Pơgê hrôih tơ̆ plei Tơ Drăh, xăh Bờ Ngoong, dêh char Gia Lai, kăn ƀô̆ Công an xăh năm ngôi tơ̆ hnam ƀok Bái, 43 sơnăm, bơngai Bahnar, pơma nuh găh tơdrong jang xa, jơhngâm pran păng tơdrong hŏk pơhrăm kơ đe kon mon. Hlŏh 1 sơnăm adrol ki, ƀok Bái lui kiơ̆ tơdrong lui “Bahnar Đêga Kon Kông” yoa dôm bơngai iung tơjră teh đak pơjing vă pơhlŭ kon pơlei.

Ƀok Bái tơroi, ƀât ‘nao lui, lơ bơngai tơroi akhan ‘nâu jĭ tơdrong lui “Hơdrô̆ kơ bơngai Bahnar”, đei teh đak asong hơkŭm bơih kơna lơ bơngai lui kiơ̆. Lăp klep truh năr khul kơdră tơring păng khul linh công an tơblang tơƀôh ‘nŏh gơ̆h băt tơdrong ‘nâu yoa khul iung tơjră phă ngơ̆r teh đak pơjing, iŏk tơdrong lui khop vă phă ngơ̆r, đơ̆ng noh ƀok ƀôh kơdih kâu put nơ̆r đe hơlĕnh bơih: “Tơdrong lui Bahnar Kon Kông ‘nŏh ưh kơ trŏ. Ưh kơ trŏ yoa sư pơm chere hơdrĕch hơdrung, teh đak bơ̆n ưh đei ăn thoi noh. Inh băt glăi ‘nŏh inh hŭt lui hloi. Bơngai Bahnar păng Jarai tơ̆ tơring nhôn đei teh đak pơngơ̆t ăn tôm tơdrong, jĭ jăn đei ‘nŏh đei ƀao hiêm pơgang”.

Kiơ̆ anih công an, đơ̆ng khei 7 truh khei 9 sơnăm 2025, tơdrong lui “Bahnar Đêga Kon Kông” hlôi pơhlŭ đei hlŏh 350 ‘nu bơngai tơ̆ 22 pơlei găh 7 xăh tơ̆ dêh char Gia Lai kiơ̆ lui. Lơ̆m khei ‘năr hơlen năng, pơm hơdăh, dôm bơngai pơgơ̆r lui bơ̆ jang tôch hlơp, ôn kiơ̆ tơdrong lui hmă vă roi tơbăt đon tơchĕng 'mĕh tơklăh pơm teh đak kơdih, chere hơdrĕch hơdrung, tơjră plơ̆ khul kơdră pơgơ̆r tơring păng krao hơvơn kon pơlei vang tơra tơgop jên vă pơyoa ăn tơdrong iung tơjră, phă ngơ̆r teh đak.

Thượng tá Phan Thanh Hải, Phŏ Kơdră Anih vei lăng sơđơ̆ng lơ̆m dêh char, Công an dêh char Gia Lai ăn tơbăt, mă tơpă “Bahnar Đêga Kon Kông” jĭ tơdrong tơplih đơ̆ng tơdrong lui “Tin lành Đêga” yoa dôm bơngai Fulro oei xa tơ̆ teh đak đe dui hor, pơgơ̆r vă pơm tơhiong tơdrong sơđơ̆ng tơ̆ tơring. Ƀât tŏk bŏk giĕng kơ khei 5/2026, Công an dêh char Gia Lai hlôi tơkêng tơdrong yoch vă dăr hơlen pơm hơdăh tơdrong “Phă ngơ̆r tơdrong tơguăt mĭnh ƀơ̆r đon”, rôp 1,2 ‘nu bơngai chĕp kơ̆l tơdrong lui ‘nâu.

“Dôm bơngai pơgơ̆r pơhlŭ pơhlôm păng tưk tơiung khul bơngai kiơ̆ lui tơ̆ tơring kon kông jing khul đei đon tơchĕng iung tơjră, phă ngơ̆r khul kơdră tơring, vă iŏk yoa, tơiung jơhngâm, tơroi dôm tơdrong kư̆ kă ăn khul hơyăt tơ̆ ‘ngoăih, tơroi kư̆ kă găh tơdrong sơđơ̆ng chinh trĭ păng tơdrong arih kơ kon pơlei, năng ‘nŏh jĭ tơmam vă tơkêng Việt Nam pơm glăi tơdrong pơm tơm kơ kon pơlei, vă pơm tơjur hơnăp jang păng bưng ai teh đak bơ̆n.”

