nâu gô tơgop 1 păh vă pơjing đei trong yak tơter đak dơsĭ ‘lơ̆ng rŏ, pơih đei anih jang tŏk ‘nao ăn mŭk drăm đak dơsĭ Đắk Lắk tơ̆ hơnăp kơnh./.