Bơ̆jang kiơ̆ “Tơdrong jang 500 măng năr tŭn pran bơ̆jang kiơ̆ tơchă, akŏm păng băt hơdăh hơnăn kơting lĭnh lôch tang ăn teh đak” truh ‘năr 30/6/2027, dêh char Gia Lai đei Quân khu 5 pơjao tơchă, akŏm 390 kơting lĭnh lôch tang ăn teh đak. Hơdai hăm ‘noh, tơring bơ̆jang kiơ̆ iŏk pơm ADN hăm pơđĭ vă jê̆ 12.000 tŏ pơsat tam mă băt hơdăh đei hơnăn.

Yă Nguyễn Thị Thanh Lịch, Phŏ Kơdră Anih vei lăng kon pơlei dêh char, Kơdră Khŭl pơgơ̆r jang tơchă, akŏm păng băt hơdăh hơnăn kơting lĭnh lôch tang ăn teh đak dêh char Gia Lai tơbăt, tơdrong tơlĕch jang đei yua tơdrong jang ưh khan lăp tơgop bơ̆jang kiơ̆ băt bơnê đơ̆ng Đảng păng Teh đak, mă oei pơm lăp hăm ‘meh vă trŏ ƀlep đơ̆ng rơbâu ŭnh hnam tŏk bŏk răp gô tơchă dơ̆ng hơnăn bơngai lơ̆m ŭnh hnam hlôi lôch hơchăng yua kơ tơdrong rơngei, hiôk hian kơ teh đak.