Lơ̆m khei ‘năr bơ̆ jang tang găn, dêh char Gia Lai hlôi sek tơlang tơpăt dôm bơngai chĕp kơ̆l tơm. Hơdai hăm ‘nŏh, tơdrong jang krao hơvơn kon pơlei, roi tơƀôh, hơmet pơ ‘lơ̆ng jơhngâm đon hăm dôm bơngai bơh ƀơm yak kiơ̆ trong glăi kŭm đei năng kăl vă kon pơlei vih hơlơ̆k dơ̆ng hăm tơdrong lui hmă, trŏ luơ̆t. Tơ̆ dôm pơlei pơla, đe kră pơlei, bơngai đei kon pơlei lui yom, bí thư chi ƀô̆, ƀok pơgơ̆r pơlei jing khul jang tơm chă roi tơbăt, krao hơvơn kon pơlei băt hơdăh tơdrong hơlĕnh pơdăr đơ̆ng khul iung tơjră iŏk tơdrong lui khop vă phă ngơ̆r teh đak.

Ƀok Đinh Chroh, Bí thư Chi ƀô̆ pơm hloi ƀok pơgơ̆r plei Tơ Drăh, xăh Bờ Ngoong ăn tơbăt: “Inh hơnơ̆ng pơma hăm mih ma duch nă akhan, Việt Nam đei 54 hơdrĕch hơdrung ‘nhŏng oh. Ưh gơ̆h tơklăh bơngai Bahnar, bơngai Jarai dăh mă bơngai yoăn jing dôm tơdrong lui hơdrô̆ ôh, sư năm hơdrơ̆k hăm tơdrong tơguăt đĭ đăng hơdrĕch hơdrung.”

Đại tá Phạm Hữu Trường, Phŏ kơdră chĕp kơ̆l Công an dêh char Gia Lai ăn tơbăt, tang găn dôm tơdrong iŏk tơdrong lui khop vă phă ngơ̆r teh đak hơnơ̆ng đei Anih chĕp kơ̆l Đảng, Khul kơdră chĕp kơ̆l Công an dêh char chih hơdăh jĭ tơdrong jang tơm lơ̆m tơdrong vei sơđơ̆ng teh đak, vei kơjăp tơdrong sơđơ̆ng tơ̆ tơring. ‘Ngoăih kơ dôm trong jang vă tang găn đơ̆ng hrôih, đơ̆ng hơtăih găh tơdrong pơjing khul lui, atŏk tơiung khul chĕp kơ̆l vă dui hor kon pơlei, khul linh công an oei hơtŏk tơdrong jang roi tơƀôh đon tơchĕng; hơtŏk hơnăp jang đơ̆ng đe kră pơlei, bơngai đei kon pơlei lui yom păng dôm bơngai adrol ki bơh ƀơm yak kiơ̆ trong glăi mă lei hlôi vih dơ̆ng hăm tơdrong trŏ.

"Iung tơjră tang găn pơđĭ rim tơdrong vă tơiung dơ̆ng khul Fulro, Tin lành Đêga hăm hơnăn Bahnar Đêga Kon Kông vang tơgop vei kơjăp tơdrong sơđơ̆ng ‘lơ̆ng tơ̆ tơring. Mă loi, kiơ̆ đơ̆ng tang găn, hlôi pơtho ming đon tơchĕng ăn 1,2 ‘nu bơngai chĕp kơ̆l, pơlung đe sư mât jang lơ̆m tơdrong đĭ đăng kon pơlei vang vei sơđơ̆ng teh đak, krao hơvơn lơ bơngai bơh ƀơm yak kiơ̆ trong glăi vih dơ̆ng hăm tơdrong lui hmă".

Tơdrong tơjră tang găn hăm dôm khul iŏk tơdrong lui khop, hơdrĕch hơdrung vă phă ngơ̆r tơ̆ Tây Nguyên pơma atŭm păng dêh char Gia Lai pơma hơdrô̆ đei chih hơdăh jĭ tơdrong jang đunh đai, tôch pơmat tat. Yoa dôm bơngai iung tơjră phă ngơ̆r teh đak hơnơ̆ng tơplih trong jang, iŏk tơdrong ưh kơ hlôh vao đơ̆ng 1 kơsô̆ bơngai vă roi tơƀôh đon tơchĕng ‘mĕh tơklăh jing teh đak kơdih, pơm chere hơdrĕch hơdrung.

Mă lei, hăm tơdrong vang jang tôch pran ‘lơ̆ng đơ̆ng khul jang kơpal, kŭm hăm tơdrong vang yak hơdoi đơ̆ng khul chĕp kơ̆l đảng, khul kơdră tơring păng kon pơlei tơ̆ pơlei pơla, dôm tơdrong hơlĕnh pơdăr, phă ngơ̆r teh đak 'moi kiơ̆ tơdrong lui khop gô ưh pă đei anih vă bơ̆ jang; tơdrong hiôk sơđơ̆ng gô đei vei kơjăp hơnơ̆ng tơ̆ bri kông Tây Nguyên./.