Hop akŏm Khŭl jang Chih hla ar tơroi kơ Anih radiô nơ̆r pơma Việt Nam ‘măng mă 8, jăl jang 2026 – 2031 pơgơ̆r pơgê 11/6 hlôi pôk Khŭl chĕp kơ̆l lơ̆m Khŭl jang chih hla ar tơroi Anih Radiô nơ̆r pơma Việt Nam jăl jang 2026-2031 ‘noh 21 ‘nu. Bơngai jang Khŭl chĕp kơ̆l pơgơ̆r  Đảng ủy Trung ương Khŭl chih hla ar tơroi Việt Nam Phạm Mạnh Hùng đei pôk pơm dơ̆ng Kơdră Khŭl jang Chih hla ar tơroi Anih radiô nơ̆r pơma Việt Nam jăl jang 2026-2031. Hop akŏm pơgơ̆r hăm tơdrong vang akŏm đơ̆ng 185 ‘nu bơngai tang măt ăn 760 bơngai jang lơ̆m khŭl tơ̆ 20 khŭl găh Anih Radiô nơ̆r pơma Việt Nam. Kiơ̆ kơ Hla ar chih hơmet tơdrong jang bơngai jang lơ̆m Khŭl chĕp kơ̆l pơgơ̆r Khŭl jang Chih hla ar tơroi Anih radiô nơ̆r pơma Việt Nam jăl jang 2026-2031 hlôi đei Khŭl chĕp kơ̆l kơ Khŭl jang pơjing, Khŭl chĕp kơ̆l pơgơ̆r Đảng ủy Radiô nơ̆r pơma Việt Nam pơdrơ̆ng kiơ̆, Hop akŏm hlôi drơ̆ng nơ̆r pôk Khŭl chĕp kơ̆l pơgơ̆r Khŭl jang Chih hla ar tơroi Radiô nơ̆r pơma Việt Nam jăl jang 2026-2031 ‘noh 21 ‘nu.

Hop akŏm kŭm pôk Khŭl Hơlen lăng Khŭl jang chih hla ar tơroi Radiô nơ̆r pơma Việt Nam đei 3 ‘nu. Kiơ̆ kơ ƀok Phạm Mạnh Hùng, vă hơtŏk ‘lơ̆ng tơdrong jang khŭl lơ̆m jăl jang ‘nao, Khŭl chĕp kơ̆l pơgơ̆r jăl jang ‘nao gô hơnơ̆ng jang kiơ̆ jơnei đơ̆ng jăl jang hơdrol, ưh kơ pơdơh hơtŏk ‘lơ̆ng đei yua tơdrong jang khŭl, tơgop chông ba păng hơtŏk tơdrong joăt joe hla ar kơtơ̆ng ang kach mạng Việt Nam, trŏ hăm trong jang păng hơnăp jang đơ̆ng Radiô nơ̆r pơma Việt Nam.